Maah e Muharram me khushiyaa.n kyun nahi manani chahiye…

BISMILLAH HIR RAHMANIR RAHEEM

QULLA AS’ALOKUM ALAIHE AJRAN ILLAL MAWADDATA FIL QURBA

Surah Shura 23

Tarjuma:
(Aye MAHBOOB) Aap farma di jiye ke main tum se koi ajr (yaani badla kaar e risalat ka) nahi chahta siwaye meri Qarabat ki mawaddat o muhabbat

Imam e Ahlesunnat mufassir e azam Hazrat Imam Fakhruddin Raazi ne Tafseer e Kabeer me farmaya hai ke ye ayat mubarka PANJATAN PAK aur AHLE BAYT ALAIHIMUS SALAM ki shan me nazil hui hai, isi tarha jamhoor e mufassireen ka qaul bhi yahi qaul hai.

Is Ayat e Kareema, jise ayat e mawaddat bhi kehte hain, par ham gaur karein to ALLAH ye farma raha hai ke jo kuch RASOOL e PAK SALLALLAHO ALAIHE WA ALEHI WASALLAM ne kaar e risalat anjaam diya hai yaani namaaz sikhai, roza sikhaya, zakaat ke ehkaam samjhaye, tableeg o isha’at e deen ki aur jahalat ke andhere se nikal kar ilm ke noor se munawwar kiya, al garz ISLAM ke ehkamaat ki mukammal taleem de kar ham sab ko insaan e kamil aur namuna e amal banaya. Us dauraan jo kuch musibatein RASOOL ALLAH SALLALLAHO ALAIHE WA ALEHI WASALLAM ne bardaasht ki aur jin-jin pareshaaniyon se guzare maslan faqe kiye, logo ki dush-naamiyo par tahammul kiya, logo ne patthar maare phir bhi sabr kiya.

Mash’hoor Hadees Pak me hai ke RASOOLALLAH SALLALLAHO ALAIHE WA ALEHI WASALLAM ne irshad farmaya ke jitni musibat raah e KHUDA me mujh par aayi hai utni kisi pe nahi aayi. Maslan kisi nabi ki AHLE BAYT zibah nahi kiya gaya, qaidi nahi banaya gaya aur na hi kisi NABI ki betiyo.n ko bazaar me be-parda phiraya gaya, aur is tarah ki kayi musibat se do-chaar huwe. Phir bhi har haal me Tableeg e Islam farmate rahe aur ehkaam e KHUDA ko ashaab tak unke waseele se ham tak pahunchaya.

ALLAH isi taraf ishara karte huwe mazkoora Ayat me farma raha hai ke in tamaam qurbaniyo ke badle me kuch nahi chahiye bas ye ke RASOOLALLAH SALLALLAHO ALAIHE WA ALEHI WASALLAM ke AHLE BAYT se muhabbat karna aur mawaddat rakhna.
To pata ye chala ki Ajr e RISALAT RASOOLALLAH SALLALLAHO ALAIHE WA ALEHI WASALLAM ki AHLE BAYT ALAIHIMUS SALAM se be inteha aur shadeed muhabbat karne ka naam hai.

Ab ek sawaal uth’ta hai ki Mawaddat kya hai?
Muhabbat ki inteha ke baad jis kaifiyat wa ehsaas o jazbaat ki ibteda hoti hai use mawaddat kehte hain. Muhabbat kehte hain us ehsaas ko jiske sabab kisi dusre shakhs ko itna pasand kare ke khud apni zaat par usko bartari dene lage aur us ke hukm ko baja laaye. Jab ke Mawaddat isse ek darja aage ki chiz hai ke jab insaan kisi se inti muhabbat karne lage ke uske liye apna sab kuch lutane par amadah ho jaaye aur uske liye apni jaan dene se bhi gurez na kare.

ALLAH TA’AALA momineen ko AHLE BAYT se is tarha ki muhabbat karne ka hukm de raha hai aur is ayat me diye gaye hukm ki buniyaad par aap aur ham aksar kaha karte hain RASOOLLALLAH SALLALLAHO ALAIHE WA ALEHI WASALLAM aur unke AHLE BAYT ke liye apni jaan tak luta denge.

