Hazrat Shaikh Sayyed Abul Fatah Nizaam-ud-deen Mohammad rahmatullāhi alaihi

29792555_1248561338611721_7050040463918628864_n

Hazrat Shaikh Sayyed Abul Fatah Nizaam-ud-deen Mohammad rahmatullāhi alaihi :

Alqaab :
‾‾‾‾‾‾‾‾‾‾
Maqbool aalam, Shaikh-ul-Auliya.

********************
Aap ki wilaadat 14 Rajab 989 Hijri ko Ahmedabad me hui.

Aap ke waalid ka naam Hazrat Maah-e-Aalam Sayyed Jalaal-ud-deen Hasan aur waalida ka naam Bibi Aamina khaatoon binte Sayyed Nasrullāh hai.

Aap Hazrat Shah e aalam Sayyed Siraaj-ud-deen Muhammad rahmatullāhi alaihi ki nasl se hain.

Aap ki wilaadat se pehle Shabe wilaadat ko Hazrat Shah e aalam Sayyed Siraaj-ud-deen Muhammad rahmatullāhi alaihi ne bashaarat di aur farmaaya ke ‘Paida hone waale farzand ke Maraatibe Jaleela ko malhooz rakhna kyun ki wo Shaikh-ul-Auliya hoga aur us ka naam hamare jadde amjad ke naam par Mohammad rakhna.’

******************
Aap ke waalid ne apne wisaal ke 2 saal pehle Aap ko Khirqa e khilaafat ata farmaaya.

Aap apne waalid e maajid ke wisaal ke baad Sajjaada nasheen bane aur 42 Saal tak Masnade Sajjaadgi par ronak afroz rahe aur logo ko faiz wa hidaayat ata farmaate rahe.

*****************
Aap ki aadate kareema thi ke har Jum’aa ko 500 Mehmoodi sikke haajat-mando ko taqseem farmaaya karte the. Har Shakhs ko 2 Mehmoodi sikke inaayat farmaate the.
Ek martaba ittefaaqan zyada raqam maujood na thi. Aap ke khaadim e khaas Maulana Abdul Shakoor saahab ne arz kiya ke ‘Huzoor! Is waqt sirf 12 Mehmoodi sikke maujood hain.’ Aap ne farmaaya ke ‘6 aadmiyo ko khaamoshi se dekar rukhsat kar do.’ Lekin phir ye baat Aap ki tabiyat ko ganwaara na hui ke chand aadmiyo ko mile aur chand mehroom reh jaayen. Aap ne Khaadim ko waapas bulaaya aur farmaaya ke ‘Zara thehro aur Sabr karo aur dekho ke Khuda kya karta hai.’ Itna farmakar Aap Muraaqabe me mashgool ho gaye.
Abhi kuchh waqt hi guzra tha ke Aap ke saahabzaade Hazrat Jalaal-ud-deen Maqsood Aalam haazire khidmat hue aur 2000 Mehmoodi sikke aur ek khat Aap ki khidmat me pesh kiya aur kaha ke ‘Ye Khwaja Abul Hasan ne nazrana bheja hai.’ Aap ne farmaaya ke ‘Baaba! Ye to tumhari karaamat hai. Jald laao aur dastoor ke mutaabiq un haajat-mando ko de do.’

********************
Aap ek azeem Aarif, Aalim, Haafiz, Qaari, Kaatib aur zabardast Shaayar the.

********************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :
(1) Jaami ul Ma’ana (Asmaa e Ilāhi ki Arabi me Sharah)
(2) Ahsaa ul Asmaa (Asmaa e Ilāhi ki Faarsi me Sharah)
(3) Juma’at e Shaahiya (20 Jild)
(4) Lataa’if e Shaahiya (Hazrat Shah e aalam ke 63 Awraad o Wazaa’if ka Majmua)
(5) Azkaar ul At’haar (Apne Aaba wa Ajdaad ke Haalate tayyibaat ka Majmua)

Aap ‘Jalaali’ takhallus ke saath Ash’aar likhte the.

Aap ne Hazrat Baaba Fareed-ud-deen Mas’ood Ganje Shakar Chishti, Hazrat Shams Tabrizi, Hazrat Maulana Jalaal-ud-deen Rumi, Hazrat Shaikh Ahmad Ganj bakhsh Khattu Maghribi, Hazrat Sayyed Burhaan-ud-deen Qutb-e-Aalam, Hazrat Sayyed Siraaj-ud-deen Shaah-e-Aalam, aur Hazrat Sayyed Jalaal-ud-deen Maah-e-Aalam rahmatullāhi alaihi ki shaan e aali me Ash’aar likhe hain.

‘Deewaan’ me Aap ke Faarsi Kalaam ka majmua hai.

********************
Aap ne apne wisaal se pehle apne Farzande akbar Hazrat Jalaal-ud-deen Maqsood Aalam rahmatullāhi alaihi ko wasiyat farmai thi ke ‘Naqshe Qadame Rasool sallallāhu alaihi wa sallam [jo Aap ko apne Masha’ikh se haasil hue the) ko meri Qabr par rakh diya jaaye ke ye meri dili tamanna hai.’
Lekin Aap ke wisaal ke baad Aap ke saahabzaade bhul gaye. Jab dusre din namaaze Fajr ke baad Aap ke saahabzaade Aap ke Mazaar shareef par Faatiha khwaani ke liye haazir hue to dekha ke turbat mubarak seena e paak ki taraf ka hissa phata hua hai. Un ko badi herat hui. Baher haal unho ne mazdooro ko bulakar apni nigraani me mazaar shareef ko durust karvaaya.
Jab dusre din namaaze fajr adaa karne ke baad Aap ke saahabzaade Aap ke mazaar par haazir hue to dekha ke turbat mubarak kal se bhi zyada khuli hui hai. Unho ne Khaanqaah me maujood tamaam logo ko bulakar is ma’amle me puchha. Lekin sab ne laa ilmi aur ta’ajjub ka izhaar kiya. Baherhaal phir se mazdooro ko bulaaya gaya aur is baar mazbooti se Mazaare paak ko pakka kar diya gaya.
Us din Ishaa ki namaaz ke baad Hazrat Jalaal-ud-deen Maqsood Aalam soye to Aap un ke khwaab me tashreef laaye aur farmaaya ke ‘Aakhir kyun rozaana mazdoor bulakar Mazaar durust karvaane ki takleef karte ho. Tumhe ma’aloom nahi ke ye hamare Iztiraabe qalbi ki kefiyat hai ke jab tak wasiyat ke mutaabiq hamare seene par Naqshe Qadame Rasool sallallāhu alaihi wa sallam nahi rakhoge tab tak Firaaqe Naqshe Qadame Rasool sallallāhu alaihi wa sallam me hamari turbat yunhi khul jaaya karegi.’
Hazrat Jalaal-ud-deen Maqsood Aalam ne dusre hi din bade ta’azeem o ikraam ke saath Aap ke mazare mubarak par Naqshe Qadame Rasool sallallāhu alaihi wa sallam nasab kara diye aur apni is galti par Aap ki baargaah me maazirat chaahi.
Aaj bhi wo Naqshe Qadame Rasool sallallāhu alaihi wa sallam Aap ke mazaare paak par maujood hai. Aur Zaa’ireen ki khwaahish par waha ke khuddaam ziyarat karwaate hain.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Maqbool aalam Shaikh Sayyed Nizaam-ud-deen Mohmmad rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.