Hazrat Uzair (alaihis’salaam) aur Khuda Ki Qudrat Ke Karishme

img_20210524_1536393489993405206500703.jpgBani-israel jab Allah ki nafarmani mein had se zyada badh gaye.

To Allah ne un par ek zaalim Baadshah Bakht-Nasr ko un par musallat kar diya.

Us ne Bani-israel ko Qatl kiya, giraftaar kiya aur tabaah kiya,
aur Bait-ul-Muqaddas ko Barbaad aur veeran kar daala.

Hazrat Uzair (alaihis’salaam) ek din shaher mein tashreef laaye to Aap ne shaher ki veeraani aur barbaadi ko dekha, poore shaher mein ghoome, kisi shakhs ko waha na paaya, shaher ki saaris buildings ko gira hua dekha..

Ye manzar dekh kar Aap ne taajjub se kaha “ya Allah is shaher ki maut ke baad isy fir kaise zinda farmayega?”

Aap ek jaanwar par sawar thy, aur Aap ke paas ek bartan khajur aur ek pyala angur ke juice ka tha,

Aap ne apne jaanwar ko ek ped (tree) se baandha, aur usi ped ke neeche Aap so gaye.

Jab so gaye, to Allah Taala ne usi haalat mein Aap ki rooh Qabz kar li,
Aur unka jaanwar bhi mar gaya.

Is waqeya ke 70 saal baad Allah Taala ne Shahaan-e-faaras mein se ek Baadshah ko musallat kiya.

Wo apni fauj le kar Bait-ul-Muqaddas pahuncha,
Aur Bait-ul-Muqaddas ko pehle se bhi behtar aur achcha tareeke par aabaad kiya.
Aur Bani-israel mein se Jo log baaki rahe thy, Allah Taala fir unhe yaha laaya. Aur wo log Bait-ul-Muqaddas ke aas paas aabaad ho gaye. Aur unki tadaad (population) badhti rahi.

itne zamaane (period) mein Allah Taala ne Uzair (alaihis’salaam) ko duniya ki nazron se ojhal rakha, aur koi Aap ko dekh na saka.

Jab Hazrat Uzair (alaihis’salaam) ki wafaat ko 100 saal guzar gaye, to Allah Taala ne dobara Aap ko zinda kiya,

Pehle aankhon mein jaan aayi, abhi tamaam jism murda tha, wo Aap ke dekhte hi dekhte zinda kiya gaya.

Jis waqt Aap soye thy wo subha ka waqt tha,

Aur 100 saal baad jab Aap dobara zinda kiye gaye to ye shaam ka waqt tha,

Allah Taala ne farmaya “Aye Uzair ! Tum Yaha Kitna Thehry?”

Uzair (alaihis’salaam) ne andaaze se arz kiya “ek din ya kuch kam”
(Uzair alaihis’salaam ko khayaal hua ki ye usi din ki shaam hai jis ki subha Aap soye thy)

Allah Taala ne farmaya “Balki Tum to 100 Baras Thehry Ho, Apne Khane Aur Paani (yaani khajur aur angur ke juice) Ko Dekhiye Ki Waisa (taaza) Hi Hai, Us mein Bu (smell) Tak Nahi Aayi, Aur Apne Jaanwar Ko Bhi Zara Dekhiye”

Uzair (alaihis’salaam) ne dekha to wo mara hua gal chuka tha, uski sirf haddiyan hi bachi thi.

Aap ki aankhon ke saamne hi Allah Taala ne us jaanwar Ko bhi zinda farmaya.

Pehle uske jism ke ajzaa apni apni jagah par aaye,
Haddiyon par gosht aaya,
Gosht par khaal (skin) aayi,
Khaal par baal aaye,
Fir uske jism mein rooh aayi, aur Aap ke dekhte hi dekhte wo uth khada hua aur aawaz karne laga.

Aap ne Allah ki Qudrat ka mushahda kiya aur kaha “Main jaanta hu ki Allah har cheez par Qaadir hai”

Fir Aap apni sawaari par sawaar huye aur Apne mohalle mein tashreef laaye.

Waha Aapko koi pehchaanta na tha,

Aap andaaze se apne makaan par pahunche, Umar Aap ki wahi 40 saal thi,

Waha Aap ko ek bahot budhi aurat mili jiske pair kaam nahi karte thy aur uski aankhon ki roshni bhi Khatm ho gayi thi.

Wo Uzair (alaihis’salaam) ke ghar ki baandi (servant) thi,

Aap uske paas gaye aur usse poocha “Ye Uzair Ka Makaan Hai?”

Budhi aurat ne kaha “haa ! magar Uzair ko gum huye 100 baras ho gaye” ye keh kar wo khoob royi.

Uzair (alaihis’salaam) ne usse farmaya “Allah Taala ne mujhe 100 saal murda rakha aur fir zinda kiya”

Budhi aurat ne kaha “Uzair mustajaab-ut-daawaat thy, Jo dua karte thy Qubul hoti thi, agar Aap sach mein Uzair hain to Dua kijiye ki meri aankhen theek ho jaayen, taaki main apni aankhon se Aap ko dekhu”

Uzair (alaihis’salaam) ne Dua ki to uski aankhen theek ho gayi,

Fir Aap ne uska haath pakad kar farmaya “Khuda ke Hukm se uth”
Ye farmate hi uske pair bhi theek ho gaye,

Usne Aap ko dekh kar pehchana aur kaha “main gawaahi deti hu ki be-shak Aap Uzair hi hain”

Fir wo Aap ko muhalle me le gayi,
Waha Aap ke farzind thy jinki umar 118 saal ki ho chuki thi,
Aur Aap ke pote bhi thy Jo boodhe ho chuke thy,

Budhiya ne pukaar kar kaha “Ye Hazrat Uzair Tashreef Laaye Hain”

Logo ne is baat jhutlaaya,

Budhiya ne kaha “mujhe dekho, main Uzair alaihis’salaam ki dua se bilkul sehatmand ho gayi aur meri aankhen bhi theek ho gayi”

Log Aap ke paas aaye, aur Aap ke farzind ne kaha “mere waalid ke shaano ke darmiyaan syaah baalon ka ek hilaal tha”

Jism Mubarak dekha gaya to wo maujood tha.

. . . . . . . . . . . . . . . .
Tafseer Khazaain-ul-irfaan..
Surah Baqra. (aayat 259)..
. . . . . . . . . . . . . . . .

. . . . . . . . . . . . . . . .
Sachchi Hikayaat
Hikaayat No.60
. . . . . . . . . . . . . . . .

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s