EID UL FITR

♦♦♦♦♦♦♦♦

Hadeeṡe Nabawi :

(1) Hazrate Abu Huraira radiy-Allāhu ta’ala anhu se riwaayat hai ki
Huzoor Rasool-Allāh sallallāhu alaihi wa sallam ne farmaaya
“Ramazaan ki aakhir raat me is ummat ki bakhshish hoti hai.”
Arz kiya “Kya woh Shab e Qadr hai?”
Huzoor sallallāhu alaihi wa sallam ne farmaaya “Nahi, Kaam karne waalo ko us waqt mazdoori puri di jaati hai jab woh kaam pura kar le.”
(Musnade Ahmad)

(2) Hazrat Anas radiy-Allāhu ta’ala anhu se riwaayat hai ki
Huzoor Rasool-Allāh sallallāhu alaihi wa sallam ne farmaaya
“Jab Shab e Qadr aati hai to Hazrate Jibr’eel alaihis salaam farishto ki jama’at ke saath aate hain aur har us banda ke liye bakshish ki dua karte hai jo khade hokar ya baithkar ALLĀH ta’ala ke zikr me laga rahta hai.
Phir jab unhe Eid ka din naseeb hota hai to ALLĀH ta’ala apne un bando par apne farishto ke saamne apni khushi zaahir karta hai aur farmaata hai ki : ‘Aye mere farishto! Us mazdoor ki mazdoori kya hai jo apna kaam pura kar de?’
Farishte kehte hain ki : ‘Aye hamare Parwardigaar! Us ki mazdoori yeh hai ki us ko pura badla diya jaaye.’
ALLĀH ta’ala farmaata hai : ‘Aye mere farishto! Mere bando aur meri bandiyo ne (mere muqarrar kiye hue) farz ko ada kar diya. Ab wo gharo se dua ke liye eidgaah ki taraf nikle hain. Qasam hai apni izzat, apne jalaal, apni shaan, apni badai aur apni rif’at aur apni bakhshish wa rahmat ki, main un ki duao ko qubool karunga.’
Phir ALLĀH ta’ala farmaata hai ‘Aye mere bando! Apne gharo ko laut jaao, maine tumhe bakhsh diya aur tumhari buraiyo ko tumhari nekiyo me badal diya.’
To muslaman Eidgaah se is haal me waapas hota hai ki uske gunaah bakhsh diye jaate hai.”
(Bayhaqi, Hadeeṡ -3540)

*****************
Maahe Shawwaal ka chaand (Eid-ul-Fitr ka chaand) dekhkar ‘Soorah al-Lahab’ padhen.

بِسْمِ اللَّهِ الرَّحْمَٰنِ الرَّحِيمِ
تَبَّتْ يَدَا أَبِي لَهَبٍ وَتَبَّ
مَا أَغْنَىٰ عَنْهُ مَالُهُ وَمَا كَسَبَ
سَيَصْلَىٰ نَارًا ذَاتَ لَهَبٍ
وَامْرَأَتُهُ حَمَّالَةَ الْحَطَبِ
فِي جِيدِهَا حَبْلٌ مِنْ مَسَدٍ

Bismillāh ir-Rahmān ir-Raheem.
Tabbat yadă abee lahabinw wa tabb.
Mă agnā anhu maaluhū wan a kasab.
Sayaslā naaran zaata lahab.
Wa-mra atuhū, Hamma latal hatab.
Fee jeedihaa hablum mim masad.

Phir ye masnoon dua padhen :

ﺍﻟﻠَّﻬُﻢَّ ﺃَﻫِﻠَّﻪُ ﻋﻠَﻴْﻨَﺎ ﺑِﺎﻷَﻣْﻦِ ﻭﺍﻹِﻳﻤَﺎﻥِ ﻭَﺍﻟﺴَّﻼﻣَﺔِ ﻭﺍﻹِﺳْﻼﻡِ ، ﺭَﺑّﻲ ﻭﺭَﺑُّﻚَ ﺍﻟﻠَّﻪ ، هِلالُ رُشْدٍ وخَيْرٍ
Allāhumma ahillahu alayna bil amni wal eimaani was salaamati wal islaami Rabbi wa Rabbuk-Allāh hilaalu rushdin wa khayrin.

