Hazrat Abu Talib RadiyAllahu Ta’ala Anhu Sahib-E-Iman Rawi-E-Hadith

Hazrat Abu Talib RadiyAllahu Ta’ala Anhu Sahib-E-Iman Rawi-E-Hadith

“Hazrat Abu Talib RadiyAllahu Ta’ala Anhu Ne RasoolAllah SallAllahu Ta’ala Alayhi Wa Aalihi Wa Sallam Kee Kuchh Aisi Ahadith Bhi Bayan Kaerte Hain Jin Ke Kalimaat Is Amr Par Dalaalat Karte Hain Woh Sahib-E-Iman They Aur Un Ka Dil Tauhid-E-Khudawandi Se Labarez Tha.”

Pehli Hadith

“Hazrat Abu Talib RadiyAllahu Ta’ala Anhu Kee Bayaan Kardah Riwayat Me Se Aik Ye Hai Jise Khatib Baghdadi Ne Apni Isnaad Ke Saath Bayaan Kiya Hai.

Imam Ja’far Sadiq, Imam Baqir, Imam Zayn-ul-Aabidin, Imam Husain, Imam-ul-Muslimin Hazrat Ali Alayhim-us-Salato Was Salam,

Hazrat Ali KarramAllahu Ta’ala Waj’hah-ul-Karim Farmate Hain Ki Mein Ne Apne Waalid-E-Giraami Hazrat Abu Talib RadiyAllahu Ta’ala Anhu Ko Yeh Farmate Huwe Suna Ki Mujh Se Mere Bhaai Ke Bete Hazrat Muhammad SallAllahu Ta’ala Alayhi Wa Aalihi Wa Sallam Ne Hadith Bayan Farmaayi Aur Khuda Kee Qasam Woh Yaqinan Sachche Hain.

Kyun Ki Jab Mein Ne Aap Se Puchha ! Ya Muhammad SallAllahu Ta’ala Alayhi Wa Aalihi Wa Sallam Aap Kis Chiz Ke Saath Mab’oos Farmaye Gaye Hain To Aap Ne Farmaya : Silah Rahmi Aur Ada-E-Namaz Wa Zakaat Ke Liye.
Aur Namaz Se Murad Us Waqt Fazar Aur Asar Kee Do Do Rak’atein Thi Kyun Ki Awa’il-E-Islam (Aaghaaz-E-Islam)  Me Yahi Do Namazein Thi Ya Phir Namaz-E-Tahajjud Thi Jis Par RasoolAllah SallAllahu Ta’ala Alayhi Wa Aalihi Wa Sallam Ka Be’asat Mubarak Se Pehle Bhi Amal Tha, Aur Un Ko Namaz-E-Panjagana Par Mahmool Karna Durust Nahin, Kyun Ki Namaz-E-Panjagana Hazrat Abu Talib RadiyAllahu Ta’ala Anhu Kee Wafaat Ke Dedh Saal Baad Mearaaj Kee Raat Farz Huwi Kyun Ki  Hazrat Abu Talib RadiyAllahu Ta’ala Anhu Ka Wisaal Be’asat Mubarak Ke Dasawein Saal Sawwal-ul-Mukarram Me Huwa.

Aur Zakat Se Muraad Us Waqt Mutlaq Sadqah Mehmaan Ka Ikraam Karna Tha Aur Maal Wagairah Me Se Har Qism Ke Sadaqaat Ko Bhi Zakaat Par Hee Mahmool Kiya Jaata Tha Aur Ma’roof Zakaat-E-Shar’iyyah Aur Fitaraanah Wagairah Sab Ke Sab Hijrat Mubarak Ke Baad Madinah Munawwaarah Me Hazrat Abu Talib RadiyAllahu Ta’ala Anhu Ke Wisaal Mubaarak Ke Baad Farz Huwi.”

Dusari Hadith

“Aur Aise Hee Khatib Baghdadi Rahmat-ul-Allahi Ta’ala Alayh Hazrat Aboo Rafe’ RadiyAllahu Ta’ala Anhu Se Jo Ki Hazrat Umm-E-Haani Binte Hazrat Abu Talib RadiyAllahu Ta’ala Anhu Ke Ghulaam They Riwayat Naqal Karte Hain Ki Mein Ne Hazrat Abu Talib Se Yeh Hadith Suni Aap Farmate They Ki Mujh Se Muhammad Bin Akhiy SallAllahu Ta’ala Alayhi Wa Aalihi Wa Sallam Ne Hadith Bayan Farmayi !

Ki Mujhe Allah Tabarak Wa Ta’ala Jalla Majdah-ul-Karim Ne Hukam Farmaya Ki Mein Logon Tak Us Ka Yeh Hukm Pahunchaawun Ki Silah Rahmi Karu Aur Allah Ta’ala Kee Ibaadat Karu, Aur Is Ke Saath Kisi Dusare Ko Shariq Na Karu Aur Muhammad SallAllahu Ta’ala Alayhi Wa Aalihi Wa Sallam Mere Najdik Sachche Aur Amin Hain.”
 

