AL QAULUL QUR’AN FEE AZMAT-E-SAYYEDUNA IMRAN:Deen ki Madad Karne Waale Shayar

img-20220530-wa00633219707739082791333

“Aur shayaro ki pairwai behke hue log he karte hain”
“Kya tumne nahi dekha ke wo (shoara) har waadi-e(-khayal) me (yu he) sargarda phirte rehte hain (unhe haq me sachhi dilchaspi aur sanjidgi nahi hoti balki fakat lafzi aur fikri joulaniyo me mast aur khush rehte hain).”
“Aur ye ke wo (aisi baate) kehte hain jinhe khud karte nahi hain.”
“Siwaye un (Shoara) ke jo Imaan laaye aur nek amal karte rahe aur Allah ko kasrat se yaad karte rahe (yaani Allah aur Rasool SallAllahu Alaihi wa Aalihi wa Sallam ke Madah-khwan ban gaye) aur apne upar zulm hone ke baad (zaalimo se ba-zabaan-e-sher) intekaam liya (aur apne kalaam ke zariye Islam aur mazlumo ka difa kiya balke unka josh badhaya to ye shayeri mazmoom nahi,) aur wo log jinhone zulm kiya an kareeb jaan lenge wo (marne ke baad) kaunsi palatne ki jagah palat ke jaate hain.”
Surah Shu’ara 26:224-227

Allah Ta’ala ne un shoara se dur rehne ko kaha jo sirf sher likhte hain lekin agar sher me kuch acha matlab bhi ho to bhi wo khud uspe amal nahi karte bus sher sunna sunana isi me mast rehte hain. Lekin phir Allah Ta’ala ne
un Shoara ki taarif ki apne sheron se Allah aur Uske Habib SallAllahu Alaihi wa Aalihi wa Sallam aur Unke Deen ka difa karte hain. Aise shayaro ki Allah Ta’ala ne Apne Kaalam me taarif farmayi hai.
To wo saare mashhoor Shayar aur Naatkhwan, jaise Hazrat Hassan bin Sabit RadiAllahu Anhu, etc, ye to is list me hain he lekin in taarif kiye hue shoara ki list me sabse upar bhi to koi hoga jisne sabse pehle Sher ke zariye kuffar ke mu band kiye honge! To wo kaun hain? Wo Hazrat Abu Talib Alaihissalam hain. Aylan-e-Nabuwwat to Aaqa SallAllahu Alaihi wa Aalihi wa Sallam ne 40 baras ki umr mubarak me farmaya lekin Hazrat Abu Talib Alaihissalam Aaqa SallAlahu Alaihi wa Aalihi wa Sallam ki Shaan me Aapke Bachpan Mubarak se he Sher likhne lage! Imam Bukhari ne bhi jisko Sahih Bukhari me riwayat kiya hai:
Wa Abyaza Us Taskal Gamaamu be Wajhihi
Simalul Yatama Ismatun Lil Ara-aamileen
Yaluzu bihil hullaku min Aal-e-Haashimin
Fahum Indahu fee Ni’amtin wa Fawazili.”
(Imam Bukhari, Sahih, 1/342, Hadees no. 963)
“Ay Safed Khoobsurat Gorey Chehre Waale, Ay Sufed Roshan Chehre Waale Habib, Aapki Zaat Itni Ba-Barkat hai ke Aapke Chehre ke Sadqe se badalo se barish li jaati hai! Aur Aap Yateemo ke fariyad ras hain Aur Aap Bewaao ki Ismad ke Muhafiz hain. Aur Banu Hashim ki bhuki pyasi halaqat me ghiri hui Aulad har waqt Aapko ghere rehti hai ke Unke liye Aap he Daman me Saari Naymate hain Saari Fazilaten hain”

Ye to Aaqa SallAllahu Alaihi wa Aalihi wa Sallam ki Umr Mubarak abhi sirf 2 saal thi, tab itna khoobsurat sher likha unhone! Gaur karne ki baat hai!!
Aur phir Aylan-e-Nabuwwat ke baad jo kuch farmaya usme se chota sa hissa upar pe chapter me likh diya hai. Aur ek sher, jab kuffar ne Hazrat Abu Talib Alaihissalam se kaha ke Aap Apna Bhatija Muhammad hamare supurd karden aur badle me hamare kabile se jis jawan ko chahe apne paas rakhlen. To iske jawab me Aapne un kuffar se kaha:
“Aur ye log ye bhi kehte hain ke Mai (Apne Noor-e-Nazar) AHMAD(-e-Mujtaba SallAllahu Alaihi wa Aalihi wa Sallam) ko to unke supurd kardun aur inke kisi farzand ki kafalat aur sarparasti karne lagun? Ba-Khuda ye kabhi nahi hosakega aur is raah me kisi malamat karne waale ki Mai parwah nahi karta.
Maine in logo ko saaf saaf bata diya hai ke ALLAH, JO MERA RAB HAI, Wohi Mera Madadgaar hai. Aur quraish me se koi bin gaalib (qabile) ki aulad me se jo shakhs bhi (Rasool-e-Khuda SallAllahu Alaihi wa Aalihi wa Sallam ke khilaf) bagawat ka alam buland karega, Hum uska muqabla karenge aur Khuda Hamari madad karega.”
(Deewan-e-Abu Talib Alaihissalam)
Aur ek jagah Aaqa SallAllahu Alaihi wa Aalihi wa Sallam se Mukhatib hokar Aapne farmaya:
“Hum jaante hain ki AAP HE RASOOL-E-BARHAQ hain Jinhe Khuda Wand-e-Aalam ne Mab’oos bar-Risalat farmaya hai,
Aur us Rabb-e-Zuljalal ki Janib se Aap SallAllahu Alaihi wa Aalihi wa Sallam par Kitab nazil hui hai.”
(Deewan-e-Abu Talib Alaihissalam)
Aur ek jagah Aaqa SallAllahu Alaihi wa Aalihi wa Sallam ki Shaan me farmaya:
“Wa Shaqqa Lahu Minis-me-hee Lee Yujillahu Fazul Arshi Mahmoodun wa Haza Muhammadun” “Allah Ta’ala ne Aap SallAllahu Alaihi wa Aalihi wa Sallam ki Takreem ki khatir Aap SallAllahu Alaihi wa Aalihi wa Sallam ka Naam Apne Naam se nikaala hai, Pas Arshwaala (Allah Ta’ala) Mahmood aur Ye (Habib) Muhammad Hain (SallAllahu Alaihi wa Aalihi wa Sallam).”
(Bukhari, Tarikh as Sagheer, 1/13, Hadees #31)

Aise bahot saari Imaan Afroz Sher Aapne likhe aur wo saare Sher “Deewan-e-Abu Talib Alaihissalam” kitab me milte hain jo ke Saudi Arabia me bhi print hoti thi aur Madina Tayyeba me milti thi. Ab waha production band hogaya hai lekin dusri jagaho pe aaj bhi print hoti hai.