Hazrat Shaah Mohammad Farhaad Abul Ulaai rahmatullāhi alaihi

53323407_1523716131096239_8922587063274962944_n
Alqaab :
‾‾‾‾‾‾‾‾‾‾
Fard-ul-Afraad, Shaikh-ul- Jinn wa Ins.

****************
Aap ki wilaadat Delhi me hui.

Aap ke waalid Burhanpur ke Subedaar muqarrar hue to Aap bhi un ke saath Burhanpur gaye. Aap ne taaleem wa tarbiyat Burhanpur me haasil ki.

****************
Burhanpur me Hazrat Shaah Dost Mohammad Abul Ulai rahmatullāhi alaihi bahot mash’hoor the. Aap ke waalid bhi kabhi kabhi Hazrat ki Khaanqaah me jaate the. Aap bhi apne waalid ke saath Hazrat ki baargaah me jaate the. Us waqt Aap ki umr 12 ya 13 Saal ki thi. Kuchh waqt me hi Aap ko Hazrat se aqeedat wa mohabbat ho gai aur Aap akele hi Hazrat ki khidmat me haazir hone lage.
Jab Aap ke waalid ko pata chala to unho ne Aap ko waha jaane se roka. Aap phir jaane lage to Aap ke waalid Hazrat ki baargaah me haazir hue aur arz kiya ke ‘Mera sirf ek hi ladka hai. Agar wo Aap ke paas aata jaata raha to dunya se bekaar ho jaayega.’ Hazrat ne farmaaya ‘Tum chaahte ho ke wo baadshaah ke saamne haath bandh kar khada ho lekin ALLĀH ta’ala chaahta hai ke Baadshaah us ke saamne haath bandh kar khada ho.’ Is ke baad waalide maajid ne Aap ko Hazrat ke paas aane jaane se mana na kiya.
Kuchh dino ke baad Aap Hazrat ke Mureed hue, Hazrat se taaleem haasil ki aur Khirqa e Khilaafat haasil kiya.

****************
Hazrat Shaah Dost Mohammad rahmatullāhi alaihi ne apne wisaal se pehle Aap ko wasiyat farmai ke ‘Burhanpur se Delhi jaao aur wahi reh kar Rushd o Hidaayat ka silsila jaari rakho.’
Hazrat ke wisaal ke baad Aap Delhi tashreef laaye aur sukoonat pazeer hue. Aur tamaam umr Delhi me reh kar Khidmate Islaam karte rahe aur logo ko ta’aleem wa faiz ata farmaate rahe.

****************
Aap bade Aabid o Zaahid Buzurg the. Aap apne waqt ke Ahle Tareeqat ke Muqtada aur Peshwa the.
Aap ki tawajjoh ka aalam ye tha ke ek nigaahe khaas padte hi aadmi behosh ho jaata tha.

Aap ko ‘Shaikh-ul- Jinn wa Ins’ kaha jaata tha. Jinnaat Insaani surat me Aap ki majlis me shareek ho kar Faiz haasil karte the.

****************
Aap Hazrat Shaah Dost Mohammad Abul Ulaai Burhanpuri rahmatullāhi alaihi ke mureed aur khalifa hain.
Aur ‘Naqshbandi Abul Ulaai’ silsila ke shaikh hain.

Aap ke khulfa :
(1) Hazrat Burhaan-ud-deen rahmatullāhi alaihi,
(2) Hazrat Meer Sayyed Asadullāh rahmatullāhi alaihi.

****************
Aap ka wisaal 25 Jamaadi uṡ ṡaani 1145 Hijri (13 December 1732 A.D.) ko hua.

Aap ka mazaar Bagichi Peerji, Delhi me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaah Mohammad Farhaad Abul Ulaai rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.