Hazrat Syed waris shah r.a

Hazrat Syed Waris Hasan r.a ki khandani tareekh – (Ba hawala kitab Ansabul Ashraaf)

:- Sultan Shamsuddin Altamash ke ahde hukumat mein Hazrat Shah Waris Hasan r.a ke Jadd e Amjad Hazrat Salaar Shahabuddin deegar buzurgo.n ke humrah Hindustan Aaye.n San 626 hijri mein sultan ke humrah bangal ki muhim par rawana hue lekin mauza baram Sala mein na maloom wajuhaat ke bina par sultan se alaihdgi akhtiyar Kar ke wahi.n sukunat akhtiyar ki sultan ne yahi mauza wa deegar mawazaat unhe ata kiye baad mein uss mauza ka naam sultanpur huwa, yaha.n Salaar Shahabuddin r.a ki chaar pushto.n ne qayam kiya, nawi sadi hijri awwal nisf mein baaghi raja roman dev ne khiraj ki adaigi se inkaar kiya to kada ke soobedaar ne athewaan par taakht ki aur raja ko qatl Kar ke qila tameer karaya aur shurfa e sultanpur ko iss maqaam par laakar abaad kiya iss nau abaadi ka naam Fatehpur rakha gaya. Iss tarah salaar Shahabuddin saani ke poote Salaar raja Ahmad ne sultanpur ki aqamat tark Kar ke Fatehpur ki sakunat akhtiyar ki. Fatehpur mein iss khanwade ki aamad ki sahi tareekh ka andaza nahi kiya ja sakta lekin qayas ye hai ki San 804 hijri aur 857 hijri ke darmiyan Aaya.

Hazrat Makhdoom Qutubuddin Salaar badh rahmatullah alaih Hazrat Salaar Shahabuddin saani ke poote aur hazrat Haibatullah ke sahabzaade hai’n San 865 hijri mein Fatehpur mein paida huwe. Aap bachpan se he zaheen the Fatehpur mein maktab ki ibtedai taleem ke baad jaunpur ka qasd kiya inn dino jaunpur markaz e ilm wa hikmat tha. Hazrat ne Shaikh Shamsul huq huqqani r.a se sharf e talammuz hasil kiya jin ka shumar jayyad ulema wa asatzah mein hota tha. Iss Aali nasab sufi aur huq go ustaad ki nigrani mein taleem wa tarbiyat ki takmeel hui.
Uloom zahiri se sanad faraagh haasil karne ke baad uloom baatni ke husool ke liye Hazrat Shaikh Bahauddin Jaunpuri se ruju farmaya. Shaikh mausoof silsila e chishtiya nizamiya ke alawa suharwardiya wa shattariya ke bhi majaaz the.n Shaikh ki bahjamiyat Hazrat rahmatullah alaih ke liye nihayat purkashish thi.
Jab murshid ne khalafat se sarfaraz kiya to hazrat fatehpur wapas tashreef laaye.n yaha.n Hazrat Shaikh Nizamuddin Fatehpuri ke sahabzade Shaikh Qutubuddin r.a se aapko silsila e chishtiya suharwardiya ki khalafat wa ijazat hasil hui Fatehpur se Manikpur tashreef le gaye.n yaha.n makdoomzada Syed Raje Noor r.a ne khalafat se sarfaraz farmaya aur apna musalla tabarruqan ata kiya Shaikh taajan bahloli aur Shaikh khasah amethvi se bhi khalafat wa ijazat haasil hui.
Fatehpur se hazrat rahmatullah alaih kodeh ka qasd kiya aur baqiya zindagi usi sarzami.n par dars wa tadrees mein basar farmai 41 saal musalsal kodeh mein shama rushdo hidayat raushan rakhne ke baad chaar shamba 27 rabiy ul awwal san 946 hijri wisal farmaya.

:-Hazrat Makhdoom Qutubuddin Salaar Badh rahmatullah alaih Sadaat e Jafri the.n aur aapka nasab nama iss tarah bayan kiya gaya hai.

Hazrat Qutubuddin Salaar badh
ibn
Salaar Haibatullah
ibn
Salaar Raziuddin urf raajan
ibn
Shahabuddin saani
ibn
Shah Haibatullah
ibn
khwajgi Salaar hasan
ibn
Salaar Shahabuddin romi
ibn
Eimaduddin
ibn
Najmuddin
ibn
Shamsuddin
ibn
Shahabuddin
ibn
Eimaduddin
ibn
Raziuddin
ibn
Abdul kareem
ibn
Jaafar
ibn
Humza
ibn
Muhammad kaazim
ibn
Muhammad taqi
ibn
Hasan
ibn
Muhammad
ibn
Ali
ibn
Hazrat Imam Jafar Sadiq Alaihissalam.

Hazrat Salaar Badh r.a ke teen Sahabzade hue sab se bade Hazrat Shah Bahauddin manjhle Hazrat Shah Muhammad Alauddin Aur sab se chote Hazrat Shah Jamaluddin the.n. Sab se bade sahabzade Hazrat Shah Bahauddin r.a ke nasl mein Shah Hameeduddin, Shah Jamal Auliya, Shah Mubarak, Shah Muhammad Hashim, Shah Abu Saeed, Shah Abul Ma’aali, Shah Abu najeeb, nihayat naamwar mutqadimeen buzurg hai.n Phir isi khanwade mein Hakeem Zainul Aabideen, Hakeem Syed Nusrat Husain Aseer maalta aur Hazrat Shah Waris Hasan r.a (Teele waali masjid Lucknow) mash’hoor buzurg guzre hai.n

Hazrat Shah Waris Hasan r.a ka Shajra e nasab Hazrat Makhdoom Qutubuddin Salaar Badh r.a tak iss tarah se hai-

Hazrat Shah Waris Hasan r.a
Ibn
Imtiyaz hasan
Ibn
Muhammad hasan
Ibn
Azeezuddin hasan saani
Ibn
Maulvi ishq hussain
Ibn
Muhammad Akbar
Ibn
Nooruddin hasan
Ibn
Shah abu Saeed
Ibn
Shah khurram
Ibn
Shah Muhammad Hashim
Ibn
Shah Mubarak
Ibn
Shah Hameeduddin urf Makhdoom jahaniya saani
Ibn
Hazrat Shah Bahauddin
Ibn
Hazrat Makhdoom Qutubuddin Salaar Badh r.a.

Hazrat Shah Waris Hasan r.a ke Sahabzaadgaan mein Shah Waez Hasan urf bhole miya, Shah Tasalli Hasan aur Shah Tashaffi Hasan ke apne apne wasih halqa e aqeedat maujood hai’n.

Advertisements