Hazrat Shaikh Mohammad Noor-ud-deen Suharwardi rahmatullāhi alaihi

31369673_1261483737319481_7723126830646951936_n

Hazrat Shaikh Mohammad Noor-ud-deen Suharwardi rahmatullāhi alaihi :

Alqaab :
‾‾‾‾‾‾‾‾‾‾
Makhdoo-ul-Aalam, Ustaad-ul-Kul.

****************
Aap ki wilaadat 10 Jamaadi ul Awwal 1060 Hijri (11 May 1650 A.D.) ko hui.

Aap ke waalid ka naam Hazrat Haaji Shaikh Saaleh rahmatullāhi alaihi hai.

**************
Bachpan hi se Aap bahot nek the. Aap ki peshaani par noor aur buzurgi ke aasaar nazar aate the.

Aap ne mash’hoor kitaab ‘Gulistaane Sa’adi’ apne waalid e mohtaram se sirf 7 Din me padh li thi.

10 saal ki umr me Aap Haafiz e Qur’an hue.

Dusre Uloom o Funoon ki kitaaben Hazrat Allama Maulana Ahmad bin Sulaimān Kurdi rahmatullāhi alaihi se padhi.
Hazrat Maulana Sayyed Mohammad Mehboob e aalam rahmatullāhi alaihi se Qir’at wa Tajweed aur Hadeeṡ ki ta’aleem haasil ki.
****************
Phir Aap ne Dars o tadrees shuru kiya.
Aap Afzal-ul-Ulama, Be-nazeer Aalim wa Mudarris, Ustaad-ul-Asaatiza aur Mufti e Aazam the.
Aap puri zindagi ta’aleem wa tadrees aur tasannif ke zariye khidmate deen karte rahe.

Aap ke mureed aur khalifa Hazrat Allama Mohammad Ikraam-ud-deen rahmatullāhi alaihi ne 1,24,000 rupye ki kaṡeer raqam se Madrasa aur Masjid taamir kar ke apne Murshid ki khidmat me pesh kiya. Jo ek Azeemushshaan Daar-ul-Uloom tha, Jis me badi ta’adaad me Hindustan ke aur dusre mulk ke talba ta’aleem haasil karne aate the.

Aap 1143 Hijri (June 1731 A.D.) ko Hajj ke liye tashreef le gaye to Haramain shareefain ke tamaam ulama ne Aap ki ta’azeem o tauqeer ki.

****************
Aap har roz ek Qur’an majeed khatm farma liya karte the.
Aur Awraad o Wazaa’if me masroof rehte.
Sote waqt ek pehlu par 1000 martaba Tasbeeh o Tehleel padhte aur dusre pehlu par 1000 martaba Durood shareef padhte.
Har raat me 2 martaba dedaar ho kar 2 martaba namaaze Tahajjud adaa farmaaya karte the.
Aap ne 15 saal ki umr se wafaat tak Ramazaan-ul-Mubarak ka E’atekaaf tark na kiya.

Aap ne Baadshaaho ka Atiya wa tohfa kabhi qubool na farmaaya. Aur ba-wajood asbaabe zahiri ke Aap ne sone aur chaandi ko kabhi haath na lagaaya.

****************
Tasannif :
‾‾‾‾‾‾‾‾‾‾‾‾
Aap ne taqreeban 170 kitaaben tehreer farmai hai.
Aap ki likhi hui chand mash’hoor kitaaben :
(1) Tafseer ul Qur’an
(2) Tafseer un Nooraani Al Sabiul Masaani
(3) Tafseer e Surah al-Faatiha (1200 Satar)
(4) Tafseer e Surah al-Baqarah
(5) Tafseer e Paara Amma (6000 Satar)
(6) Haashiya Tafseer e Baizaawi
(7) Noor-ul-Qaari Sharhe Sahih Bukhari
(8) Haashiya Qaumiya Alaa Haashiya Qadeemiya
(9) Haashiya Sharhe Mawaaqif
(10) Hallul Ma’aqid
(11) Haashiya Sharhe Maqaasid
(12) Haashiya Talwih
(13) Haashiya Sanadiya
(14) Hasahiya Sharhe Waaqaya
(15) Haashiya Sharhe Mulla
(16) Haashiya Sharhe Qutbi
(17) Sharhe Tehzeeb-ul Mantiq
(18) Sharhe Fusoos-ul-Hikaam.

****************
Aap ke 5 saahabzaade aur 3 saahabzaadiya hain.
Saahabzaade :
(1) Shaikh Muhammad Saaleh
(2) Shaikh Maulana Qaazi Muhammad Nizaam-ud-deen
(3) Shaikh Mahmood
(4) Shaikh Fakhr-ud-deen
(5) Shaikh Baha-ud-deen.
Saahabzaadiya :
(1) Hameeda Banu
(2) Saeeda Banu
(3) Afeefa Banu.

****************
Aap Hazrat Shaikh Maulana Sayyed Mohammad Mehboob e aalam rahmatullāhi alaihi ke mureed aur khalifa han.

****************
Aap ka wisaal 9 Sha’abaan 1155 Hijri (9 October 1742 A.D.) ko Peer ke roz Dopahar ke waqt hua.

Aap ka mazaar Astodia Road, Ahmedabad (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Mohammad Noor-ud-deen Suharwardi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.