Kya sufiyana Sama (Qawwali) saaz ke saath jaiz hai ya nahi ???

Isko jaanne se pehle ye zarur dhyan me rakhein ki Qawwali me shaan e nabi wa awliya padhi jaati hai..iske alawa koi kufriya kalimaat nahi hote.

1)Hadees : Hazrate Ayesha Razi Allahu Anha farmati hain ki ek martaba Nabi E Kareem Sallallahu Alaihi wa aalihi wasallam mere ghar par tashreef laaye jab ansaar ki do ladkiyan kuch gaa rahi thi (apne kuch ashar padh rahi thi) aur drums (tabala) baja rahi thi. Rasool Allah dusri taraf chehra karke soye hue the.
Phir Hazrat Abu Bakr siddique r.a aaye aur sakhti se farmaye ki, shaitani mazameer aur wo bhi Rasool Allah ke ghar par. (Yaani gussa hue ki ye cheez najaiz hai)
Rasool Allah ne apna chehra mubarak phera aur farmaye ki aye Abu Bakr inhe chor do, inhe kuch na kaho. Har qaum ki eid hoti hai aur ye hamari eid hai.

Sahih Bukhari, Hadees no. 949, 3931, 3529

Ghaur karne wali baat hai ki Hazrat Abu Bakr ko pata nahi tha ki Aaqa E do jahan ghar par tashreef farma hain, warna unki maujudgi me wo kabhi unchi aawaz me ya gusse se aise pesh na aate, Kyu ki gaane bajane par jab Aaqa khud khamosh hain to meri kya majaal ki mai is par gussa karun ya iski mukhalifat karun. Aur jab Aaqa ne farmaya ki Abu Bakr inhe chor do to wo khamosh hogaye.
Agar mazameer mutlaqan najaiz ya haram hote to Aaqa farma dete ki ye cheez mana hai..lekin unhone ne ye nahi kaha, balki ye kaha ki Aye Abu Bakr inhe kuch na kaho aur Aaqa khud us sama me shareek the aur sun rahe the.
Kya aisa ho sakta hai ki najaiz wa haram kaam me (maaz Allah) Rasool Allah shareek hain aur usko cheez ko mana bhi nahi kiye.
Bilkul nahi..ye bas hamari ghalat soch aur jahalat wa samajhne me ghalti hai..

2) Hadees : Hazrate Ayesha Razi Allahu Anha farmati hain ki Rasool Allah Sallallahu Alaihiwasallam mere pas khade the jab mai euthopian qaum ko masjid me khelte hue dekh rahi thi (khelna matlab jhumna, ashar gaana). Hazrat Umar r.a ne un logon ko mana kiya to Rasool Allah ne farmaya ki aye Umar unhe chor do.
Aye Banu Afrida ! Tum log khelo (yaani jaari rakho) aur tum mehfuz ho.

*Sahih Bukhari, Hadees 3530

Sarkar ne dusri qaum ko masjid me naachne gaane ko mana nahi kiya, to kya maaz Allah hamare sarkar unhi me se hogaye. Kyu ki aaj kuch logon ka yehi rawaiyya reh gaya hai ki kisi ghair qaum ke kaam me sahara denge to unhi me se hogaye.
Kyuki Dr Tahir Ul Qadri sahab par ilzam lagaya tha ki unhone isaiyo ko masjid me aane ke liye ijazat di, isliye wo isaiyo me se hogaye.
Ye ajeeb jahalat hai.

3) Hadees : Hazrat Abu Musa Razi Allahu Anhu farmate hain ki Rasool Allah Sallallahu Alaihiwasallam ne mujhse farmaya,

Aye Abu Musa ! Tumhe Dawood (Alaihissalam) ke khandan ki ek Hawa ki mausiqi (music / musical) mazameer ata ki gayi hai.

Sahih Bukhari, Hadees 5048

Jo cheez haram wa najaiz hai usko kya ek Nabi (Dawood Alaihissalam ) aur Sahabi ko ata ki gayi hai? Maan bhi lijiye kuch logon kehna ki Hazrat Dawood Alaihissalam ke daur me ye jaiz tha aur ab najaiz hai, yahan to sahabi ka bhi zikr hai jo hamare nabi ki shariat me maujood hain.

