Hazrat Shaikh Sayyed Umar bin Abdur Rahmān al-Attaas rahmatullāhi alaihi

50976822_1493848920749627_829578297636552704_n
Laqab :
Qutb-ul-Anfaas.

*************
Aap ki wilaadat 929 Hijri (1523 A.D.) me Tarim ke qareeb Lisik, Hadramaut (Yemen) me hui.

Aap ke waalid ka naam Hazrat Sayyed Abdur Rahmān bin Aqeel rahmatullāhi alaihi aur waalida ka naam Shareefa Muznah binte Mohammad bin Ahmad al-Jufri hai.

Aap Husaini saadaat hain.

Aap jab apni waalida ke pait me hi tab aap ki chhink ki aawaaz aati thi. Is liye Aap ‘Attaas’ laqab se mash’hoor hain.

*************
Bachpan se hi Aap ko ibaadat wa riyaazat ka shauq tha. Aap Tarim ki har masjid me 2 rak’at namaaz padhte. Kunve me se paani nikaalkar masjid ke hauz me daalte.

*************
Aap ne Shaikh Abu Bakr bin Saleem, Shaikh Husain bin Abu Bakr bin Saleem, Shaikh Haamid bin Abu Bakr bin Saleem, Muhammad bin Abdur Rahmān al-Haadi, Sayyed Umar bin Isā al-Samarqandi, Barakwah al-Maghribi, Shaikh-ul-Kabeer Ahmad ibn Is’hāq al-Shahal bin Hainani, Abu Bakr bin Abdur Rahmān bin Shihaab, Shaikh Abdullāh bin Ahmad al-Afeef , Shaikh Ahmad bin Abdul Qaadir Ba’syin, aur Abu Bakr bin Muhammad al-Faqeeh se ta’aleem haasil ki.

*************
Aap ne Ainat, Tarim, Waadi al-Amed, Waadi al-Qasar aur Waadi al-Do’an ka safar kiya.

Phir Shaikh Husain bin Abu Bakr bin Saleem aur Shaikh Haamid bin Abu Bakr bin Saleem ke mashware par Aap ne Huraydah me tashreef laaye aur Shaikh Najjaad al-Zibyani ke yaha muqeem hue.
Aap ne Huraydah me sukoonat pazeer hokar ta’aleeme deen shuru ki.

Kuchh waqt baad Aap ke waalid aur pariwaar ko bhi Huraydah bula liya.
Huraydah aane ke 8 din baad Aap ke waalid ka intiqaal hua.

*************
Aap khilaafe shariat koi bhi baat pasand nahi farmaate aur sab ko shariat par amal karne ki ta’aleem farmaate.

Ek martaba Aap Banu Suwaid Anaq ke ek shakhs ke ghar par tashreef le gaye. Unho ne Aap ka istaqbaal kiya aur Aap ko ek kaddu batore hadiya diya. Aap ne puchha “Tum ye kaddu kaha se laaye ho?” Us ne kaha “Waqaf ke baagh se.” Aap ne farmaaya “Humare liye yeh kaddu khaana jaa’iz nahi kyun ki waqaf ki zameen musalmano ki milkiyat hai.” Us shakhs ne kaha “Aaj ke baad main waqaf ke baagh se koi cheez nahi khaaunga. Lekin is se pehle maine us me se jo khaaya hai us ka kya?” Aap ne farmaaya “Tum us baagh ki dekh bhaal karo aur jo bhi uge use musalmano ko de dena.”

Ek martaba Aap Wadi al-Amed me Banu Sulaib ke ek shakhs ke ghar ke paas se guzre us ne ba-adab Aap ko tashreef laane ke liye arz ki. Aap ne farmaaya “Main us ghar me kaise jaa sakta hu jis me betiyo ko miraaṡ me se hissa nahi diya jaata hai. Kyun ki Qur’an majeed me beto ko do hisse aur betiyo ko ek hissa dene ke liye irshaad farmaaya gaya hai.” Us shakhs ne kaha “Main aaj se hi betiyo ko miraaṡ me se hissa dena shuru kar dunga.”

*************
Aap apne shaagirdo se farmaate ke “Kaṡrat se Astaghfaar aur Durood shareef padhte raho ke yeh har pareshaani se najaat ka zariya hai.”

