Hazrat Sayyed Shaah Najm-ud-deen Qalandar rahmatullāhi alaihi

40533167_1385863928214794_9068635931526823936_n

Alqaab :
‾‾‾‾‾‾‾‾‾‾
Peerane Dhar, Qutb-ul-Aqtaab.

*************
Aap ki wilaadat 637 Hijri (1234 A.D.) me Delhi me hui.

Aap ke waalid ka naam Sayyed Nizaam-ud-deen bin Sayyed Noor-ud-deen Mubarak Ghaznawi hai.

Aap ke daada Baghdad se Hindustan tashreef laaye the.

*************
Aap ne Arab aur Ajam ke kai mulk – Hijaaz, Yemen, Rum, Spain, China wagairah ka safar kiya.

Aap Makka mukarrama me 50 saal tak muqem rahe. Aap Roza rakhkar beri ke patto se iftaar karte. 42 martaba Hajj ada kiye. 40 saal tak Hujjaaje kiraam ko paani pilaaya.

Aap 30 saal tak ek patthar baithkar ibaadat karte rahe. Jab Aap zikr-e-qalbi karte to Aap dil me ‘Allāhu’ ka zikr karte to us patthar se bhi yehi aawaaz aati.

Kuchh arse baad Aap Hindustan waapas tashreef laaye.
826 Hijri (1423 A.D.) me Aap Mandav gadh aaye aur Nalchha gaanv me Chandola taalaab ke qareeb muqeem hue aur ibaadat wa riyazat karte rahe aur logo ko faiz wa ta’aleem at farmaate rahe.

*************
Karaamat :
‾‾‾‾‾‾‾‾‾‾‾‾‾‾
(1) Ek martaba Aap ka khaadim chiraagh ke liye tel lene bazaar jaa raha tha. Aap ne farmaaya ‘Isi (Chandola) taalaab se tel lekar daal do aur Chiraagh roshan kar lo.’ Khaadim ne Aap ke farmaan ki taamil ki aur paani se chiraagh jalne lage.
Logo ko jab is baat ki khabar hui to tamaam log us taalaab se paani le jaakar chiraagh jalane lage. Ek roz jab bahot bheed jama ho gai to Aap ne farmaaya ke ‘Taalaab me to paani hai, tel kaha se aaya?’ Foran taalaab me phir se paani ho gaya.

(2) Ek martaba Hazrat Sayyed Makhdoom Ashraf Jahaangeer Simnani rahmatullāhi alaihi ne safar me Aap ko daawat ki. Dusre din Aap ne bhi Hazrat Makhdoom Ashraf ko un ke sab saathiyo ke saath daawat par bulaaya. Aap ke paas koi saamaan na tha. Aap ne deg chulhe par rakhkar jo kuchh sabzi-patte the wo us me daal diye. Aur farmaaya ke ‘Jo shakhs jis qism ka khaana maange use whi khaana deg me se nikaalkar khilaao. Chunaanche har shakhs ko us ki khwaahish ke mutaabiq khaana usi deg me se khilaaya gaya.

(3) ALLĀH ta’ala ne Aap ko Qalandar ka martaba ata farmaaya tha aur ALLĀH ta’ala ke fazl se Aap roohaani quwwat se ek waqt me ek saath kai jagah par dekhe jaa sakte the.

*************
Aap Hazrat Khwaja Khizr Rumi rahmatullāhi alaihi ke mureed aur khalifa hain.
Hazrat Meer Sayyed Noor-ud-deen Mubarak Ghaznawi rahmatullāhi alaihi ne Aap ko ‘Qaadri’ silsila ki khilaafat ata farmai hai.

Aap se ‘Chishti Qalandari’ silsila jaari hai.

Aap ke khalifa :
Hazrat Shaah Qutb-ud-deen Bina e dil Qalandar rahmatullāhi alaihi.

*************
Aap ka wisaal 20 Zil Hijjah 837 Hijri (28 July 1434 A.D.) ko hua.

Aap ka mazaar Nalcha, Dhar (Madhya Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Najm-ud-deen Qalandar rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.