Tarjuma :
‾‾‾‾‾‾‾‾‾‾‾‾
Aye ALLĀH is (mahine) ko hum par amn aur eimaan aur salaamati aur islaam ke saath , Mera Rab aur tera Rab ALLĀH hai ye chaand hidaayat aur khair waala ho.
(Tirmizi, Jild -2, Hadeeṡ -1376 /Hasan)

*****************
Eid ki raat ko ‘Layltul Jaayza’ (in’aam ki raat) kaha jaata hai.
Is raat me mo’min ki duaen baargaah e ilāhi me maqbool hoti hai aur ALLĀH ta’ala bande ke liye jo behtar hai wo use ata farmaata hai.

Is raat ko zyada se zyada ibaadat aur dua me guzaaren.

Namaaze Ishaa ada karne ke baad 4 rak’at nafl namaaz 2-2 karke padhen. Har rak’at me Surah al-Faatiha ke baad 10 martaba Soorah al-Ikhlaas padhen.
Salaam pherne ke baad Durood shareef padhen aur phir kaṡrat se ‘Astaghfaar’ padhen.

2 rak’at namaaz Salaat-ush-Shukr padhen ke ALLĀH ta’ala ne Eid ka mubarak khushi ka din ata farmaaya.
Salaat-ul-Tasbeeh bhi padhen ke is ki beshumaar fazeelaten hain.
Salaat-ut-Tahajjud bhi padhen.
Apni jo namaaze chhut gai hain un ki Qaza namaazen padhen taaki bari uz zimma ho jaayen.
Kaṡrat se Durood shareef padhen.

Raat ko ba-wuzu soyen.

*****************
Eid ke din ghusl karna, miswaak karna, achhe kapde pehnna, khushboo lagaana aur musalmano ko ‘Eid Mubarak’ kehna aur khushi ka izhaar karna Sunnat hai.

Eid-ul Fitr ke din eidgaah jaane se pehle kuchh mitha khaana sunnat hai.
Huzoor Rasool-Allāh sallallāhu alaihi wa sallam Eid ke din Taaq adad me (1, 3, 5 ya 7) khajoor khaa lete aur us ke baad hi namaaz ke liye tashreef le jaate.

Eid ke din namaaz e fajr mohalle ki masjid me padhen aur Eid-ul-Fitr ki namaaz Eidgaah me ada karen.
Namaaz e eid ke liye ek raaste se jaana aur namaaz ke baad dusre raste se waapas aana aur raaste me Takbeer e Tashreeq padhte rehna Sunnat hai.

Aur juloos me aur eidgaah me bin zaroori baaten karne se bachen aur Zikr o Durood padhte rahen.

Mo’min ko chaahiye is mubarak din me zyada se zyada Ibaadat aur Neki kare
Aur Zikr o Durood padhta rahe.
Aur Khairaat kare aur Ghareebo aur haajatmando ki imdaad kare taake wo bhi behtar tareeqe se Eid mana saken.

Aur tamaam musalmano ke liye dua e khair karen, Khaas kar un ke liye jinho ne dua ke liye kaha ho aur jin ke hum par ehsaan hain aur hum se jin ke huqooq ul ibaad me galti (gunaah) ho gaye ho.

Aur jin ko takleef pahunchai hai ya jin ka dil dukhaaya hai un sab se muafi maang len aur jo jo naraaz hain unhe mana len aur jin se ta’alluq [rishta] toota hua hai un se phir se rishta jod len.

*****************
Takbeer e Tashreeq :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Allāhu akbar Allāhu akbar
Laa ilāha illallāh
Wallāhu akbar Allāhu akbar
Wa lillāhil hamd.

Tarjuma :
ALLĀH sab se bada hai, ALLĀH sab se bada hai, ALLĀH ke siwa koi ibaadat ke laa’ik nahi,
Aur ALLĀH sab se bada hai, ALLĀH sab se bada hai,
Aur ALLĀH hi ke liye tamaam ta’areef hai.

Eidgaah jaate waqt aur waapas aate waqt raaste me yeh Takbeer e Tashreeq padhte rahen.

