Hazrat Shaikh Mazhar-ud-deen Abdul Quddoos Chishti Gangohi rahmatullāhi alaihi

53274700_1521407514660434_7182968786901794816_n

Maktubat Quddoosiya urdu Translation

Hazrat Shaikh Mazhar-ud-deen Abdul Quddoos Chishti Gangohi rahmatullāhi alaihi :

Laqab :
‾‾‾‾‾‾‾‾
Qutb e aalam.

******************
Aap ki wilaadat 860 Hijri (1456 A.D.) me Rudauli (Uttar Pradesh) hui.

Aap ke waalid ka naam Hazrat Shaikh Muhammad Ismā’eel bin Shaikh Safi-ud-deen hai.

Aap Hazrat Imaam e aazam Abu Haneefa Nomaan bin Saabit ki nasl se hain.

Turki hukoomat ke dauraan aap ke pardaada Shaikh Nizaam-ud-deen apne farzand Shaikh Naseer-ud-deen ke saath Ghazna se Delhi aaye. Phir Jaunpur aaye aur aakhir me Rudauli me sukoonat pazeer hue.

Hazrat Makhdoom Saayed Ashraf Jahaangeer Simnani rahmatullāhi alaihi ne Aap ke daada Shaikh Safi-ud-deen ko Bashaarat di thi ke ‘Aap ki nasl me ek qutbe Aalam paida hoga.’
Hazrat Makhdoom Shaikh Ahmad Abdul Haq Rudaulwi rahmatullāhi alaihi ne Aap ke waalid Shaikh Muhammad Ismā’eel ko Bashaarat di thi ke ‘Tumhare yaha ek farzand paida hoga jo Saeed e Azali hai aur humari ne’amat us ko milegi.’

Aap bachpan hi se kaafi zaheen the.

Aap saara din husoole Ilm memasroof rehte aur raat ko Ibaadat me mashgool rehte.

******************
Aap ne Rudauli me ibtidai ta’aleem haasil ki.

Aap Hazrat Shaikh Muhammad Chishti rahmatullāhi alaihi ke mureed hue.

Aap ne apne peer ke daada Hazrat Shaikh Ahmad Abdul Haq Rudaulwi ke mazaar par Jhaadu lagaane ki khidmat ikhtiyaar ki.
Hazrat Shaikh Ahmad Abdul Haq Rudaulwi (Wisaal 838 Hijri /1434 A.D.) ne bhi tashreef laakar Aap ko Roohaani faiz aur tarbiyat ata farmai.

Bai’at ke baad Aap Rudauli me 17 saal tak ibaadat wa riyaazat me masroof rahe. Aap ne Namaaz e makoos aur Sultaan e Zikr bhi kiya.
896 Hijri (1491 A.D.) me Sultaan Sikandar Lodi ke wazeer Umar Khan Kaahi ki daawat par Shahabaad (Haryana) tashreef laaye aur waha 30 saal tak rahe.
926 Hijri (1521 A.D.) me Gangoh (Zila Saharanpur) tashreef laaye.
931 Hijri (1525 A.D.) me ek martaba Gangoh me khatarnaak aag lagi jis me se Aap bahot mushkil se bach paaye. Usi raat Aap ko ghaib se aawaaz sunai di ke ‘Ummeed mat chhodo, Hum ne tumhe ‘Qutb-ul Aqtaab’ ka martaba ata farmaata hai.’
932 Hijri (1526 A.D.) me Jung e Panipat me aap ne Sultaan Ibrāheem Lodi ke saath rahe. Sultaan ki iltija par aap ne us ke lashkar ke liye dua farmai. Mughal baadshaah ne Aap ko giraftaar kiya aur phir haqeeqat jaanne ke baad riha kar diya.

Phir Aap ne Gangoh me taaleem e deen ka kaam jaari rakha.
Aap Lodi aur Mughal baadshaaho aur afsaro ko khato ke zariye hidaayat aur ta’aleem ata karte rahe.

******************
Aap hamesha Awraad o Azkaar me masroof rehte. Zikre Khafi wa Zikre Jahri ba kaṡrat kiya karte the.
400 Rak’at Nawaafil din me aur 400 Rak’at Nawaafil raat me ada farmaate.