Apni AHLE BAYT se muhabbat ka hukm RASOOLALLAH SALLALLAHO ALAIHE WA ALEHI WASALLAM ne bohat se muqamaat par diye hain. Abhi ye mauqa nahi hai ke un tamaam riwayaat ka zikr karu.n albatta ishara kiye deta hoon ke muta’ala ka shok rakhne wale Hadees e Saqlain, Hadees e Kisa, Hadees e Noor jaisi riwayatein padh sakte hain. Bas barkat ki niyat se us Hadees ko mafhooman darj kar hoon jisko Al Sawaiq ul Muharriqa me Imam ibne Hajar Makki Al Shafe’i Al Qadri ne naql kiya hai ke RASOOLALLAH SALLALLAHO ALAIHE WA ALEHI WASALLAM ne irshad farmaya ke koi shakhs musalmaan nahi ho sakta jab tak Mujhe se muhabbat na kare aur koi shakhs Mujhse muhabbat nahi kar sakta jab tak ke meri AHLE BAYT ko apni AHLE BAYT par bartari na de de.

Bas Muhabbat wa Mawaddat e RASOOLALLAH aur AHLE BAYT ALAIHIMUS SALAM ka yahi taqaza hai ke jin tareekho.n me unpar koi khushi ka muamla pesh aaya ho to unki khushi me sharik ho kar khushiyaan manaye aur apne imaan ka saboot pesh karein. Maslan RASOOLALLAH SALLALLAHO ALAIHE WA ALEHI WASALLAM ki wiladat ka mauqa ho ya HAZRAT ALI ya HAZRAT SYEDA FATIMA ya IMAM HASAN ya IMAM HUSAIN ya jumla AHLE BAYT me se kisi ki wiladat ya shaadmani ki tareekh aaye to us din momin ko chahiye ke khushi manaye.

To bas isi tarha AHLE BAYT ALAIHIMUS SALAM se muhabbat wa mawaddat ka taqaaza ye hai ke agar inhi AHLE BAYT ALAIHIMUS SALAM me se kisi ki wisaal ya shahadat ka mauqa ho to gham ka izhar kare khaas taur par Syed ush Shohada HAZRAT IMAAM HUSAIN ALAIHIS SALAM ne jis tarha se Islam ko bachane ke liye yaani kalma, roza, namaz garz ki jumla ehkaam e ILAHI aur insaani qadro.n(values) ko bachane ke liye jis tarha se maidaan e karbala me qurbaani pesh ki hai uski nazeer milna mushkil hai.

Aaj imaan ke saaye me saans lene wale har musalmaan kalme go par HAZRAT IMAAM HUSAIN ALAIHIS SALAM ka ehsaan hai aur is ehsaan ka badla koi shakhs jitna bhi chahe chuka nahi sakta aaj agar koi shakhs namaaz ada karta hai aur ehkaam e ilahi baja lata hai to us par HAZRAT IMAAM HUSAIN ALAIHIS SALAM aur digar Shohda e Karbala ka ehsaan e azeem hai.

Is baat ko ek shayar ne ba khubi kaha hai:

Namaziyo par hai farz ye khuda ki qasam
Bicha ke musalla kahe HUSAIN zindabaad!

To hukm e ILAHI ke tahet isi muhabbat ka ye taqaaza hai ke ham maah e muharram me Gham e IMAAM HUSAIN ALAIHIS SALAM ka lihaaz karte hue apni khushiyo par inke gham ko tarjeeh dete hain aur isi wajeh se kisi khushi ki mehfil wa taqreeb se door rehte hain. Ye to common sense ki baat hai ki jab insaan kisi se muhabbat karta hai aur us par koi gham ya dardnaak haadsa pesh aa jaaye to woh is gham ko apna gham bana leta hai. Isliye maah e muharram me RASOOLALLAH SALLALLAHO ALAIHE WA ALEHI WASALLAM aur unki AHLE BAYT ALAIHIMUS SALAM ki Arwaah e Pak beshak ghamgeen hoti hai. Lihaza momin hone ka taqaaza ye hai ke RASOOLALLAH SALLALLAHO ALAIHE WA ALEHI WASALLAM aur Unki AHLE BAYT ALAIHIMUS SALAM ko pursa wa taziyat pesh karein aur dil se ye kahein ki YA RASOOLALLAH SALLALLAHO ALAIHE WA ALEHI WASALLAM ham aapke gham me sharik hain.

