Hazrat Shaah Ghulaam Muhammad Soofi Siddeeqi rahmatullāhi alaihi

29472389_1238222916312230_44861959903903744_oHazrat Shaah Ghulaam Muhammad Soofi Siddeeqi rahmatullāhi alaihi :

Aap ki wilaadat 1267 Hijri (1848 A.D.) me Ibrahim Pattan, Ratnagiri me hui.

Aap ke waalid ka naam Hazrat Qaazi Ibrāheem bin Qaazi Abdullāh aur waalida ka naam Rabia hai.

Aap Hazrat Abu Bakr Siddeeq radiy-Allāhu ta’ala anhu ki nasl se hai.

***************
Aap ke waalid masjid ke Imaam aur madrasa me Mudarris the.
Aap ne apne waalid ta’aleem haasil ki.
Aap Haafize Qur’an hue.

******************
1289 Hijri (1872 A.D.) me Aap ke waalid ke inteqaal ke baad Aap ko Kalyan ki masjid me Imaam muqarrar kiya gaya.

*****************
1309 Hijri (1892 A.D.) me Aap ne apni waalida aur biwi ke saath Hajje Baitullāh ada kiya.

Apne watan waapas aane ke baad kuchh arse baad Aap ne Baghdad jaane ka iraada kiya.

Aap Baghdad me Hazrat Ghulaam Mustafa Qaadri Effendi rahmatullāhi alaihi ke mureed hue aur un se faiz wa ta’aleem haasil ki.

Kuchh mahine Hazrat Ghauṡe aazam rahmatullāhi alaihi ke mazaar par mujaahida kiya.
Phir Hazrath Ghulaam Mustafa Effendi rahmatullāhi alaihi ne Aap ko Hindustan waapas jaane ke liye farmaaya.

*******************
Aap Hindustan waapas aaye aur Hyderabad me Qutb-e-Kokan Hazrat Khwaja Habeeb Ali Shaah Chishti rahmatullāhi alaihi ke mureed hue.
Hazrat ki ek nazre tawajjoh se Aap wajd me aa gaye aur isi haal me 2 din tak rahe. Hosh me aane par Hazrat ne Aap ko mohabbat ke saath gale lagaaya.
Aap ne Hazrat ki khidmat me rehkar Tasawwuf ki ta’aleem haasil ki.

Phir Peer ke farmaan par Aap Kalyan waapas aaye aur Imaamat wa Tadrees karte rahe.

****************
Ek martaba Hazrat Khwaja Habeeb Ali Shaah Hazrat Khwaja Naasir-ud-deen Chishti Chiraagh e Delhi rahmatullāhi alaihi ke urs ke mauqe par Hazrat ke mazaar par haazir hue to Hazrat ne Hazrat Habeeb Ali Shaah ko bashaarat di aur Hazrat Shaah Ghulaam Muhammad Soofi ko South Africa bhejne ke liye farmaaya.

Aap 1312 Hijri (1895 A.D.) me South Africa tashreef laaye aur Durban me Grey Street Masjid me qayaam kiya. Yaha Sayyed Rukn-ud-deen, Fazl-ud-deen aur dusre log Aap ke baare me jaanakar Aap ki khidmat ke liye tayyaar hue. Aaakhir me tay hua ke Aap Imaam saahab ke ghar me qayaam farmaenge aur baaqi log Aap ke khaane ka intazaam karenge.

Durban aane ke baad Aap ne muraaqaba karke majdoob Hazrat Shaikh Ahmad Baadshaah Peer rahmatullāhi alaihi [Wisaal 6 Rabi-ul-Awwal 1303 Hijri (1886 A.D.)] ki turbat mubarak talaash karke mazaar banaaya.

Aap ne zameen khareedkar Umgeni nadi ke kinaare apni Khaanqaah taameer ki aur ta’aleem wa tadrees shuru ki.

Is ke baad jab Aap khaanqaah ke liye jagah talaash kar rahe the tab ek jagah Aap ko pasand aai. Jab Aap aage ki taraf jaane lage to Narain Swami naam ke ek hindu shakhs ne Aap ko roka aur bataaya ke ‘Pichhe ek pahaad me ek khatarnaak azdaha rehta hai. Us ke dar ki wajah se logo ne us jagah ke qareeb jaana bhi chhod diya hai.’ Aap ne use wo jagah khareedne ka maqsad bataaya. Us ne kaha ‘Main zameen bechne ke liye tayyaar hu kyun ki azdaha ke dar se koi use kharidna nahi chaahta.’
Zameen khareedne ke baad Aap ne sab ko apne saath aane ke liye kaha. Aap aage aage be-khauf hokar chal rahe the magar dusre log dar rahe the. Jab us maqaam par pahunche to sab log thoda door rook gaye. Aap ne aage jaakar farmaaaya ‘Main ye jagah kharedne ke liye aaya hu aur yaha Islaam ki aur Chishti silsila ki isha’at ke liye aaya hu.’ Kuchh hi lamho me wo azdaha waha aaya aur Aap ke qadmo me sar rakhkar kuchh der tak rooka. Phir waapas chala gaya aur hamesha ke liye gaa’ib ho gaya.

****************
1314 Hijri (1897 A.D.) me Aap ne apni waalida ko aur pariwaar ko Durban bula liya.

15 saal tak Aap isha’ate Islaam aur khidmate khalq karte rahe.
Aap ne Masjid, Madrasa, Langar-khaana, Yateem khaana, Musaafir-khaana, Dawa-khaana, aur Mawaali-khaana (Rehabilitation Centre) taameer kiye.

Aap ne Ladysmith, Cape Town, Colenso, Tongaat, Butha, Buthe,Verulam, Pietermaritzburg aur Newcastle me bhi khaanqaah banai.

Aap Meelaad-un-Nabi sallallāhu alaihi wa sallam aur Buzurghaan-e-deen ke urs ke mauqe par Mehfil-e-Meelaad aur Mehfil-e-Zikr munaaqid karte.

Aap ki taaleem se bahot saare log Islaam me daakhil hue.

*******************
Jab log bai’at ke liye israar karne lage to 1318 Hijri (1900 A.D.) me Aap Hindustan aaye aur Hazrat Habeeb Ali Shaah rahmatullāhi alaihi ne ‘Chishti Naasiri’ silsila ki khilaafat aur Ijaazat ata farmai.

Zil Hijjah 1323 Hijri (1906 A.D.) me apne Peer ke wisaal par Aap phir se Hindustan tashreef le gaye.

***************
Pariwaar :
‾‾‾‾‾‾‾‾‾‾‾‾‾
Aap ki 2 biwiya, 7 saahabzaade aur 3 saahabazaadiya hain.

[1] Bibi Zainab binte Qaazi Muhammad Yousuf Siddeeqi [Nikaah – 1296 Hijri (1879 A.D.)] se
6 saahabzaade aur 3 saahabzaadiya.
Saahabzaade :
(1) Shaah Mohammad Ibrāheem Soofi
(2) Shaah Abdul Azeez Soofi
(3) Shaah Abdul Qaadir Soofi
(4) Shaah Ghulaam Haafiz Soofi.
(5) Shaah Mohamad Habeeb Soofi
(6) Shah Ghulaam Fareed Soofi.

[2] Bibi Haneefa [Nikaah – 1307 Hijri (1890 A.D.)] se
1 saahabzaada.

*******************
Aap Hazrat Khwaja Habeeb Ali Shaah Chishti rahmatullāhi alaihi ke mureed aur khalifa hain.
Aur ‘Chishti Naasiri Habeebi’ silsila ke shaikh hain.

Aap ke khulfa :
(1) Hazrat Maulana Abdul Lateef Siddeeqi rahmatullāhi alaihi,
(2) Hazrat Hasan Mianjee rahmatullāhi alaihi.

*****************
Rabi uṡ ṡaani 1329 Hijri (April 1911 A.D.) me Aap Hindustan ke aakhri safar se waapas aaye.

Wisaal ke 2 din pehle Aap ko tez bukhaar aaya.
2 Rajab 1329 Hijri (29 June 1911 A.D.) ko Hazrat Shaah Abdul Azeez Soofi aur Hazrat Hasan Mianjee ke sahaare apne ghar ke darwaaze par khade hokar Aap ne khaanqaah ki taraf dekha aur ‘ALLĀH ta’ala us ke Habeeb sallallāhu alaihi wa sallam ke sadqe me hamari is koshish ko qubool famae aur khaanqaah ki hamesha hifazat farmae.’
Phir moazeen ne namaaze Zohar ke liye azaan pukaari us waqt Aap ka inteqaal hua.

***************
Aap ka wisaal 2 Rajab 1329 Hijri (29 June 1911 A.D.) ko Jumeraat ke roz hua.

Hazrat Hasan Mianjee ne Aap ki tajheez ki aur namaaze janaaza padhai.

Aap ka mazaar Durban (South Africa) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaah Ghulaam Muhammad Soofi Saaheb rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.