Aam kunve ke paani se Wuzu ya Ghusl karne ke bajaay shaher se baahar jaakar bade hauz ke paani se Wuzu ya Ghusl karte.

******************
Aap Arabi, Faarsi, Urdu aur Hindi ke maahir the.

Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :

(1) Rushd-naama
(2) Anwaar ul Uyoon
(3) Ta’leeqaat ala Sharhis Sahaa’if
(4) Haashiyatut Ta’arruf (Tafseer e Awaarif ul Ma’aarif).

 ‘Maktubaat e Quddoosi’ me Aap ke likhe hue khato ko jama kiya gaya hai.

******************
Karaamat :
‾‾‾‾‾‾‾‾‾‾‾‾‾‾
Ek martaba ek makkaar aurat ne Hazrat ke khalifa Hazrat Shaikh Bhooru rahmatullāhi alaihi par naahaq Amaanat me khayanat karne ka daawa daa’ir kar diya aur hukme Deewaani par un ko qaid khaane me dalva diya gaya.
Zaalim Haakim ne lohe ki salaakh ko aag par garm karna shuru kiya. Shaikh Bhooru ne apne Peer ko yaad kiya. Foran Hazrat Abdul Quddoos Ganngohi rahmatullāhi alaihi qaid khaane me in ke paas pahunch gaye aur tasalli dete hue farmaaya ke ‘Fikr na karo, sab theek ho jaayega.’
Jab wo zaalim ne lohe ko surkh aag banakar Shaikh Bhooru ko daagne ke liye us lohe ko aag se baahar nikaala to Qudrate Khuda se wo loha aisa sard ho gaya ke goya wo aag me rakha hi na gaya tha. Ye Haalat dekhkar wo zaalim haakim bahot sharminda aur naadim hua aur apne is fail ko tark kiya.

**************
Aap ka nikaah Shaikh Aarif bin Shaikh Ahmad Abdul Haq Rudaulwi rahmatullāhi alaihi ki saahabzaadi se hua.

Aap ke 2 saahabzaade hain.
(1) Shaikh Rukn-ud-deen,
(2) Shaikh Abdul Kabeer urfe Baala Peer.

**************
Aap Hazrat Shaikh Mohammad bin Shaikh Ahmad Aarif rahmatullāhi alaihi ke mureed aur khalifa hain.
Aap ‘Chishti Saabri’ silsila ke Shaikh hain.

Hazrat Shaikh Muhammad Durwesh bin Qaasim Awadhi rahmatullāhi alaihi ne Aap ko ‘Chishti Naasiri’, ‘Suharwardi Jalaali’ aur ‘Madaari’ silsila ki khilaafat ata farmai hai.
Hazrat Shaikh Bandagi Miyan bin Haakim Avadhi ne ‘Chishti Naasiri’ silsila ki khilaafat ata farmai hai.
Hazrat Shaikh Abdus Salaam urfe Shaah Ali Jaunpuri rahmatullāhi alaihi ne ‘Chishti Qalandari’ ata farmai hai.

Aap ke khulfa :
(1) Hazrat Shaikh Jalaal-ud-deen Thanesri rahmatullāhi alaihi,
(2) Hazrat Shaikh Bhooru rahmatullāhi alaihi,
(3) Hazrat Shaikh Umar rahmatullāhi alaihi,
(4) Hazrat Shaikh Abdul Ghafoor Aazampuri rahmatullāhi alaihi,
(5) Hazrat Shaikh Maulana Rukn-ud-deen rahmatullāhi alaihi,
(6) Hazrat Shaikh Abdul Kabeer rahmatullāhi alaihi,
(7) Hazrat Shaikh Abdul Azeez rahmatullāhi alaihi,
(8) Hazrat Shaikh Abdul Ahad Sirhindi rahmatullāhi alaihi.

**************
Aap ka wisaal 23 Jamaadi uṡ ṡaani 944 Hijri (November 1537 A.D.) ko hua.

Aap ka mazaar Gangoh (Uttar Pradesh) me hai.

**************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Abdul Quddoos Chishti Gangohi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae