Hazrat Soofi Akhlaaq Ahmad saahib Naqshbandi Mujaddidi rahmatullāhi alaihi

38834053_1357398267728027_4732882844399960064_n

Aap ka watan Rampur (Uttar Pardesh) tha.

Aap ek arse tak Jhaalawad (Rajasthan) me muqeem rahe.

****************
Aap Hazrat Rukn-ud-deen Shaah Alwari rahmatullāhi alaihi ke mureed hue.

Aap ne adab o mohabbat ke saath Peer ki itni zyada khidmat ki ke ‘Fana fi Shaikh’ ke maqaam par pahunch gaye.
Aap ke Peer o murshid ne aap par tawajjoh farma kar Ittisaal e Roohaani se Aap ko apne jaisa bana diya tha.

****************
Peer ke saahabzaade Hazrat Mufti Mahmood Shaah Rahmatullāhi alaihi ke mashware par Ahmedabad, Gujarat tashreef laaye.
Gujarat me Aap ki tashreef aawari aur faizaan aur khidmat e deen se Silsila e Aaliya Naqshbandiya Gujarat ki sar zameen par tar o taaza hua.

****************
Aap Saahib e Karaamat aur Saahib e Nisbat Wali e Kaamil hain.

Hazrat Shaah Muhammad Mazharullāh Dehlawi ahmatullahi alaihi ne apne khato me Aap ko ‘Mebhboob-us-Samad’ ke laqab se khitaab farmaaya hai.

Aap paabande shariat the aur Sunnat ki adaaygi me bahot mazboot the.
Aap har kaam us ke waqt par kiya karte, Dauraan e safar bhi Namaaz e panjgaana Jama’at ke saath ada farmaate.

****************
Aap asl Afghani Pathan hone ki wajah se bahot khubsurat the.
Ek martaba kisi safar ke dauraan aap kisi Railway station par baithe the. Itne me waha se ek Angrez tourist nikla. Jab us ki nazar Aap par padi to wo Aap ko dekhte hi reh gaya. Us ne Aap ki tasweer lene ke iraade se apna Camera nikaala, Lekin jab Aap ki nazar us angrez par padi aur dekha ke wo Aap ki tasweer lene ki koshish kar raha hai to Aap ne apne mubarak chehre par naqaab daal diya.
Wo Angrez Camera lekar Aap ke saamne hi khada raha aur apni zabaan me kehne laga ke ‘Aap kab tak apne chehre par naqaab daale rahenge. Main aap ki tasweer liye baghair yaha se jaaunga nahi.’ To Aap ne us ko jawaab diya ‘Tu jab tak meri tasweer lene ke iraade se camera lekar yaha khada rahega tab tak main apne chehre se naqaab nahi hataunga.’ Aakhirkaar wo Angrez thak haar kar waha se chala gaya, Lekin Aap ne Shariat ka daaman nahi chhoda.

****************
Aap Hazrat Rukn-ud-deen Shaah Alwari rahmatullāhi alaihi ke mureed aur khalifa hain.
Aap ‘Naqshbandi Mujaddidi’ silsila ke Shaikh hain.

Aap ke Khulfa :
(1) Hazrat Muhammad Uṡmaan Shaah Quraishi rahmatullāhi alaihi (Ahmedabad)
(2) Hazrat Soofi Abdullāh Shaah rahmatullāhi alaihi (Modasa) (Mazaar – Sanganer, Rajsthan)
(3) Hazrat Soofi Abdur Rahmān Shaah rahmatullahi alaihi (Dholka)
(4) Hazrat Saahabzaada Dr. Ikhlaas Ahmad Khan rahmatullahi alaihi (Ahmedabad).

****************
Aap ka wisaal 24 Zil Qa’ada 1390 Hijri (21 January 1971 A.D) ko Jum’aa ke roz Chaasht ke waqt hua.
Aap ki Namaaz e janaaza Shaahi Jama’a masjid, Maanek Chok me ada ki gai.

Aap ka mazaar Ganj Shohada Qabrastan, Ahmedabad (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Soofi Akhlaaq Ahmad saahib Naqshbandi Mujaddidi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.