*****************
Agar kisi ki Eid ke din ki Namaaze Fajr chhut gai ho to woh pehle Namaaze Fajr padh len aur us ke baad Eid ki namaaz padhen.
Lekin agar Eid ki namaaz ke liye jama’at ho rahi ho to pehle Eid ki namaaz padh len.

******************
Namaaz e Eid ka Tareeqa :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

Pehle Ba-wuzu Qibla ki taraf munh karke saf me khade ho jaayen aur Namaaz e Eid ki Niyyat karen :
‘Niyyat ki maine 2 Rak’at namaaz Eid-ul-Fitr ki, Waajib, 6 Zaa’id Takbeero ke saath, Waaste ALLĀH ta’ala ke, Munh mera ka’aba shareef ki taraf, Pichhe is Imaam ke.’

Niyyat ke baad jab Imaam pehli Takbeer kahen to ‘Allāhu akbar’ kehkar dono haath kaano tak uthaayen aur phir haatho ko baandh len.
Phir Ṡana (Sub’hānakallāhumm) padhen.

Jab Imaam dusri Takbeer kahen to haatho ko kaano tak uthakar chhod den.
Phir jab Imaam teesri Takbeer kahen to ‘Allāhu akbar’ kehkar haatho ko kaano tak uthakar phir chhod den.
Jab Imaam chhothi Takbeer kahe to haatho ko kaano tak uthaayen aur ‘Allāhu akbar’ kehkar phir haatho ko baandh len.

Phir Imaam saahab Soorah al-Faatiha aur Qir’at padhen wo khaamoshi ke saath sune aur phir Imaam ke saath Ruku aur Sajde karke pehli Rak’at puri karen aur dusri rak’at ke liye khade ho jaayen.

Dusri rak’at me jab Imaam saahab Soorah al-Faatiha aur Qir’at padhen wo khaamoshi ke saath sune aur phir Qir’at ke baad Ruku me jaane se pehle Imaam saahab Takbeer kahen to pehli Takbeer haatho ko kaano tak uthakar uthakar ‘Allāhu akbar’ kehkar chhod den.
Is ke baad jab Imaam saahab dusri Takbeer kahen to haatho ko kaano tak uthakar uthakar ‘Allāhu akbar’ kehkar phir chhod den.
Jab Imaam saahab teesri Takbeer kahen to haatho ko kaano tak uthakar uthakar ‘Allāhu akbar’ kehkar phir chhod den.
Jab Imaam saahab chothi Takbeer kahen to baghair haatho ko uthaaye sidhe uthakar ‘Allāhu akbar’ kehkar Ruku me chale jaayen.

Phir Imaam ke saath Ruku, Sajde aur Qa’ada karke Salaam pherkar Namaaz mukammal karen.

Namaaz ke baad khaamoshi ke saath Khutba sune.
Khutba sunna Waajib hai.

Khutbe ke baad jab Imaam saahab Dua maange to Dua me shaamil ho.

Is ke baad musalmano ko khushi ke saath Eid-ul-Fitr ki mubarakbaad dena aur saath me yeh dua bhi padhen :
تَقَبَّلَ اللّهُ مِنَّ وَ مِنْكُمْ
Taqabbal-Allāhu minna wa minkum
(ALLĀH qubool farmae meri aur tumhari jaanib se).

Aur behtar hai ke eidgaah me jaha namaaz hoti hai us jagah ko chhod den aur waha se aage aakar musaafa aur muaneka karen.

*****************
Eid ki namaaz waajib hai.
Aur us ke liye Jama’at shart hai ya’ani agar kisi ki jama’at chhut jaaye to woh tanha Eid ki namaaz nahi padh sakta.

Agar pehli rak’at me ruku ke baad ya dusri rak’at me shaamil hua to Imaam ke salaam pherne ke baad apni pehli rak’at 3 takbeero ke saath tarteeb se padhkar namaaz mukammal kare,
aur agar dusri rak’at me ruku ke baad shaamil hua to salaam pherne ke baad dono rak’at 6 takbeero ke saath tarteeb se padhen.