Ab dusri taraf jin hadeeson me mazameer ko mana kiya gaya hai usse muraad wo ashhaar padhna ya gaana jo kufr hai, jisse shirk ka gumaan ho.

Jis tarah tasweer ke mauzu me bhi do tarah ke hadeesein paayi jaati hai. Kuch me jaiz aur kuch me najaiz.
Najaiz se muraad wo tasweerein hain jisse shirk ka andesha ho.
***********

Aaiye ek Aur Risala Jis Ke Musannif Hazrat Shah Ahmad Saeed Mujaddidi Farooqi Madani (1217-1277 A.H.) Rehmat-ul-Allahi Ta’ala Alayh Se Hum Ye Mauzu Par Aate Hain Ki Dhol, Tashah, Naqqarah, Daff Wa Surood-O-Muwsiqi Bajaana Haraam Nahin

*Qaala

Muallif-E-Arba’in Ne Bisawein Masleh Ka Jawaab Dete Huwe Kaha Ki Naqqarah Bajaana Ba-Waqt-E-Nikaah Elaan-E-Nikaah Ke Liye Haram Hai.

*Aqoolu

Mein Kahta Hoo’n Ki Naqqarah Ya Tabala Bajaana Ba-Waqt-E-Nikaah Jaaiz Hai Jaisa Ki Allama Tahtahaawi Ne Durr-E-Mukhtaar Ke Qaul Kee Sharh Karte Huwe Likha

والملاهي كالمزامير والطبل وغيرهما اي كتبل اللهو اما اذا كان لغيره كتبل الغزاة وطبل العروس فيجوز (أنتهى)

Tarjuma :
Khel Kood Ke Liye Tabala Na Bajaaya Jaaye.
Ghaaziyon Ke Liye Aur Ba-Waqt-E-Nikaah Tabal Bajaana Jaaiz Hai.

Dhol Aur Taashah Tabalah Ke Hukm Me Hain.

*Qaala

Muallif-E-Arba’in Ne Kaha Ki Dhol Aur Taashah Tabal Ke Hukm Me Hain.

*Aqoolu

Jab Tabal Ka Hukm Shareh Durr-E-Mukhtar Kee Ibarat Se Ma’loom Ho Chuka, To Ab Mujib Ke Apne Qaul Ke Mutaabiq Dhol Aur Taasah Ko Bhi Is Par Qayaas Kar Le.
Ya’ni Sab Ka Jawaaz Durr-E-Mukhtar Ke Shaareh Kee Ibaarat Se Ayaa’n Hai.

[Tahqeeq-ul-Haqq-ul-Mubeen Fi Ajwibat’i Arbaeen, Hazrat Shah Ahmad Saeed Mujaddidi Farooki Madani (1217-1277 A.H), Safah-49.]

Daff Bajaana Aur Baghayr Muwsiqi Ke Gaana Mubaah Hai

*Qaala

Muallif-E-Arba’in Ne Sattaiswein Masle Ka Jawab Dete Huwe Kaha Ki Surood Jo Aalaat Se Khaali Ho Us Me Ulama Ka Ikhtilaaf Hai.

*Aqoolu

Mein Kahta Hoo’n Ki Muhaqqiqin Ulama Aur Muhaddisin Ne Daff Aur Surood Ko Ba-Waqt-E-Nikhaah Aur Eidain Me Niz Ba-Waqt-E-Khatanah Aur Qadum Saafir Wa Deegar Khooshiyon Me Jaaiz Kaha.
Is Kee Abaahat Hadith Shareef Se Saabit Hai Jaisa Ki Sahih Bukhari Sharif Kee Hadith Me Marwi Hai.

1) Hadees

“Rubayya’ Binte Muawwiz Bin Afara’ Kahti Hain Ki Nabi Karim SallAllahu Ta’ala Alayhi Wa Aalihi Wa Sallam Tashrif Laayein Aur Bachchiya’n Daff Ke Saath Shohda-E-Badar Ka Marshiyah Gaa Rahi Thi, Huzoor Alayhissalam Jab Tashrif Farma Huwe To Unhone Kaha Ki Hum Me Aik Aisa Azim Aalishaan Nabi Hai Jo Kal Kee Baatein Jaanta Hai.
Aap Ne Farmaya Ki Is Baat Ko Rehne Do Aur Marshiyah Kaho.”

