Hazrat Shaikh Noor-ul-Haq Pandawi rahmatullāhi alaihi

49409548_1466017100199476_2250455866878722048_n
Laqab :
‾‾‾‾‾‾‾‾‾‾
Noor Qutb-e-aalam.

****************
Aap ki wilaadat Pandua (Bengal) me hui.

Aap ke waalid ka naam Hazrat Makhdoom Ala-ul-Haq Pandawi bin Umar rahmatullāhi alaihi hai.

Aap Hazrat Khaalid bin Waleed radiy-Allāhu ta’ala anhu ki nasl se hain.

****************
Aap ne Shaikh Hameed-ud-deen Kunj Nasheen Nagpuri se ta’aleem haasil ki.

Phir apne waalid Hazrat Makhdoom Ala-ul-Haq Pandawi se uloom-e-baatini ki ta’aleem haasil ki.
Aap kai saal tak Khaanqaah ke tamaam umoor ko khud sar anjaam dete rahe jaise ki Khaanqaah ki safaai karna, kapde dhona, namaaziyo aur musaafiro ke liye paani laakar muhayya karaana, jangal se lakadiya laakar langar tayyaar karna.

****************
Ek martaba khaanqaah me ek durwesh ko aadhi raat ko pait me shadeed dard shuru hua aur zor se paakhaane ki haajat hui. Woh bait-ul-khala ki taraf bhaaga magar raaste me hi paakhaana ho gaya. Shaikh Noor-ul-Haq apne roz marra ke kaam me masroof the. Kuchh paakhaana girne ki wajah se Aap ke kapde aur jism aaluda ho gaye. Magar Aap ke chehre par koi malaal ya na-gawari nazar nahi aaya. Makhdoom Ala-ul-Haq ne Aap ki inksaari aur hilm dekhkar farmaaya ‘Mujhe tumhari aisi khidmat se bahot khushi hai. Aur dua karta hu ke ALLĀH ta’ala tumhe aala mansab ata farmae.’
Is tarah Hazrat ki dua se ALLĀH ta’ala ne Aap ko Qutb-e-aalam ka martaba ata farmaaya.

****************
Jab Aap sajjaada nasheen bane to beshumaar log Aap ki baargaah me aakar faiz haasil karne lage.
Aap ke saadgi, sabr aur tahammul ka yeh aalam tha ke Aap ka bura chaahne waala bhi Aa ke husne akhlaaq aur husne sulook se Aap k moataqid ban jaata.

Ek martaba ek faqeer Aap k baargaah me aaya aur Aap ko bura bhala kehne laga. Magar Aap ne us ke saath achha baraav kiya aur jab woh jaane laga to use kuchh raqam bhi ata farmai.

****************
Jab Raaja Ganesh ne Bengal par qabza kiya aur musalmano par bahot zulm karna shuru kiya to Aap ne Jaunpur ke Sultaan Ibrāheem Sharqi ko khat likhkar musalmano ki madad ke liye aane ke liye farmaaya. Hazrat Makhdoom Saayed Ashraf Jahaangeer Simnani rahmatullāhi alaihi ko bhi khat likhkar Sultaan ko madad ke liye guzarish karne ke liye darkhwaast ki.
Sultaan Ibrāheem Sharqi ek bada lashkar lekar Bengal aaya aur Pandua me padaav daala. Jab Raaja Ganesh ko is baat ka pata chala to woh Shaikh Noor-ul-Haq ki baargaah me aaya aur Sultaan Ibrāheem Sharqi ko waapas bhejne ke liye arz ki. Aap ne farmaaya ‘Jab tak tum musalman na ho jaao tab tak main baadshaah ko rok nahi sakta.’
Raaja Ganesh ne apne mahel me pahunchkar apni biwi ko bataaya to us ne Raaja ko rok diya. Raaja ne apne 12 saal ke bete Jadu ko Hazrat ke paas bheja. Aap ki ta’aleem se woh musalman hua aur Aap ne us ka naam Jalaal-ud-deen Muhmmad Shaah rakha.
Phir Aap ki guzarish se Sultaan Ibrāheem Sharqi apne lashkar ke saath waapas laut gaya. Us ke jaane ke baad Raaja Ganesh ne apne bete ko apne paas bula liya aur phir se zulm karna shuru kiya. Aap ke saahabzaade Shaikh Anwar aur pote Shaikh Zaahid bin Shaikh Rif’at-ud-deen ko Sonargaon me qaid kar liya. Shaikh Anwar ne jalaal me aakar farmaaya ke ‘Lagta hai ki meri maut ke baad hi is zaalim se najaat milegi.’ Aakhir kaar Raaja ka zulm inteha ko pahuncha aur Shaikh Anwar ko shaheed kar diya. Aur Shaikh Anwar ke farmaan ke mutaabiq ALLĀH ta’ala ke ghazab se Raaja bhi mar gaya.
Us ke baad 818 Hijri (1415 me A.D.) us ka beta Jalaal-ud-deen Muhmmad Shaah Raaja bana. Us ne Shaikh Zaahid ko riha kiya aur bahot saare ghair muslim ko musalman banaaya.

****************
Aap ne ‘Anees-ul-Ghuraba’ naami kitaab tehreer farmai hai.

****************
Aap ke 2 saahabzaade hain :
(1) Shaikh Rif’at-ud-deen
(2) Shaikh Anwar.

****************
Aap Hazrat Makhdoom Ala-ul-Haq Chishti Pandawi rahmatullāhi alaihi ke mureed aur khalifa hain.
Aur ‘Chishti Siraaji’ silsila ke shaikh hain.

Aap ke khulfa :
(1) Hazrat Shaikh Rif’at-ud-deen Pandawi rahmatullāhi alaihi,
(2) Hazrat Shaikh Anwar rahmatullāhi alaihi
(3) Hazrat Makhdoom Husaam-ud-deen Chishti Manikpuri rahmatullāhi alaihi
(4) Hazrat Shaikh Fareed-ud-deen Tavaela-Bakhsh rahmatullāhi alaihi (Chandrapura, Bihar),
(5) Hazrat Sayyed Shams-ud-deen Taahir rahmatullāhi alaihi,
(6) Hazrat Sayyed Ali Akbar rahmatullāhi alaihi,
(7) Hazrat Shaikh Rukn-ud-deen rahmatullāhi alaihi.

****************
Aap ka wisaal 17 Rabi uṡ ṡaani 818 Hijri (1415 A.D.) ko hua.

Aap ka mazaar Pandua (Bengal) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Noor-ul-Haq Noor Qutb-e-aalam rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.