Hazrat Shaah Abul KhairAbdullāh Naqshbandi Mujaddidi rahmatullāhi alaihi

53597406_1524802264320959_2535546540332679168_n

Hazrat Shaah Abul Khair, Abdullāh Naqshbandi Mujaddidi rahmatullāhi alaihi :

Aap ki wilaadat 27 Rabi ul Aakhir 1272 Hijri (6 January 1856 A.D.) ko hui.

Aap ke waalid ka naam Hazrat Shaah Muhammad Umar Rampuri bin Khwaja Shaah Ahmad Saeed al-Faarooqi rahmatullāhi alaihi hai.

Aap Hazrat Mujaddid-e-Alfe-Ṡaani Imaam Shaikh Ahmad Faarooqi Sirhindi rahmatullāhi alaihi ki nasl se hain.

Aap ke waalid ko marz ki wajah se aulaad nahi thi. 1266 Hijri (1849 A.D.) me bab woh Ajmer shareef gaye to unho ne ladke ke liye dua ki. Khwaja Ghareeb nawaaz ke sadqe tufail ALLĀH ta’ala ne apne fazl se beta ata farmaaya.

*******************
Ek martaba Aap ke chacha Hazrat Shaah Muhammad Mazhar rahmatullāhi alaihi Madeena munawwara me Huzoor Nabi e kareem sallallāhu alaihi wa sallam ke roza mubarak par muraaqaba kar rahe the. Huzoor sallallāhu alaihi wa sallam ne farmaaya “Jaao! Hamari taraf se apne Bhatije ko Chaadar odhaao aur use Hindustan jaane ke liye kaho.” Chunaanche Aap ke chacha Aap ke paas aaye aur khushi me rote hue apni Chaadar Aap ke kandho par daali aur Huzoor sallallāhu alaihi wa sallam ka farmaan bataaya.

*******************
Bashaarat milne ke baad 1306 Hijri (1888 A.D.) me Aap apni biwi aur ek khaadim ke saath khaamoshi ke saath Hijaaz muqaddas se Delhi tashreef laaye. Aur Khaanqaah Shaah Ghulaam Ali ki zimmedaari sambhali.
Aap 35 saal tak khidmate deen karte rahe aur ta’aleem wa faiz ata farmaate rahe.
Shuruat me Aap ibaadat o riyaazat aur mujaahida me mashgool rahe aur shohrat se door rehna chaahte the. Lekin aahista aahista Hindustan aur dusre mulko se log Aap ki baargaah me haazir hone lage.

*******************
Aap ne Masjid aur Dargaah ki tajdeed wa tarmeem ki.
‘Tasbeeh khaana’ ya’ani Khaanqaah ka jis hisse me Hazrat Shaah Ghulaam Ali Dehlawi rahmatullāhi alaihi ibaadat wa riyazat karte the us ki bhi ta’ameer ki.

*******************
Ek martaba garmi ke mausam me Aap Makka mukarrama se Taa’if tashreef le gaye. Waha Aap Hazrat Abdullāh ibne Abbaas radiy-Allāhu ta’ala anhu ke mazaar par haazir hue. Muraaqabe me Hazrate Abdullāh ibne Abbaas ne Aap se farmaaya “Hamari Masjid me Aaj Juma’a ki namaaz tum padhaaoge”. Aap hairaan hue ke yeh kaise ho sakta hai jab ke Masjid ke Imaam muqarrar hain.
Thodi der me Moazzin ne aa kar Aap se kaha “Imaam saahab ki tabiyat kharaab ho gai hai, Lihaaza Aap namaaz padhaa’ie.” Chunaanche Aap ne namaaz padhai.

*******************
Aap ke 3 saahabzaade hain :
(1) Shaah Abul Faiz Bilaal,
(2) Shaah Abul Hasan Zaid,
(3) Shaah Abul Sa’ad Saalim.

*******************
Aap (apne waalid) Hazrat Shaah Muhammad Umar Rampuri Naqshbandi Mujaddidi rahmatullāhi alaihi ke mureed aur khalifa hain.

Aap ke khulfa :
(1) Hazrat Shaah Abul Faiz Bilaal Mujaddidi al-Faarooqi rahmatullāhi alaihi,
(2) Hazrat Shaikh Abul Hasan, Zaid Mujaddidi al-Faarooqi rahmatullāhi alaihi,
(3) Hazrat Shaah Abul Sa’ad Saalim Mujaddidi al-Faarooqi rahmatullāhi alaihi.

*******************
Aap ka wisaal 29 Jamaadi uṡ ṡaani 1341 Hijri (16 February 1923 A.D.) ko hua.

Aap ka mazaar Delhi me Khaanqaahe Mazhariya me Hazrat Shaikh Abu Saeed Mujaddidi rahmatullāhi alaihi ke bagal me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaah Abul Khair, Abdullāh Naqshbandi Mujaddidi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.