[Bukhari Fi As-Sahih, Kitab-un-Nikah, Hadith-86.]

2) Hadees

“Umm-ul-Momeenin Hazrat Aaysah Siddiqua RadiyAllahu Ta’ala Anha Farmati Hain Ki Nabi Karim SallAllahu Ta’ala Alayhi Wa Aalihi Wa Sallam Ne Farmaya Ki Nikaah Ka Elaan Karo, Masjid Me Nikaah Padho Aur Daff Bajaao.”

[Jame’ Tirmizi, Kitab-un-Nikah An RasoolAllah SallAllahu Ta’ala Alayhi Wa Aalihi Wa Sallam, Hadith-10]

3) Hadees

“Muhammad Bin Haatib RadiyAllahu Ta’ala Anhu Se Riwayat Hai Ki Nabi Karim SallAllahu Ta’ala Alayhi Wa Aalihi Wa Sallam Ne Farmaya Ki Halaal Aur Haraam Ko Alaahadah Karne Waali Chiz Daff (Bajaana) Aur (Gaane Kee) Aawaaz Hai.”

[Nasa’i Fi As-Sunan, Kitab-un-Nikah, Hadith-174,

Ibn Majah Fi As-Sunan, Kitab-un-Nikah, Hadith-1971,
Jame’ Tirmizi, Kitab-un-Nikah, Hadith-09]

Ma’loom Huwa Ki Daff Aur Surood (Nagma, Geet, Raag, Aik Qism Ka Baaza) Aaqa-E-Do Jaha’n SallAllahu Ta’ala Alayhi Wa Aalihi Wa Sallam Ne Khud Sune Hain, Ab Is Ko Na-Jaaiz Kahna Bahut Hee Badi Be-Adabi Hai.
Aye Allah ! Hamein Is Se Mehfooz Rakhna.

[Tahqeeq-ul-Haqq-ul-Mubeen Fi Ajwibat’i Arbaeen, Hazrat Shah Ahmad Saeed Mujaddidi Farooki Madani (1217-1277 A.H), Safah-72, 73]

💐 Khulasa

Malum hua ki mausiqi ko dhol taashe ke saath gaana jaiz hai, na ki haram lekin shart ye hai ki koi kufriya kalma na ho.
Kisi cheez (nikah, buzurgon ke urs, buzurgon ki wiladat, mohorrum, sehri ke waqt logon ko uthane ke liye) ke elaan liye dhol, tasha aur naqqara bajana jaiz hai jaise hum aam taur pe dekhte hain ki buzurgon ke urs me dhol bajaya jaata hai.

Sabse badi baat ye hai ki agar in cheezon ko na bhi bajayein ya inka wajood bhi nahi hota, to bhi insan khud ek mazameer hai jo apni awaaz se kayi qism ke saaz nikaal sakta hai jaisa aaj hum dekh sakte hain kayi qaabil log hain jo apni aawaz se na jaane kitne cheezon ki naql karte hain jaise car ki speed, chidiya aur jaanwaro ki aawaz, aur yahan tak ke in mazameer ki aawaz bhi nikaal leta hai. Agar mazameer haram hote, to kya is haram cheez ko Allah ta’ala insan ke wajood pe shareek karta? Bilkul nahi. Jis tarah batil firqe jo ayat kafiro ke liye nazil hui usko momino pe chaspate hain, hadeeso ko ghalat tareekhe samajhte, usi tarah aaj Ahle Sunnat ke naam pe hi kuch batil log sama qawaali jo buzurgon ka aur khwanqaho ka amal raha hai usko haram kehte hain. Aise logon se na hi bacha jaaye, balke unhe sahi baat ki talkheen bhi ki jaaye.

Agar kahi koi chook hogai ho to isko sahi kijiye, taake mai bhi apni samajh ko behtar banau.

Jazakallahu Khair

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s