Hazrat Shaykh Syed Daniyal urf Syed Daan Sahib
Aap ek mumtaz buzurg Khuddam Sahibzadgaan Jamat main hue hain, jinki Azmat ka sabab unka Taqwa parhezgari Khashiyat e ilahi tha, aur isi bina par apne zamane ke Mashaikh e Uzzam se bhi Mumtaz the.
Hazrat ki urfiyat Daan thi aur shahi farameen wa asnad main Syed Daan naam tehrir hai ek taqseem nama badshah Shahjahan ke zamane aapki jayedad ki taqseem ke mutaliq meri nazar se guzar chuka hai
Hazrat Shaykh Syed Daniyal urf Syed Daan Sahib ka Shijra e Nasab 7 Wasto se Khwaja Syed Fakhruddin Gardezi R.A se Ja Milta hai.
Aapka Shijra e Nasab is tarah hai Shaykh Syed Daniyal urf Syed Daan bin Dawood bin Syed Hussain bin Syed Ishaq bin Syed Yakub bin Syed Idrees bin Syed Mehbub Ahmad bin Khwaja Syed Behlol bin Khwaja Syed Fakhruddin Gardezi Chishty (Rehamat ullah alaihim)
Hazrat Shaykh Syed Daniyal Urf Syed Daan Sahib ka Zikr Akbar badshah ke zamane se talluq rakhne wali ki 5 kitabe aur badshah Jahangir ki autobiography ( khud navishta Sawneh) Tuzk e Jahangiri main bhi hai
Tuzuk e jahangiri main jahangir badshah apne bhai ka Zikr aur hazrat Shaykh Daniyal Sahib ka Zikr kiya hai
Jis tarah hazrat Shaykh Salim chishti ke ghar main badshah Jahangir paida hua tha hazrat Shaykh Salim chishti ki naam ki nisbat wa barkat ki wajah se Jahangir ka Naam salim rakha tha (note Badshah Jahangir ka original naam ‘Salim’ hai aur Jahangir Takht e Badshahi naam hai )
Theek isi tarah Hazrat Shaykh Daniyal urf Syed Daan Sahib ke ghar main badshah Akbar ka ek aur beta paida hua hazrat ke ghar main badshah apni begam ko chor gaya tha kyuki badshah Akbar ko hukumati kaam ki wajeh se ajmer se jana parha to badshah ne apni begam jinka zachki(pregnancy) ka zamana Kareeb tha to sabse mehfuz jagah par Hazrat ke Daulat kade par begum ko rakha gaya jab badshah wapis Ajmer lauta to Hazrat Shaykh Syed Daniyal urf Syed Daan Sahib ki nisbat par apne is nau maulud(newly born) bete ka Hazrat ki naam ki barkat ki wajah se Daniyal naam rakha
“Aur Akbar ke zamane ki kitabo main Hazrat Shaykh Syed Daniyal urf Syed Daan Sahib ko apni zahiri salahiyat aur taqwe ki buniyad par apne waqt ke mashaikh e uzaam se bhi mumtaz likha hai “
Mazeed is tarah bhi Ahad e Akbari ki kitabo main likha hai ki
“Aap ki peshani se Salahiyat ka noor Chamakta tha”
” Aap taqwa yani parehzgari ki buniyad par apne waqt ke Mashaikh se mumtaz the “
Hazrat ka Mazar Astane Sharif ke Payti Taraf bahar ke hisse main jo chota Mazar hai wo Hazrat Shaykh Syed Daniyal urf Syed Daan Sahib ka Mazar hai
Ye bhi ek haqiqat hai ki jo qurb bahasiyat Khadim Khwaja Sahib hone ki wajah se aapko Khwaja sahib R.A se tha aur taqwa aur parehzgari se aap apne waqt ke Shaykh bhi the lijaza in dono wajuhat ki bina par aapki tadfeen ka amal Khwaja Sahib R.A ke Mazar ke Qareeb hua ye is baat ki nishan dehi karti hai jo Taqwa aur Khashiyat e Ilahi ke sabab aapko unsiyat thi, isi bina par aapko Khwaja Sahib ke mazar ke pass supurd e Khak kiya gaya tha ye azmat bhi bht kam ashkhas ko mayasser hui(Alhamdulillah)
Kuch log Kam ilmi ki buniyad par keh dete hain ki jo masuf ka mazar hai wo Mazar Badashah Abkar ke bête Daniyal ka mazar hai ye galat hai kyuki Shehzada Daniyal ka inteqal Deccan Burhanpur main hua hai.
