Muazzo Mukarram Ghar

img_20211115_1857402513744791965211116.jpg

“(Ay Habib!) Kya Usne Aapko Yateem nahi paaya, phir Usne (Aapko Muazzaz-o-Mukarram) Thikana diya.”
Surah Duha 93:6
Kuch waqt keliye Silsila-e-Wahi ruk gaya tha, to kuffar ye kehkar RasoolAllah SallAllahu Alaihi wa Aalihi wa Sallam ka mazak udaane lagey ke (maazAllah) Muhammad ke Rab ne Muhammad ko chod diya hai (SallAllahu Alaihi wa Aalihi wa Sallam). To baar baar aisa taana sunkar Aaqa SallAllahu Alaihi wa Aalihi wa Sallam ke Qalb-e-Aqdas par thodi si gum ki kaifiyat taari hui. Bus ye hona he tha ke Allah Ta’ala ne Surah Duha ko nazil farmaya. Usme Allah Ta’ala Apne Habib se farmata hai:
“Kasam hai Mujhe Chasht ki tarah Roshan Aapke Chehre ki, Kasam hai Mujhe Raat ki tarah Siyah Aapke Gesu-e-Ambari ki, Ay Mehboob ye log jhoot kehte hain, Aapke Rab ne Aapko nahi choda na he Wo Aapse kabhi naaraz hua hai! Aur beshaq har baad ki ghadi Aapke liye pehle se behtar hai. Aur Aapka Rab ankareeb Aapko (itna kuch) ata farmayega ki Aap Raazi hojayenge.”
Aur phir farmaya: “(Ay Habib!) Kya Usne Aapko Yateem nahi paaya, phir Usne (Aapko Muazzazo Mukarram) Thikana diya.”
Sab jaante hain ke Aaqa SallAllahu Alaihi wa Aalihi wa Sallam ke Walid Hazrat Sayyeduna Abdullah Alaihissalam ka Wisaal Aapki Wiladat-e-Ba-Sa’aadat se pehle he hogaya tha aur Aapki Walida Majida Hazrat Sayyeda Aamina Salamullahi Alaiha ka Wisaal Aaqa SallAllahu Alaihi wa Aalihi wa Sallam ke Bachpan Mubarak me he hogaya tha jab Aapki Umr Mubarak 6 ya
8 baras ke lagbhag thi. Aaqa SallAllahu Alaihi wa Aalihi wa Sallam itni choti umr me he Durr-e-Yateem hogaye they. Phir Aapke Dadajaan Hazrat Abdul Muttalib aur Aap SallAllahu Alaihi wa Aalihi wa Sallam ke sagey Chacha Hazrat Abu Talib Alaihissalam ne Aapki Kafalat farmayi, phir 2 saal baad Dadajaan ka bhi wisaal hogaya. Aur tabse lekar 25 baras ki umr mubarak tak Aap SallAllahu Alaihi wa Aalihi wa Sallam Hazrat Abu Talib ke Gharme rahe! Aur Imam Abu Nuaim “Dalailun Nunuwwah” me riwayat karte hain ke Jab Aaqa SallAllahu Alaihi wa Aalihi wa Sallam ki Wiladat-e-Pak hui to Aap SallAllahu Alaihi wa Aalihi wa Sallam ke Jadd-e-Amjad Hazrat Abdul Muttalib RadiAllahu Anhu Tashreef laaye aur Aap SallAllahu Alaihi wa Aalihi wa Sallam ko uthaya, Mathe par Bosa diya, Fir Hazrat Abu Talib ke hawale karte hue farmaya: “
Ye Tumhare paas Meri Amanat hai, Mere is Bete ki Bahot Badi Shaan hogi!”
Yaani Aaqa SallAllahu Alaihi wa Aalihi wa Sallam ki duniya me tashreef aawari ke fauran baad he Aapke Dadajaan ne Aapki Kafalat ki zimmedari Hazrat Abu Talib ke supurd kardi thi! Aur phir Hazrat Abu Talib aur Sayyeda Fatimah binte Asad (Salamullah Alaihim) ne Aaqa SallAllahu Alaihi wa Aalihi wa Sallam ki itni pyaar se kafalat farmayi ke apne khudke bachho ko baadme dekhte, pehle Aaqa SallAllahu Alaihi wa Aalihi wa Sallam ki zaruriyat puri farmate! Unki itni baymisaal Muhabbat ke baais Aaqa SallAllahu Alaihi wa Aalihi wa Sallam Hazrat Fatimah binte Asad Salamullahi Alaiha ko “Ummi” kehte yaani “Ammi” kehkar he pukaarte, halanke Wo Aapki Chachi hain.
