Hazrat Shaikh Sayyed Jamaal-ul-Auliya rahmatullāhi alaihi

36641625_1316183168516204_734993505641824256_n

Hazrat Shaikh Sayyed Jamaal-ul-Auliya rahmatullāhi alaihi :

Laqab :
‾‾‾‾‾‾‾‾‾
Shaikh-ul-Auliya.

****************
Aap ki wilaadat 973 Hijri (1566 A.D.) me Kora Jahanabad, Zila Fatehpur me hui.

Aap ke waalid Hazrat Makhdoom Sayyed Jahaaniya bin Sayyed Baha-ud-deen rahmatullāhi alaihi hai.

Aap Husaini saadaat hai.

****************
Aap ke pardaada Hazrat Sayyed Shaah Haibatullāh bin Sayyed Shaah Saalaar Raazi Sultaan Altamash ke zamaane me Arab se Hind me tashreef laaye aur muhim e Bengal me Sultaan ke saath shareek hue. Phir waapasi me Sultanpur me iqaamat ikhtiyaar ki.
Ek martaba Hazrat Jaunpur se Delhi tashreef le jaa rahe the tab raaste me ek Hindu ne un ke qaafle par hamla kiya. ALLĀH ta’ala ke fazl se un ko fateh haasil hui aur woh Hindu maara gaya. Hazrat ne is maqaam ka naam Fatehpur rakha. Aur farmaaya “2-3 din qayaam karne ke baad aage Delhi ka safar kiya jaayega.”
Usi raat Huzoore akram sallallāhu alaihi wa sallam ki ziyarat se musharraf hue aur irshaad farmaaya “Tum kahi na jaao, balke isi jangal ko saaf karke yahi qayaam karo. Sadiyo tak tumhari aulaad ke zariye logo ko deene islaam ki roshni milegi aur tumhari aulaade ahfaad me bade bade auliya e kaamileen aayenge.”
Is tarah Huzoore akram sallallāhu alaihi wa sallam ki bashaarat ki barkat se yeh maqaam aabaad hua aur log is khaandaan ke ulama wa fuzala aur auliya Allāh se faiz haasil karte rahe.

****************
Aap ke waalid Hazrat Makhdoom Sayyed Jahaaniya rahmatullāhi alaihi apne waqt ke mash’hoor buzurg the jin se bahot saare ulama ar asfiya ne faiz haasil kiya. Unho ne ‘Asraare Jahaani” naami kitaab me Azkaar wa Asghaale Asfiya jama kiye hain.

Aap ki wilaadat se qabl Hazrat Faqeer Khuda bakhsh rahmatullāhi alaihi ne bashaarat dete hue farmaaya tha ke “Makhdoom Jahaaniya ke ghar me Jamaal aayega.”

****************
Aap 7 saal ki umr se fuqara ki khidmat karne lage the.

Aap ne apne waalid Hazrat Makhdoom Sayyed Jahaaniya rahmatullāhi alaihi se ta’aleem haasil ki.
Phir aap ke waalid ne Aap ko Hazrat Shaikh Qaazi Zia-ud-deen rahmatullāhi alaihi ki khidmat me bheja. 5 saal tak Hazrat ki khidmat me rehkar uloom e zaahiri wa baatini ki ta’aleem haasil ki. Hazrat ne Awraad o Ashgaal ke baad Silsila e aaliya Qaadriya ki khilaafat ataa farmai.
Hazrat Shaikh Qayaam-ud-deen Jaunpuri rahmatullāhi alaihi se bhi ta’aleem haasil ki.
22 saal ki umr se majeed ta’aleen haasil karna shuru kiya aur 20 saal tak tahseele ilme deen me mashghool rahe.

Hazrat Ghauṡ e aazam Shaikh Sayyed Mohiy-ud-deen Abdul Qaadir Jilani radiy-Allāhu ta’ala anhu, Hazrat Khwaja Sayyed Baha-ud-deen Naqshband rahmatullāhi alaihi aur Hazrat Sayyed Badi-ud-deen Ahmad Madaar Shaah rahmatullāhi alaihi ne Aap ko Faiz e uwaisi ata farmaaya.

****************
Raahe Sulook ki manzile tay karne ke baad Aap apne watan tashreef laaye aur dars wa tadrees shuru kiya.

Aap apne waqt ke jayyad Aalim e deen wa Aarif billāh soofi the.
Kaṡeer ta’adaad me ulama wa masha’ikh ne Aap se ta’aleem wa faiz haasil kiya.

****************
Aap Hazrat Shaikh Qaazi Zia-ud-deen rahmatullāhi alaihi ke mureed aur khalifa hain.
Aap ke waalid Hazrat Makhdoom Sayyed Jahaaniya rahmatullāhi alaihi ne bhi Aap ko khilaafat ata farmai hai.

Aap ke khulfa :
(1) Hazrat Meer Sayyed Muhammad Kalpawi rahmatullāhi alaihi
(2) Hazrat Allama Maulana Abdur Rasheed Jaunpuri rahmatullāhi alaihi
(3) Hazrat Shaikh Yaseen bin Ahmad Banarasi rahmatullāhi alaihi.

****************
Aap ka wisaal 1 Shawwaal 1040 Hijri (May 1631 A.D.) ko Shabe Eid-ul-Fitr ko hua.

Aap ka mazaar Kora Jahanabad, Fatehpur (Uttar Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Sayyed Jamaal-ul-Auliya rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.