Tisari Hadith

Aur Aise Hee Hazrat Abu Talib RadiyAllahu Ta’ala Anhu Ka Irsahaad Hain Ki Mein Ne Apane Ibn Akhiy SallAllahu Ta’ala Alayhi Wa Aalihi Wa Sallam Ko Yeh Farmate Huwe Suna Ki Shukr Karo Kyun Ki Is Se Rizq Me Faraawaani (Ziyaadati) Hogi Aur Kufr Na Karo Us Se Musibat Me Mubtila Ho Jaawonge.”

Chauthi Hadith

Ibn Sa’ad, Khatib Baghdad, Ibn Asakir Hazrat Amru Bin Saeed RadiyAllahu Ta’ala Anhu Se Woh Hazrat Abu Talib RadiyAllahu Ta’ala Anhu Se Riwayat Bayan Karte Hain Ki Mein Apne Ibn Akhiy SallAllahu Ta’ala Alayhi Wa Aalihi Wa Sallam Ke Saath Waadi-E-Zil Majaz Me Tha Mujhe Shadid Pyaas Mahsoos Huwi Aur Mein Ne Apni Pyaas Kee Shikaayat Huzoor Risaalat Ma’ab SallAllahu Ta’ala Alayhi Wa Aalihi Wa Sallam Se Kee Haala’n Ki Waha’n Kahin Paani Ka Nishaan Tak Nahin Tha.

Magar Aap SallAllahu Ta’ala Alayhi Wa Aalihi Wa Sallam Ne Zameen Par Aydi Dabaate Huwe Waha’n Paani Ka Chashmah Phoot Nikala Aur Aap Ne Mujhe Farmaaya ! Chchaa Jaan Paani Pee Lijiye, Chuncanchi Mein Ne Khoob Sheyr Ho Kar Paani Piya.”

Muhammad Bin Rasool Barzakhi Ka Tabsirah

“Yeh Hadith Naqal Farmane Ke Baad Qaazi Dahlan Makki Alayh-ir-Rahmah Farmate Hain KiJanab-E-Muhammad Bin Rasool Barzakhi Alayh-ir-Rahmah Is Maqam Par Farmate Hain Ki Bagair Ahl-E-Tauhid Ke Allah Tabarak Wa Ta’ala Is Qism Ka Muqaddas Paani Kisi Ke Nasib Nahin Karta Kyun Ki Huzoor Risaalat Ma’ab SallAllahu Ta’ala Alayhi Wa Aalihi Wa Sallam Kee Aydi Mubarak Kee Ragad Se Zameen Se BarAamad Hone Waala  Paani Aab-E-Kawthar Aur Aab-E-Zam Zam Se Bahar Soorat Afzal-O-Aala Hai.”

Alaawa Azy’n Imam Barzakhi Alayh-ir-Rahmah Mazid Farmate Hain Ki Jis Shakhs Ke Saamne Is Qism Ke Muajizaat Zaahir Ho’n Us Ke Dil Me Un Kee Tasdiq Kaise Wuqooa Pazir Nahin Hogi Aur BeShak Qara’in-E-Kathirah Un Kee Tasdiq Par Dalaalat Karte Hain.

 

Paanchwin Hadith

Aur Ibn Adi Hazrat Anas RadiyAllahu Ta’ala Anhu Se Riwayat Karet Hain Ki Aik Dafa Hazrat Abu Talib RadiyAllahu Ta’ala Anhu Bimaar Ho Gaye To Sarkar-E-Do Aalam SallAllahu Ta’ala Alayhi Wa Aalihi Wa Sallam Aap Kee Iyaadat Ke Liye Tashrif Le Gaye To Janab-E-Abu Talib RadiyAllahu Ta’ala Anhu Ne Bargah-E-Risalat Ma’ab SallAllahu Ta’ala Alayhi Wa Aalihi Wa Sallam Mein Araz Kee Aye Ibn Akhiy Allah Tabarak Wa Ta’ala Se Meri Seht Ke Liye Duaa Farmaayein.

Chunaanchi Huzoor Sarwar-E-Qaynat SallAllahu Ta’ala Alayhi Wa Aalihi Wa Sallam Ne Bargah-E-Rabb-ul-Izzat Me Duaa Kee Ki Elaahi Mere Chacha Jaan Ko Sehhat Wa Aafiyat Ata’ Farma, Usi Waqt Hazrat Abu Talib RadiyAllahu Ta’ala Anhu Usi Tarah Sehhatyaab Ho Gaye Jaise Bimaari Ka Shikanjah Toot Gaya Ho.

