Hazrat Shaikh Sadr-ud-deen Aarif rahmatullāhi alaihi

40920936_1388488414619012_227155490231025664_n

Aap ke waalid ka naam Hazrat Shaikh Baha-ud-deen Zakariya bin Shaikh Wajih-ud-deen rahmatullāhi alaihi hai.

Aap Asad ibn Haashim al-Quraishi ki nasl se hain. Jo Hazrat Ali radiy-Allāhu ta’ala anhu ke naana hain.

**************
Aap ka nikaah Bibi Raasti binte Sultaan Jamaal-ud-deen Mohammad al-Farghani se hua.

Aap ke 2 saahabzaade hain :
(1) Rukn-ud-deen Abul Fat’h Suharwardi rahmatullāhi alaihi,
(2) Imaad-ud-deen Ismāeel rahmatullāhi alaihi.

**************
Aap ne Hazrat Shaikh Baha-ud-deen Zakariya rahmatullāhi alaihi se taaleem haasil ki.

666 Hijri (1267 A.D.) Hazrat Shaikh Baha-ud-deen Zakariya rahmatullāhi alaihi ke wisaal ke baad Aap Masnad par baithe.

Hazrat Shaikh Baha-ud-deen Zakariya ke wisaal ke baad un ke maal o asbaab ko un ke 7 saahabzaade me taqseem kiya gaya.
Aap ne apne hisse ke 70,00,000 rupye ka maal faqeero me baant diya aur apne liye kuchh na rakha. Phir ibaadat wa riyaazat me mashgool ho gaye.

*************
Ek martaba sakht sardi me Aap ghusl ke liye sard paani me gaye aur bahot der tak khade khade paani me Munaajaat karte rahe ke ‘Ilāhi! Beshak tu Baadshaah hai aur bando ki bandagi se beniyaaz hai. Tu apne lutf o karam se gunaahgaar bando ko nawaazta he. Teri qasam! Jab tak mujhe ye na bataoge ke mera maqaam kya hai main paani se hargiz baahar nahi niklunga.’
Aap ne ghaib se aawaaz suni ke ‘Tera martaba ye hai ke bahot khalqat ko teri Shafa’at se bakhshunga.’
Aap ne kaha ‘Ilāhi! Teri rahmat ka koi hadd o hisaab nahi. Mujhe is baat se khushi nahi hui.’
Aawaaz aai ke ‘Maine apne taalibo ko tera aashiq banaaya aur tujh par nawaazish karke apna Ma’ashooq banaaya hai.’
Ye sunne ke baad Aap paani se baahar aaye aur kapde pehne. Us ke baad Aap jis taraf jaate the log Aap ko ‘Ahmad Ma’ashooq’ ke naam se pukaarte the.

Bahot saare Buzurgaane deen Aap se faiz haasil karke martaba e takmil ko pahunche hain.

*************
Ek martaba Aap ke mureed e khaas Hazrat Hisaam-ud-deen Multani rahmatullāhi alaihi ne aap ki khidmat me iltemaas kiya ke ‘Mujhe Hazrat Shaikh Baha-ud-deen Zakariya Multani rahmatullāhi alaihi ke Roze me ek qabr ki jagah inaayat farma de.’ Aap ne farmaya ‘Tumhari qabr ke liye Huzoor Rasool-Allāh sallallāhu alaihi wa sallam ne Badayun me jagah muqarrar farmai hai.’
Us ke baad Hazrat Sadr-ud-deen Aarif rahmatullāhi alaihi ki ijaazat se Hazrat Hisaam-ud-deen Multani Badayun chale gaye.
Ek raat Hazrat Hisaam-ud-deen Multani ne Huzoor Rasool-Allāh sallallāhu alaihi wa sallam ko khwaab me dekha. Huzoor sallallāhu alaihi wa sallam ek jagah par baithkar wuzu farma rahe hain. Subah uthkar waha gaye to dekha ke is jagah ki zameen paani se tar hai. Pas unho ne wasiyat ki ke Mujhe isi jagah par dafn karna.

*************
Ek martaba aap dariya ke kinaare par wuzu farma rahe the. Aap ke saahabhzaade Hazrat Rukn-ud-deen Rukn e aalam waha par Hifz kar rahe the. Un ki umr 7 sala kit hi.
Ittefasqan eaha bahot si hirane aai. Lekin sadmiyo ko dekhkar waha se bhaagne lagi. Hazrat Rukn-ud-deen Rukn e aalam un hirano ke pichhe jaane lage.
Aap ne hirano par ek tawajjoh ki nigaah farmai to saari hirane Aap ke paas aakar khadi ho gai. Aap ne farmaya ke ‘Rukn-ud-deen! Jo Hiran pasand aaye use rakh lo.’ Unho ne hiran ka ek bachcha aur us ki maa pakad li. Aur ek arse tak ye dono hiran Aap ke ghar me rahe.

*************
Aap Hazrat Shaikh Baha-ud-deen Zakariya Multani rahmatullāhi alaihi ke mureed aur khalifa hain.
Aur ‘silsila ke Shaikh hain.

Aap ke khulfa :
(1) Hazrat Shaikh Rukn-ud-deen Abul Fat’h Suharwardi rahmatullāhi alaihi,
(2) Hazrat Shaikh Imaad-ud-deen Ismāeel rahmatullāhi alaihi,
(3) Hazrat Shaikh Ahmad Maashooq rahmatullāhi alaihi,
(4) Hazrat Shaikh Salaah-ud-deen Durwesh rahmatullāhi alaihi.

*************
Aap ka wisaal 23 Zil Hijja 684 Hijri (February 1286 A.D.) me hua.

Aap ka mazaar Multan (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Sadr-ud-deen Aarif rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.