Allah Ta’ala farma raha hai ke Jab Humne Aapko Yateem paaya to Aapko kitna Acha Ghar diya. Allah Ta’ala Apni taraf mansub karraha hai ke Ye itni Muhabbaton wala ghar Maine Aapke liye banaya hai. Allah Ta’ala kisi kafir ki ya usse judi kisi chiz ki tarif nahi karta. Kafir to Allah ke dushman hain jinke liye dayemi jahannum ka azaab hai. To yaha Jis Ghar ko Allah ne purey duniya me Apne Habib ki Kafalat keliye chuna aur Jiski Taarif bhi farma raha hai, kya wo kisi kafir ka ghar hosakta hai? Aur dusri baat ye Allah Ta’ala Khud Apne Nabiyo ki dekhbhaal farmata hai. To yaha jo Muhabbaten aur Shafqaten har roz Aaqa SallAllahu Alaihi wa Aalihi wa Sallam par ki jarahi hain, ye Allah ki taraf se hai lekin zariya iska Hazrat Abu Talib aur Unka Ghar hai. Kya Allah
Ta’ala Apne Sabse Pyaare Rasool ko, Apne Habib ko Bachpan se Jawani tak aise gharme rakhega jaha halal haram ki tameez na ho? Kafiro ke yaha halal haram ki koi tameez nahi hoti. Kya Allah Ta’ala Apne Habib ko aise gharme bada karega jahan haram ki kamayi aati ho, jahake rehne waalo ko halal haram ka koi fark na ho? Agar nahi to phir maanna padega ke wo ghar Paak ghar hai, aur pak tabhi hoga jab waha gairullah ki ibadat na ki jaati ho, aur Allah Ta’ala ne isi liye to Huzoor ko Khush karne keliye baat farmayi ke Jab Humne Aapko Yateem paaya to kya Muaaazo Mukarram Ghar ata kiya. To ab aur batane ki zarurat nahi, agar maante ho ke Allah Apne Habib ka Nigehbaan hai, to kabool karna padega ke ye ghar bhi Pak yaani Imaanwaalo ka ghar hai, warna jisko Rasool ka he adab nahi wo kehta firey jo chahe. Baat Hazrat Abu Talib ki nahi, Baat yahan ye dekhne ki hai ke Allah Ta’ala ne kaise Apne Habib ko Muhabbaton ke saath bada kiya, jiska zariya ye Ghar bana, yaani is Gharke Rehnewaale bane.
Aur Dalailun Nabuwwah me Abu Nuaim aur Imam Bayheqi bhi apni Dalailun Nabuwwah (naam same hain, kitaben alag hain) me riwayat karte hain ke Hazrat Abdul Muttalib Alaihissalam, Yemen ke badshah Saif bin Zee Yazan se mulaqat keliye gaye, to taweel waqiya hai, jisme asal nuqta ye ke wo badshah Saif bin zee Yazan Hazrat Abdul Muttalib ko tanhayi me bualata hai aur aapse farmata hai ke humne aasmani kitabo me padha hai ke Allah ka Aakhri Nabi is duniya me aayega, aur aage farmaya ke:
“Us Bache ki Wiladat ka yehi zamana hai aur mumkin hai ke Wo paida hochuka hua ho. Uske Walidain wafat pajaenge aur Uske DADA aur CHACHA Uski Parwarish karenge!”
Taweel riwayat hai, lekin yaha batane ka maqsad ye hai ke Hazrat Abu Talib Alaihissalam ka zikr purani aasmani kitabo me bhi aaya tha! Jinko ye sharf milne wala hai, jiske khatir unka zikr Allah Ta’ala Apne Nabiyon ki kitabo me kiya, to wo maazAllah kafir honge?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s