*************
Karaamat :
‾‾‾‾‾‾‾‾‾‾‾‾
(1) Ek shakhs ka intiqaal ho gaya. Us ki biwi haamila thi. Jab pariwaar waale us shakhs ki miraaṡ ko baant rahe the to Aap ne farmaaya ke “Is aurat ke pet me jo bachcha hai woh ladka hai. Us ke liye bhi is me se hissa rakhna.” Kuchh waqt baad jab bachcha paida hua to waaqai ladka tha. Wo ladka bada hua to Aap ne us se farmaaya “Beta! Ilme deen haasil karo taake deen ki hifaazat kar sako.” Aap ke farmaan par us ne ilme deen haasil karna shuru kiya aur bada hokar faqeeh bana aur Shaikh Abdul Kabeer ke naam se mash’hoor hua.

(2) Ek martaba Qahet ki wajah se Aap ke gaanv waale gaanv chhodkar jaaane ki tayyaari karne lage. Aap ne unhe farmaaya ki “Sabr rakho, In shaa Allāh baarish hogi.” Gaanv waale Aap ki baat maankar rook gaye. Aur jaldi hi baarish hui aur khajoor ke darakht hare ho gaye.

(3) Ek martaba Aap ne Shaikh Umar bin Ahmad al-Juaydi Hilabi se farmaaya “Gaanv me jaao to khajooro ko utaar lena.” Unho ne Aap ke farmaan par amal kiya. Is se Gaanv waale ko ta’ajjub hua. Lekin kuchh hi waqt me tiddi ke lashkar ne hamla kiya aur saara paak barbaad kar diya.

*************
Aap ne ‘Ratib-ul-Attaas’ naami kitaab likhi hai.

*************
Aap ke Shaagird :
(Aap ke saahabzaade) Husain, Saleem, Abdur Rahmān, Aap ke bhai Aqeel, Abdullāh bin Alawi al-Haddad, Isā bin Muhammad al-Ethiopia, Ahmad bin Hashim al-Ethiopia, Abdullāh bin Ahmad Balfaqih, Muhammad bin Abdur Rahmān Madihij, Sayis Ali bin Umar bin Husain Shaikh Ali Baras, Shaikh Muhammad Bamasymus, Shaikh Muhammad bin Umar al-Amudi, Shaikh Abdullāh bin Uṡmaan al-Amudi, Shaikh Abdullāh bin Ahmad Ba’Afeef al-Amudi, Shaikh Aqeel bin Ameer bin Daghmusy, Shaikh Sahal bin Shaikh Ahmad bin Is’hāq, Shaikh Abdur Rahmān bin Abdul Kabeer Baqis, Shaikh Muhammad bin Abdul Kabeer Baqis, Faqeeh Shaikh Ahmad bin Abdullāh bin Umar, Shaikh Saleem bin Umar, Shaikh Syarahil Badzib, Salim bin Ba’Ubad, Husain bin Shaikh Ali bin Muhammad al-Aidrus, Ahmad ibn Umar al-Hinduan, Zain bin Imraan Ba’Alawi, Shaikh Abbaas bin Abdullāh Bahafash, Shaikh Umar bin Ahmad al-Hilabi, Shaikh Abu Saeed Abdullāh bin Muhammad bin Basurah, Shaikh Muzahim bin Ali Bajabir, Shaikh Ali bin Saaleh, Qouzan Zahir, Faqeeh Abdur Raheem Bakatir, Shaikh Saleem bin Abdur Rahmān, Junaid Bawazir, Shaikh Abu Bakr bin Abdur Rahmān bin Abdul Ma’abood Wazeer, Muhammad bin Umar Bawazir, Shaikh Abdullāh bin Sad Bamika Syibami, Shaikh Ahmad bin Muhammad Bajamal, Shaikh Ali bin Toha as-Saqqaf, , Aqeel bin Shaikh as-Saqqaf Shaikh Umar bin Ali az-Zubaidi, Faqeeh Abdullāh bin Umar Ba’Ubad, Shaikh Ali bin Ahmad bin Wurud Bawazir, Shaikh bin Abdur Rahman al-Ethiopia, Shaikh Ali bin Haulan, Shaikh Ali bin Kosin al-Udzri, Shaikh Mahmood Jummal an-Najar.

*************
Aap Hazrat Shaikh Husain bin Abu Bakr rahmatullāhi alaihi ke mureed aur khalifa hain.

Aap se ‘(Shaazili) Attaasia’ silsila jaari hai.
Aap ke khalifa Hazrat Imaam Sayyed Abdullāh bin Alawi al-Haddaad rahmatullāhi alaihi hain.

*************
Aap ka wisaal 20 Jamaadi ul awwal 1072 Hijri ko hua.

Aap ka mazaar Huraydah (Yemen) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Sayyed Umar bin Abdur Rahmān al-Attaas rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.