Hazrat Taaj-ud-deen Hindi radiy-Allāhu ta’ala anhu

51032904_1496986210435898_2672494853920653312_n
Aap sab se pehle Hindustani muslim hain.

Aap ka asl naam Raaja Rama Varma Kulashekhara tha. Aap Malabar [Kerala] ke Raaja the aur ‘Cheraman Perumal’ naam se mash’hoor the.
Ek martaba Aap ne apne mahel ki chhat par chaand ke do tukde hote hue aur phir un dono tukdo ko judte hue dekha.

Jab 7 Hijri (629 A.D.) me Huzoor sallallāhu alaihi wa sallam farmaan par Hazrat Maalik bin Deenaar radiy-Allāhu ta’ala anhu apne saathiyo ke saath kashti me safar karte hue Taqipatanam (Madurakkara) aaye.

Jab Kodungallur (Kerala) me Aap ki mulaaqaat Hazrat Maalik bin Deenaar radiy-Allāhu ta’ala anhu se hui to aur un se us Moaziza e Rasool ki haqeeqat pata chali ke Hazrat Muhammad ibne Abdullāh sallallāhu alaihi wa sallam ne elaan e nabuwwat kiya hai aur kaafiro ne aap se mo’azeeza talab kiya to Huzoor sallallāhu alaihi wa sallam ne Jable Abu Qubais par khade hokar ungli ke ishaare se chand ke do tukde kiye aur phir un ko jod diya.
Hazrat Maalik bin Deenaar ki daawat par Aap musalman hue.

Aap ne Hindustan me sab se pehli masjid banai, jo ‘Cheraman Jumaa Masjid’ ke naam se mash’hoor hai.

****************
Kuchh waqt baad Aap Madeena munawwara tashreef le gaye aur Huzoor Rasool-Allāh sallallāhu alaihi wa sallam ki baargaah me haazir hue aur adrak ke Achaar ka hadiya pesh kiya. Huzoor sallallāhu alaihi wa sallam ne sab ashaaba me us ka ek ek tukda taqseem kar diya.
Huzoor Rasool-Allāh sallallāhu alaihi wa sallam ne Aap ko ‘Taaj-ud-deen Hindi’ naam ata farmaaya.
Madeena munawwara me kuchh roz qayaam ke baad Aap Shaher Muqalla pahunche. Waha se Hajj ke liye tashreef le gaye.

****************
Waapas aate waqt Oman me maqaame Zafar par Aap beemaar hue aur Aap ka wisaal hua.

Aap ka mazaar Al-Baleed, Salalah (Oman) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Taaj-ud-deen Hindi radiy-Allāhu ta’ala anhu aur tamaam Auliya Allāh aur Ashaaba ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.