Hazrat Sayyed Shah Ali Ji Gaamdhani Rifai rahmatullāhi alaihi

43551145_1422588444542342_3190610846329864192_n

Alqaab :
‾‾‾‾‾‾‾‾
Gaamdhani, Maashooqullāh.

****************
Aap ki wilaaadat 897 Hijri (1492 A.D.) me hui.

Aap ke waalid ka naam Hazrat Sayyed Ibrāheem Jamaalullāh bin Sayyed Umar Rifai rahmatullāhi alaihi aur waalida ka naam Aamena Begum bint Sayyed Mohammad Subul Hasan Qaadri al- Jeelaani rahmatullāhi alaihi hai.

Aap Husaini saadaat hai.
Aur Hazrat Sayyed Ahmad Kabeer Rifai rahmatullāhi alaihi ki nasl se hain.

Aap ke pardaada Hazrat Sayyed Shaah Nazm-ud-deen Abdur Raheem Mehboobullāh Rifai rahmatullāhi alaihi 752 Hijri me Huzoor sallallāhu alaihi wa sallam ke farmaan par Iraq se Hindustan me Siddhpur Patan (Gujarat) aaye aur phir waha se Ahmedabad aakar sukoonat pazeer hue.

****************
Aap paida’ishi wali the. Bachpan me bhi Aap ko kabhi khelne me dilchashpi nahi thi.

Aap ne apne waalid se ta’aleem haasil ki.
Aap 7 saal ki umr me Haafiz e Qur’an hue.
Aap ne Qur’an, Hadeeṡ, Fiq’h aur Tasawwuf ka ilm haasil kiya.

****************
Aap Arabi, Faarsi, Urdu, Hindi, Sanskrit aur Gujarati ke maahir the.

Aap ki likhi hui kitaab ‘Majmua e Jawaahir e Asraarullāh’ mash’hoor hai.

****************
Aap ko jaagte hue Huzoor Rasool-Allāh sallallāhu alaihi wa sallam ki ziyarat ki sa’adat haasil hui. Aap ne Huzoor sallallāhu alaihi wa sallam qadam mubarak ko chume aur Huzoor Rasool-Allāh sallallāhu alaihi wa sallam ne aap se Muaneka (gale milna) kiya aur aap ko apna Imaama ata farmaaya.

Aap ko khwaab me Hazrat Ghauṡe aazam Abdul Qaadir Jeelaani aur Hazrat Ahmad Kabeer Rifai rahmatullāhi alaihi ki bhi ziyarat hui aur unho ne Aap ko Imaama ata farmaaya.

****************
Aap roz jaanwaro aur parindo ko daane khilaate aur apne khet ne un ke liye paani bharkar rakhte.

****************
Karaamat :
‾‾‾‾‾‾‾‾‾‾‾‾‾‾
Sultaan Muzaffar Haleem Shaah Me’araaj-un-Nabi sallallāhu alaihi wa sallam par aitraaz karta tha. Aap ne use phool ke zariye Kohe Kaaf ki safar karaaya aur us ka shak door kiya.

****************
Aap ka 1 beta aur 1 beti hain.

Saahabzaada : Shaikh Mustafa Irfaan Rifai.

Aap ki beti ka nikaah Hazrat Sayyed Shaikh Ahmad bin Hasan al-Amudi se hua.

****************
Aap apne waalid Hazrat Sayyed Ibrāheem Jamaalullāh Rafai rahmatullāhi alaihi ke mureed aur khalifa hain.

Aap ke khalifa Hazrat Sayyed Shaikh Abdul Qaadir bin Sayyed Shaikh Ahmad rahmatullāhi alaihi hain.

****************
Aap ka wisaal 17 Safar 970 Hijri (October 1562 A.D.) ko hua.

Aap ka mazaar Jamalpur Road, Ahmedabad (Gujarat) me hai.

****************
ALLAH ta’ala us ke Habeeb sallallaāhu alaihi wa sallam ke sadqe me
Aur Hazrat Sayyed Shaah Ali Ji Gaamdhani Rifai rahmatullāhi alaihi aur tamaam Auliya Allah aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.