Ye Mazar Hazrat ka hi hai jo Astane ke bahar Chota Mazar hai pehle is Mazar ke Charu taraf chote qad ki white Marble se boundary bhi thi
Kyuki qul Syedzadgaan Sahibzadgaan ke Shijra record main 350 saal tak koi naam Daniyal nahi hai ye sirf Hazrat mausuf hi hai jinka mazar hai jisko kuch logo ne galat samajh kar shehzda Daniyal ( badshah Akbar ke bete) ka mazar bataya hai
Aap ke daulat kade ko pehle “Daulat Kada e Daniyal” kha Jata tha ab usko Shahi Mahal Kha jata hai
Ye tamam Mahal Shahi Khuddam Sahibzadgaan Syedzadgaan ke Akbar Badshah ke zamane ke buzurg hain tamam Mahal Shahi Hazraat ka Shijra e nasab in se hi aage barhta hai Abkar ke daur ke baad
Aaj Mahal Shahi Hazraat sirf Shahi Mahal main hi nahi balqe Shahi Mahal ke bahar bhi, tadad barhne ki wajah se rehte hain un sab ka shijra e nasab bhi Akbar badshah ke zamane main in hi mumtaz buruzg se milta hai
Hazrat ke do Sahibzade the
1.Syed Abda
2. Syed Kamal
Syed Abda ki aulad ki tadad zayada hai aur is faqeer ka shijra e nasab bhi Syed Abda bin Shaykh Syed Daniyal urf Syed Daan Sahib se 14 wasto se milta hai
Hazrat ki auladon main kafi mumtaz buzurg bhi guzre hain jin main abhi sirf do Shakhsiyat jinka talluq badshah Shahjahan aur Aurangzeb 2 daum ke zamane se hai
1. Syed Abul Maali
Inko badshah ShahJahan ke zamane main Ulama wa Mashaikh ka auhada aur Shahi mehfil ki nashisht jo bichti hai aaj bhi us main badshah shahjahan ke zamane se Syed Abul Maali se jaari hua tha aaj us nashisht ko gadela kha jata hai us main aapki bhi ek nashisht thi Mutawwali Dargah ki nashisht ke pass lagti thi
Hazrat Syed Abul Maali ka shijra e nasab 3 wasto se hazrat Shaykh Syed Daniyal urf Syed Daan Sahib se ja milta hai
Ajmer shehar main urdu zuban ki ibteda main jo likhi hui gazal ka sabut milti hai wo inhi ki gazal ka hi milti hai is se pata chalta hai ki aap shayar bhi the aur urdu zuban ke alfaz ka istemal bhi kiya hai apni gazal main aur sakht hindi zuban ka istemal bhi kiya hai
2 . Maulvi Syed Akram Ali
Maulvi Akram Ali ek Alim buzurg the aur Syed Abul Maali Sahib ke parh pote hain Syed Abul Maali Sahib ki aulad main tawatur ke sath auhada e mudarris bhi tawatur ke sath chalata raha aur aur Dargah Sharif ke Madarsa main deeni taleem ki tadrees dete the aur us zamane main khuddam jamat ke mashur alim e Deen the aur unki mohar kuch shahi dastaweezat par bhi lagi hui hai
Baad main Alamgir (2)daum ke zamane main aapke walid Syed Hayatullah sahib ke inteqal ke baad aapko Dargah Sharif main Madasra main mudarris ki hasiyat se Abdullah khan sadar us sudoor ki jari karda shahi Sanad se muqarar kiya aur kuch Zameen jo inko apne dada Syed Wali Muhammad Sahib se ba Hasiyat e mudarris mili thi us main bhi izafa kiya gaya tha aapke dada Syed Wali Muhammad ke zamane main Jo Alamgir badshah ka zamana tha.
Aapki koi aulad nahi hui lihaza aap la walad guzre hain
(Tehqiq karde az )
Aal-e-Qutub Aal-e-Syed Abdullah Shah Ghazi 