Saheeh muslim me jo Hadees e Saqlain hai yaani Quran aur AHLE BAYT wali uska aakhiri jumla ye hai ki RASOOLALLAH SALLALLAHO ALAIHE WA ALEHI WASALLAM ne irshad farmaaya ki m1ain tumhe darata hoon ALLAH se apni AHLE BAYT ke maamle me aur ye jumla HUZOOR PAK SALLALLAHO ALAIHE WA ALEHI WASALLAM ne teen (3) baar irshaad farmaya.

Kya ham HUZOOR PAK SALLALLAHO ALAIHE WA ALEHI WASALLAM aur AHLE BAYT ALAIHIMUS SALAM ke gham ki wajah se apni khushiyo ko mauqoof wa multvi (postpone) nahi kar sakta? Naye saal ki Mubarak baad dene baaz nahi aa sakte? Kya ye bid!’at nahi hai? Jab ke yahi muhabbat ka taqaaza hai aur Quran Kareem ki zikr karda aayat se sabit bhi ho chuka hai.

Mera ye sawal apne momin bhaiyon aur behno se hai ke roz e qayamat agar HUZOOR PAK SALLALLAHO ALAIHE WA ALEHI WASALLAM aap se sawaal kare lenge ke tum hamare gham me sharik kyun nahi ho sake to aap kya jawaab denge? Agar RASOOLALLAH SALLALLAHO ALAIHE WA ALEHI WASALLAM ne ye puch liya ke milaad ki khushi me jalsa to khoob karte the, kya Mere Nawaase ke gham me bhi sharik hue? To iska kya jawab ban payega? Agar RASOOL ALLAH SALLALLAHO ALAIHE WA ALEHI WASALLAM ne ye sawal kar liya ke duniya me tumne hamare gham ki tarikho me khushiyo ki mehfil sajaayi aur naye saal ki mubarak baad di, tafreeh wagaira ka ehtamaam kiya, kya tujhe hamara gham yaad na raha to kya jawaab banega?
Momineen zara hosh me aayein aur thande dimagh se sochein……

Ye baat to hadees se sabit hai ke RASOOLALLAH SALLALLAHO ALAIHE WA ALEHI WASALLAM ummat se apni AHLE BAYT ALAIHIMUS SALAM ke baare sawaal zaroor karenge. Kyunki chand riwayato me ye alfaaz aaye hain ke main dekhunga ki tum meri AHLE BAYT ALAIHIMUS SALAM ke saath kya sulook karte ho. Is riwayat me jo lafz hai dekhunga is se yahi matlab nikalta hai ke RASOOLALLAH SALLALLAHO ALAIHE WA ALEHI WASALLAM sawaal karenge ab jis kisi ke paas himmat ho jawab dene ki to woh phir jo chahe kare.

Karbala me isi ayat mawaddat par amal karte hue SYEDA ZAINAB ne apne bachcho ko aur dostaan e ha4zrat IMAAM HUSAIN ALAIHIS SALAM ne unke gham sharik hone aur unki madad karne ke liye unke upar aayi musibat se ladte huwe apni jaano ki qurbani ka nazrana diya aur mawaddat ka haq ada kiya.
Imaan ka taqaaza yahi hai ke duniya me apna sab kuch IMAAM HUSSAIN ALAIHIS SALAM ke gham me luta dein aur unke gham me sharik ho kar upar pesh ki gayi Ayat Qur’ani ke hukm pe amal karte hue imaan ka saboot deñ aur ajr e risalat ada kare. ALLAH mujhe aur doosro ko iski taufeeq ata kare.

Note: Lafz Ahle Bayt ka matlab ghar wale hota hai lekin jab is lafz ko HUZOOR PUR NOOR HAZRAT MUHAMMAD SALLALLAHO ALAIHE WA ALEHI WASALLAM ki taraf nisbat di jaati hai to isse muraad khaas taur par HAZRAT ALI HAZRAT, SYEDA FATMA ZAHRA, HAZRAT IMAAM HASAN, HAZRAT IMAAM HUSAIN aur unki Aulaad e Pak jo AHLE BAYT ALAIHIMUS SALAM me IMAAM GUZRE hain.

WasSalamo Alaikum
talib e Shifa’at e IMAAM HUSAIN
Syed Faizan Warsi
Khanqah Warsiya Zaidiya Alviya

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s