Hazrat Sayyed Shaah Wajeeh-ud-deen Ahmad Alwi Gujarati rahmatullāhi alaihi

43411809_1409924542475399_3178256695025467392_n

Laqab :
‾‾‾‾‾‾‾‾‾
Ustaad-ul-Hind.

****************
Aap ki wilaadat 22 Moharram 910 Hijri (1504 A.D.) ko Champaner (Gujarat) me hui.

Aap ke waalid ka naam Hazrat Qaazi Sayyed Nasrullāh bin Qaazi Sayyed Amaad-ud-deen rahmatullāhi alaihi hai.

Aap Husaini saadaat hain.
Aur Hazrat Imaam Sayyed Mohammad Taqi al-Jawwaad rahmatullāhi alaihi ki nasl se hain.

****************
Agar Aap ki waalida be-wuzu hoti to Aap doodh nahi peete the.

****************
Aap ta’aleem ke liye Ahmedabad tashreef laaye.
Aur Hazrat Maulana Imaad-ud-deen Taarmi rahmatullāhi alaihi se ta’aleem haasil ki.
Jab Hazrat ka wisaal hua to Aap ko afsos hua ke Hazrat se majeed ta’aleem bhi haasil kar leta.
Ek roz Huzoor Nabi e kareem sallallāhu alaihi wa sallam khwaab me tashreef laaye farmaya ke ‘Aye farzand! Magmoom na ho jitne Uloom tumhare Ustad ko ma’aloom the us se zyada hum tumhe inaayat karte hain.’ Aur ek kaagaz dikhaaya jis par Uloom ke naam tehreer the.
Aap farmaate hain ke ‘Us ke baad main jis kisi ilm ki jaanib mutawajjeh hua to kuchh hi waqt me aisa ma’aloom hota ke main is ka maahir ho gaya hu.’

Aap 9 saal ki umr me Hazrat Shaikh Qaazan Chishi Naharvali rahmatullāhi alaihi ke mureed hue aur Hazrat se uloom-e-baatini ki ta’aleem haasil ki..

Aap ne Hazrat Abul Barkaat Mohaddeeṡ Abbaasi Bunyani rahmatullāhi alaihi se uloom-e-baatini ki ta’aleem haasil ki.
Hazrat Badr-ud-den Shaah Bada bin Abul Qaasim Siddeqi aur Hazrat Najm-ud-deen Siddeeqi se Silsila e Suharwardi ke Ahgaal wa Azkaar ki ta’aleem haasil ki.

****************
Aap 10wi sadi ke Mujadded e Islaam hain.
Aap ‘Haidar Ali ṡaani’ ke naam se bhi mash’hoor hain.

Aap Aalim aur Mufti the.
Aap Qur’an, Fiq’h, Ilme Istadalaal aur Ilme Riyaazi ke maahir the.

Aap 65 saal tak ta’aleem wa tadrees karte rahe.
80000 logo ne Aap se ta’aleem haasil ki.

Hazrat Shaikh Ala-ud-deen Ali al-Muttaqi rahmatullāhi alaihi ne (953 Hijri me) aur Hazrat Shaikh Abdul Haq Muhaddeeṡ Dehlawi rahmatullāhi alaihi ne (995 Hijri me) bhi Aap ki sohbat me rehkar faiz aur ta’aleem haasil ki.

Shaahi khaandan ke log Fatwa ke liye Aap ki baargaah me aate the.
Ahmedabad ke governor Murtuza Khan Bukhari Aap ke mureed the.

****************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :

(1) Risaala Jannate Adana ala Tafseer-e-Bayzaawi
(2) Haashiya Bayzaawi
(3) Haashiya ala Tafseer-e-Rahmāni
(4) Sharhe Nakhbaake Usool-e-Hadeeṡ
(5) Sharhe Tajreed
(6) Haashiya Alat Talbeeh fee Usool-il-Fiq’h
(7) Haashiyah Hidaayah
(8) Haashiyah Sharhe Wakaayah
(9) Haashiyah ala Sharhe Aqaa’id Taftazaani
(10) Sharh Mukhtasar ul Usool be Ibnul Haajib
(11) Haashiyah Ansari
(12) Haashiyah Kashf-ul-Usool
(13) Haasshiyah Shifa Qaazi Ayaaz
(14) Sharhe Basit fil Faraa’iz
(15) Risaalatun Nafikariyah fee ajawabanutfaqriyah
(16) Sharhe Madeemiyah
(17) Haashiyah Sharhe Chagmini
(18) Haashiyah Mukhtasar Ma’ani
(19) Haashiyah Ashaf khaani
(20) Sharhe Wajeezah
(21) Risalah al-Kalaam
(22) Haashiyah ala Sharhain al-Fataah fee Ilmul ma’ani wal bayaan
(23) Haashiyah ala Sharhil Msawaafiqe feel Kalaam
(24) Haashiyah Sharhe Mutaalia
(25) Haashiyah ala Sharhil Alaamatul Jaami
(26) Haashiyah Kafiyah fin Nahaw
(27) Haashiyah al-Jalaaliah
(28) Haashiyah Ala Minhul Alaamatul Imaamayni
(29) Vaafiyah Sharhe Kaafiyah
(30) Shaashiyah Ala Haashiyatul Khiyaali
(31) Sharhe Ibaat Minhul Imaamayni
(32) Sharhe Ibaate Tasheel
(33) Sharhe Tohfa e Shaahiya
(34) Haashiyah Sharhe Fawaa’ide Zeeyaih
(35) Sharhe Irshaad Qaazi Shahaab-ud-deen Daulatabadi
(36) Haashiyah Matul Ilme Ma’ani
(37) Haasiyah Zubdah
(38) Sharhe Shami Yah feel Manteeq
(39) Haashiyah Sharhe Tahzeeb
(40) Haashiyah Ainul Miftaah
(41) Haashiyah Kutbi Manteeq
(42) Sharhe Hikmatil Ayan
(43) Sharhe Lawaayehe Jaami
(44) Sharhe Kaleed Makhaazin (Faarsi)
(45) Haashiyah alal Sharhe Tazkeerah Nishapuri
(46) Sharhe Risaalah ala Kawshanji feel Hay’ate farasi
(47) Sharhe ala Jaamjahaan nooma (Faarsi)
(48) Risaalah Al-Kabb
(49) Risaalah Waqafe A’edaad
(50) Haqeeqate Mohammadiyah
(51) Risaalah Tarteeb fis Salaat
(52) Risaalah Eimaan
(53) Risaalah fee Tehqeeq-e-Iblees
(54) Hashiyah bar Haashiyah Mohqeeqe Dawaan
(55) Risael Tafseer Wallazeena Aaman Bi’eimaan
(56) Risaalah Fa-ammaa man sakolat mawaazinohu
(57) Haasiyah ala Kitaab us Sayyed shareef Jarjaani
(58) Risaalah Fee Ajaaybatul E’ateraazaat al-faqeeh ala Faazeese Hindi
(59) Haashiyah Bazudi
(60) Risaalah Tirik e Bai’at
(61) Al Mukhtasar ul Maulud alal Eimaan Jazari
(62) Abdul Awaraad ul Wajeeh
(63) Muktubaat Sharh
(64) Haashiyah Sharh Maksi’on Hanar
(65) Mukhtasir Talkhees
(66) Haashiyah Zaweri.

