Yaum-un-Nahar

21167671_1115379245263265_3151377114103515067_o

Yaum-un-Nahar :

 10 Zil Hijjah ka din ‘Yaum un Nahar’ kehlaata hai.

 Tamaam Haaji Muzdalifah me raat guzaarne ke baad waapas Mina tashreef laaye hain.

Aaj Mina me un ko tarteeb se 4 Arkaan ada karne hain :
(1) Rami e Jimaar. [Waajib]
(2) Qurbani karna. [Waajib]
(3) Halaq ya Taqseer karana (ya’ni Sar mundwaana ya Baal katrwana). [Waajib]
(4) Tawaaf e Ziyarat. [Farz]

 Sab se pehle Rami e Jimaar ke liye jaayenge.
Aaj sirf Jamrat ul Uqaba (Bada shaitaan) ko 7 kankariya maarni hai.
Is ka waqt Tulu aaftaab se lekar Zawaal tak Sunnat hai aur Zawaal se Ghuroob e aaftab tak Mustahab hai.
Jamrah ke saamne khade hokar Muzdalifah se jo kankariya laayen hain un me se ek ek karke 7 kankariya ‘Bismillāh Allāhu akbar’ kehkar shaitaan ko maaren.
Jo kankariya ALLĀH ta’ala ki baargaah me maqbool hoti hain wo utha li jaati hain.

 Us ke baad jaanwar ki Qurbaani karni hai.
Hajj e Tamattu ya Hajj e Qiraan karne waale par Qurbaani Waajib hai aur Hajj e Ifraad karne wale ke liye Mustahab hai.
Ye Qurbanai Hajj ke shukraane ki hai, Eid-ul Ad’ha ki nahi.
Qurbaani hudood e Haram me hi karni hogi.
Bade jaanwar me 7 Haji milkar Qurbaani kar sakte hain.
Mumkin ho to khud apne haath se Zibah karen warna kisi aur se qurbani karayen to waha haazir rahen.

 Is ke baad Halaq ya Taqseer karna hai.
Mard ke liye afzal hai ke sar ke tamam baal mundwaye ya chothai sar ke baal ek pore ke barabar katwaye. Aur aurten chothai sar ke baal ungli ke pore ke barabar ya is se zyada katarwaye. Khud kaate ya mahram se katwaye.
Halaq ya Taqseer hudood e Haram me hi karna hoga.

 Is ke baad Ghusl karke sile hue kapde pehan len.
Halaq ya Taqseer ke baad Ehraam ki dusri paabandiya khatm ho jaati hai. Magar sirf Tawaaf e Ziyarat ke baad shohar ke liye biwi halaal hogi.

 Is ke baad Masjid e Haram jaakar Tawaaf e Ziyarat karna hai.
Tawaaf e Ziyarat Hajj ka dusra Farz Rookn hai aur is ko ada karne ke baad hi Ehraam ki tamaam paabandiya khatm hogi.
Is me pehle 3 chakkar me Ramal karna (ya’ni shaan ke saath akad kar kandhe hilaate hue thoda tez chalna) Sunnat hai.
Tawaaf ke baad Maqaam e Ibrāheem par 2 rak’at namaaz e Waajib-ut-Tawaaf padhni hai.
Is ke baad Multazam (Hajr e Aswad aur baab ul Ka’aba ke darmiyaan ka hissa) par haazir hona hai.
Is ke baad aabe Zamzam peena hai.
Is ke baad Safa aur Marwa ke darmiyaan Saee karni hai.

*****************
ALLAH ta’ala us ke Habeeb sallallahu alaihi wa sallam ke sadqe me
Tamaam Haajiyo ke Arkaan ko aasaan farmaaye aur un ki hifaazat farmae aur un ke Hajj ko qubool farmae aur un ki Duao ko qubool farmae.
Sab mo’mino ko ye sa’adat ata farmae.
Aameen.

Ayaam e Tashreeq :

 11, 12 aur 13 Zil Hijjah ke din Ayaam e Tashreeq kehlate hain.

 11 aur 12 Zil Hijjah ko tamaam Haji Mina me Hajj qayaam karke Zawaal ke baad Rami e Jimaar ke liye jaayenge.
Aaj teeno shaitaano ko tarteeb se ‘Bismillah Allahu akbar’ kehkar 7-7 kankariya maarni hai, Pehle chhote shaitaan ko (Jamratul ula), phir bich wale shaitaan ko (Jamratul wusta) aur aakhir me bade shaitaan ko (Jamratul uqaba).
Aurten, budhe, beemar aur kamzor Subah saadiq ke baad bhi Rami kar sakte hain ke Zawaal ke baad bheed ki wajah se unhe takleef ka andesha rehta hai.

Rami ke baad agar Mina waapas na jaana ho to wahi se Makka laut aayen.
Aur agar 13wi ko Rami karni ho to Mina waapas jaayen.

 Agar 10wi ko Qurbani aur Halaq ya takseer kar liya hai to Ehraam ki paabadniya khatm ho gai hai aur Tawaaf e Ziyarat bhi kar liya hai to tamaam paabandiya khatm ho gai hai.

Agar 10wi ko Qurbani nahi ki hai to 11wi ko ya 12wi ko Qurbani karni hai.
12wi ke guroob e aaftab se pehle Qurbani karke Halaq ya takseer karke Gusl karke Ehraam utarna hai aur phir Tawaaf e Ziyarat ada karna hai.
Qurbani ka waqt 12wi ke guroobe aaftab tak hi hai.

 Aur agar 13wi ko Rami ke liye rookna hai to aaj ki raat Mina me qayaam karna hai jise ‘Mabeet’ kehte hain.

*****************
ALLAH ta’ala ke Habeeb sallallahu alaihi wa sallam ke sadqe me
Tamaam Haajiyo ke Hajj ko qubool farmae aur un ki Duao ko qubool farmae.
Sab mo’mino ko ye sa’adat ata farmae.
Aameen.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s