Hafiz Aboo Nu’aym “Dala’il-un-Nubuwwah” Me Abi Bakar Bin Abd-ul-Allah Bin Jahim Ke Tariq Se Bayan Karte Hain Ki Woh Apne Baap Se Aur Woh Apne Daada Se Riwayat Naqal Karte Hain Ki Mein Ne Hazrat Abu Talib RadiyAllahu Ta’ala Anhu Yeh Hadith Suni.

Roshan Mushahide

“Aap Ne Farmaya Ki Mere Walid-E-Mohtarm Hazrat Abd-ul-Muttalib Ne Mujh Se Hadith Bayan Farmayi Ki Mein Ne Khwaab Me Dekha Ki Meri Pusht Se Aik Darakht Paida Huwa Jis Kee Bulandi Aasmaan Ko Chhu Rahi Thi Aur Us Kee Shaakhon  Ne Mshriq Wa Maghrib Ka Ihaatah Kar Rakha Tha. Aur Farmaaya Ki Mein Ne Aik Aisa Chamakta Huwa Noor Dekha Ki Agar Sattar Aaftaab Bhi Aik Waqt Tuloo’ Ho;n To Yeh Roshani Un Par Ghaalib Rahti. Aur Woh Us Ke Saamne Mad’ham Rahte.”

Aur Mein Ne Dekha Ki Us Noor Ke Huzoor Me Arab Wa Ajam Ke Log Sajdah Reyz Hain, Aur Us Darakht Kee Bulandi Aur Roshani Me Har Lamha Izaafah Ho Raha Hai Aur Yeh Noor Aik Lamhah Poshidah Rahne Ke Baad Do Baara Zaahir Ho Jaata Hai. Aur Mein Ne Quraysh Ke Aik Giroh Ko Us Kee Shakhon Se Latakte Huwe Dekha Aur Kuchh Logo’n Ko Us Ke Kaatne Ke Dar Pe Paaya, Magar Jab Woh Qareeb Aayein To Unhein Aik Naujawan Ne Pakad Liya, Jo Aik Paykar-E-Husn-O- Jamaal Aur Khoobsoorattareen Jawaan Hai, Jis Ke Rukh-E-Anwar Kee Misl Mein Ne Kabhi Koi Hasin Nahin Dekha. Aur Na Hee Mein Ne Kabhi Koi Aisi Khooshbu’n Sunghi Hai Jo Us Ke Jism-E-Mushkbar Se Phoot Rahi Thi.

Phir Mein Ne Dekha Ki Is Khoobroo Naujawaan Ne Un Logon Kee Pushtein Tod Dee Aur Aankhein Phod Dee Jo Is Darakht Ko Kaatana Chaahti They. Baad Az Aa’n Mein Ne Us Darakht Kee Taraf Haath Badha Kar Apana Hissa Lena Chaaha Magar Kaamyaab Na Huwa. Phir Mein Ne Puchha Ki Yeh Kis Ka Hissa Hai ?

To Logo’n Ne Bataaya Ki Yeh Unhin Logo’n Ka Hissa Hai Jo Is Darakht Ke Saath Latke Huwe Hain. Mein Ne Yeh Khwaab Dekha To Khawfzadah Ho Kar Bedaar Ho Gaya. Aur Qurayshi Kahinah Se Yeh Tamam Maajara Bayaan Kiya To Us Kaahina Ka Chehra Mutaghiyyar Ho Gaya Aur Us Ne Kaha Ki Agar Mein Aap Ko Khwaab Kee Tasdiq Karu To Aap Kee Pusht-E-Anwar Se Aik Aysa Shakhs Paida Hoga Jo Mashriq Wa Maghrib Ka Maalik Hoga. Aur Log Us Kee Ita’at Karege Phir Jab Huzoor SallAllahu Ta’ala Alayhi Wa Aalihi Wa Sallam Duniya Me Tshrif  Le Aaye To Hazrat Abd-ul-Muttalib RadiyAllahu Ta’ala Anhu Ne Hazrat Abu Talib RadiyAllahu Ta’ala Anhu Ko Farmaya Shaayad Yahi Woh Mawlood Hai.”

Saatawin Hadith

“Aksar Taur Par Hazrat Abu Talib RadiyAllahu Ta’ala Anhu Yeh Hadith Bayan Farmaya Karte They Aur Jab Huzoor Risalat Ma’ab SallAllahu Ta’ala Alayhi Wa Aalihi Wa Sallam Kee Be’asat Mubarakah Huwi To Hazrat Abu Talib RadiyAllahu Ta’ala Anhu Farmate : Khuda Kee Qasam Yahi Woh Shajar-E-Noor Aboo’l Qaasim Aur Amin Hai.”

[Asna-ul-Matalib Fi Nijat-E-Abi Talib,/53 Taa 60,

Tabqat Ibn Sa’ad, 01/32,

Uyoon-ul-Matalbi Fi Isbat-E-Iman-E-Abi Talib, 01/244.]