****************
Aap hamesha saadgi aur faqr pasand farmaate the.
Aap ke paas jo bhi maal batore hadiya aata wo sab Aap ghareebo aur haajat-mando ko taqseem kar dete.

****************
Qaul :
‾‾‾‾‾‾‾‾
Gharibo jaeefo ki madad karna ye Haath ki ibaadat hai, Rishtedaar, Ulama e deen aur Auliyae kiraam se milne ke liye jaana ye Pair ki ibaadat hai, Qudrat ke manzar dekhkar khaufe khuda paida hona ye Aankh ki ibaadat hai, Kalaame Ilāhi padhna ye Zabaan ki ibaadat hai, Duniya se door rehna aur aakhirat ki taraf mutawwajeh rehna ye Dil ki ibaadat hai, aur Khuda se mulaqaat ka shauq hona ye Rooh ki ibaadat hai.

****************
Karaamat :
‾‾‾‾‾‾‾‾‾‾‾‾
Ek Martaba Aap apne kuchh shaagirdo ke saath Hazrat Shaikh Ahmad Ganj-bakhsh Khattu rahmatullāhi alaihi ke mazaar shareef ki ziyarat ke liye jaa rahe the. Raaste me ek Haathi achanak paagal Aur be-qaabu ho gaya aur waha afra tafri mach gai.
Wo Haathi Aap ki taraf daudta hua aaya. Aap ki sawaari aise chhote raaste par thi ke us ko aage pichhe karna mushkil tha. Be-qaabu haathi ko aata dekh saare shaagird ghabrae.
Hazrat ne farmaaya ‘Ghabrao nahi.’ aur apni Jooti mubarak us paagal haathi ki taraf phenki. Jaise hi Aap ki jooti us haathi par padi wo bilkul khaamosh ho gaya aur ek taraf chala gaya.

****************
Aap Hazrat Shaikh Qaazan Chishi Naharvali rahmatullāhi alaihi ke mureed aur khalifa hain.
Hazrat Sayyed Shaah Muhammad Ghauṡ Gwaliori rahmatullāhi alaihi ne ‘Shattaari’ silsila ki, aur (Aap ke waalid) Hazrat Qaazi Sayyed Nasrullāh rahmatullāhi alaihi ne Maghrib aur Chishti silsile ki Khilaafat ata farmai hai.

Aap ke khulfa :
(1) Hazrat Shaikh Abdullāh Husaini Shattaari rahmatullāhi alaihi (Ahmedabad)
(2) Hazrat Shaikh Ba-yazeed Sirhindi rahmatullāhi alaihi,
(3) Hazrat Sayyed Sibghatallāh al-Barwaji rahmatullāhi alaihi (Madeena munawwara)
(4) Hazrat Shaikh Abdul Qaadir rahmatullāhi alaihi (Ujjain)
(5) Hazrat Shaikh Abu Turaab rahmatullāhi alaihi (Lahore).

****************
Aap ka wisaal 28 Moharram 1018 Hijri (1580 A.D.) ko hua.

Aap ka mazaar Khanpur, Ahmedabad (Gujarat) me hai.

****************
Aap ke mazaar ke qareeb ek kunva hai. Goonge aur totle (jo sahi tareeqe se bol nahi paate) ko kunve ka paani pilakar Aap ke waseele se dua karne se ALLĀH ke fazl se shifa milti hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Wajeeh-ud-deen Ahmad Alwi Gujarati rahmatullāhi alaihi aur tamaam Auliya Allāh aur Ahle bait aur Ashaaba ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.