***************
Note :
‾‾‾‾‾
Is saal hukoomat ki taraf se Namaaze Eid ke liye jama hone ki ijaazat nahi hai. Is liye Eidgaah ya Masjid me Namaaze Eid nahi padh sakte.
Namaaze Eid Eidgaah ya Masjid me hi ada ho sakti hai. Is liye apne ghar par tanha ya ba-jama’at Namaaze Eid nahi padh sakte. Hum apne apne ghar me 2 ya 4 rak’at namaaz Salaat-ush-Shukr padh sakte hain aur saath me 2 ya 4 rak’at namaaz (2-2 karke) Salaat-ul-Chaasht padh sakte hain.

***************
Eid-ul-Fitr ke din ki chand khaas ibaadat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
♦ Eid-ul-Fitr ke din Namaaz e Zohar ada karne ke baad 8 rak’at nafl namaaz 2-2 karke padhen. Har rak’at me Surah al-Faatiha ke baad Surah al-Ikhlaas 25 martaba padhen.
Namaaz k baad 70 baar Sub’hān Allāh, 70 baar Astaghfirullāh aur 70 baar Durood shareef padhen.
Phir apne liye aur tamaam ummat e Mustafa ke liye Dua e khair karen.

♦ Eid ke din 300 martaba ‘Sub’hān Allāhi wa bihamdi’ padhkar tamaam musalmano ko isaal e ṡawaab karen. In shaa Allāh ALLĀH ta’ala qabr me noor ata farmaega.
(Mukashafat ul Quloob, Safa -650)

▪▪► Jin ki namaazen Qaza ho gai hain wo pehle jitni mumkin ho utni Qaza namaaz padhen taake bari-uz-zimma ho jaayen.
Aur tauba karke ye pakka ahad karen ke aa’inda sab namaaz waqt par ada karne ki koshish karenge aur namaaz ke foyuz o barkaat haasil karte rahenge.
Nafl namaaz ka pura ṡawaab usi ko milta hai jo Farz namaaz waqt par ada karta hai aur pehle un namaazo ki qaza padh leta hai jo chhut gai hai.

5 waqt ki Qaza namaaz me Rak’at ki ta’adaad :
Fajr ki 2 Farz, Zohar ki 4 Farz, Asr ki 4 Farz, Maghrib ki 3 Farz, Ishaa ki 4 Farz, Witr 3.

*****************
Mayassar ho to Qabrastan aur Buzurgaane deen ke mazaaraat par haazir hokar sahi tareeqe se Due e maghfirat aur Isaale ṡawaab karen. Apne ghar par bhi marhoomeen ke liye Due e maghfirat aur Namaaz, Tilaawate Qur’ān, Zikr o azkaar aur Durood shareef padhkar aur Sadqa-khairaat aur nyaaz karke Isaale ṡawaab kar sakte hain.

*****************
♦ Sadqa e Fitr har Musalman, Aazaad, Maalik e nisaab par (jis ki nisaab haajat e asliya ke ilaawa ho) Waajib hai.
Sadqa e Fitr ke liye Roza rakhna ya Taraweeh padhna shart nahi. Agar kisi ne Roza na rakha ho ya Taraweeh na padhi ho tab bhi Sadqa e Fitr ada karna hoga.
Eid se pehle Sadqa e Fitr ada kar dena Sunnat hai.
Is liye agar Sadqa e Fitr dena baaqi ho to jald se jald ada karo aur ALLĀH ke bando ki madad karke Rab ta’ala ko raazi karo.

Aashiqaane Mustafa se guzarish hai ki
Is link ko open karke Post padhen aur Share karen.

*****************
ALLĀH ta’ala us ke Habeeb sallallāhu alaihi wa sallam ke sadqe me
Sab ko mukammal ishqe Rasool ata farmae aur in baato ko yaad rakhkar us par amal karne ki aur dusro ko batane ki taufiq ata farmae.
Aur Eid-ul Fitr me sahi tareeqe se zyada ibaadat karne ki aur is ke foyuz o barkaat haasil karne ki taufiq ata farmae aur hamare Roza, Namaaz, Zakaat, Sadqa, Tilawaat e Qur’an aur tamaam nek amal qubool farmae aur Sab ko dunya aur aakhirat me bhalai ata farmae aur Sab ki nek jaa’iz muraado ko puri farmae.
Aur Islaam ka bolbala ata farmae.
Aameen.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s