Salam Ya Husain AlahisSalam

“Sahadat e Imam Hussain Alaihisalam ka Paigham amali jidd o jehd ka Paigham hai, Muhabbat e Hussain Alaihisalam, taʻalluq e Ḥussain Alaihisalam aur nisbate Hussain Alaihisalam ko rasmi na rehne diya jaye balke use amali ḥal aur ḥaqeeqat me badal diya jaye, use ḥaqiqi zindagi ke taur par apnaya jaye yahi nisbat aur taʻalluq hamara orhna bichauna ho. Is nisbat aur taʻalluq ko haqiqi zindagi banane ka matlab yeh hai ke yeh pehchan liya jaye ke Yazeedi kirdar kya hai aur Hussaini kirdar kya hai? Yazeed ne Islam ka khula inkar nahiṅ kiya tha aur na hi buto'n ki pooja ki thi. Masjide bhi mismar nahi ki thi. Woh Islam ka naam leta tha, baiʻath bhi Islam par leta tha, woh yeh bhi kehta tha keh main namaz padhta hu, Islam ka khula inkar to Abu Lahabi hai, Yazeediyat yeh hai keh Islam ka naam bhi liya jaye aur Islam se dhokah bhi kiya jaye, Islam ka naam liya jaye aur amanat me Khayanat bhi ki jaye, naam Islam ka liya jaye aur Āmiriyat musallat ki jaye, apne se ikhtelaf karne walo ko kuchla jaye aur Islam ke muqaddas naam ko pamal kiya jaye. Yazeediyat, Islam se munafiqat, dajl-o fareb ka naam hai. Islama niẓam ke sath dhokah karne, amanato me khayanat karne, baitul maal me khayanat karne aur qaumi zarae aur daulat ko apne taʻayyushat par kharch karne ka naam Yazeediyat hai. Rooh e Hussain Alaihisalam aaj humse pukaar pukaar kar keh rahi hai ke meri muhabbbat ka damm bharne walo main dekhna chahta hu ke mer muhabbat rasmi hai ya meri muhabbat me aaj tum phir koyi maʻreka’e Karbala barpa karte ho. Main dekhna chāhta hu ke meri muhabbbat me aaj tum phir waqt ke Yazeediyo ko lalkarte ho ya nahi. Rooh e Hussain aaj phir darya'e Furat ko rangin dekhna chahti hai, aaj phir ek naya maʻrika’e Karbala barpa hota dekhan chahti hai aur tumhare Sabr-o isteqamat ka imtehaan lena chahti hai. Rooh e Hussain dekhna chahti hai ke kaun Islam ka jhanda sar-buland karte huwe tan man dhan ki bazi lagata hai, kaun hai jo mujh se Haqiqi pyar karta hai. Sahadat e Imam Hussain Alaihisalam ka sabaq yeh hai ke dekho! Kya tumhare daur ke hukmaran Islam ka naam lene me mukhlis hai?kya woh Islami nizam ko nafiz karne aur bapa karne me mukhlis hai? Kahi woh Islam ki amanat me khayanat to nahi kar rahe ya Islami nizam ke nifaz me dhoka to nahi kar rahe? Agar woh Islam k naam bhi lete hai aur munafiqat aur dajl-o fareb bhi karte hai to jaanlo ke unka kirdar Yazeediyat ka kirdar hai. Hussaniyat ka taqaza yeh hai ke jaha jaha tumhe Yazeediyat ke kirdar ka naam o nishan nazar aye, Hussaini lashkar ke Ghulam aur fard ban kar Yazeediyat ke kirdar ko pas pas kar do. Is ke liye tumhe apna maal, apni jaan aur apni auladein hi kyu na qurban karni padhe.

[Shahadate Imam Hussain (falsafah-o taʻlimat),/250_251.]

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s