Hazrat Sayyed Shaah Fazlullāh Kalpawi rahmatullāhi alaihi

38018066_1345074622293725_7369576783676440576_n

Hazrat Sayyed Shaah Fazlullāh Kalpawi rahmatullāhi alaihi :

Alqaab :
‾‾‾‾‾‾‾‾‾‾
Sayyed-us-Saalikeen, Zubdatul Kamileen, Siraaj-ul-Ulama, Raahbar-e-Fuzala.

****************
Aap ki wilaadat Kalpi me hui.

Aap ke waalid ka naam Hazrat Meer Sayyed Ahmad Kalpawi bin Meer Sayyed Muhammad rahmatullāhi alaihi hai.

Aap ke pardaada Tirmiz se Jalandhar aaye the. Aur phir Aap ke pardaada Sayyed Abu Saeed Jalandhar se Kalpi tashreef laaye the.

****************
Aap ne apne waalid Hazrat Meer Sayyed Ahmad Kalpawi rahmatullāhi alaihi se ta’aleem wa tarbiyat haasil ki.

****************
Phir khalq e khuda ki hidayat me mashgool hue.

Aap apne waqt ke azeem Masha’ikh me se hain.
Aap Jaame-ul-Ilm wa Daanish e Zaahir o baatin the aur Zohad o Taqwa aur Ibadaat wa Riyaazat me mumtaaz the.

****************
Ek roz 4 shakhs Aap ki khidmat me haazir hue aur arz kiya ke “Huzoor! Hamare dil dunya ki mohabbat ki wajah se patthar ho gaye hain aur kabhi hamari aankho me aansoo nahi aate. Aap ka naam sunkar hum bahot door se aaye hain.”
Us waqt Aap apne watan Jalandhar ko ek khat likh rahe the. Aap ne khat likhna band kar diya aur phir aisi nigaahe tawajjoh farmai ke wo chaaro shakhs ‘Murg e Bismil’ ki tarah tadapne lage.
Aap ke mubarak chehre se ek roshni nikli aur sutoon se takrai aur aaine ki tarah chamakne lagi. Wo chaaro shakhs haalate be-khudi me behosh pade rahe. Phir jab un ko ifaaqa hua to Aap ke daste haq parast par Bai’at ka sharf haasil kiya.

Isi tarah beshumaar log Aap ki zaate baa barkat se faizyaab hue.

****************
Aap (apne waalid) Hazrat Meer Sayyed Ahmad Kalpawi rahmatullāhi alaihi ke mureed aur khalifa hain.

Aap ke khalifa Hazrat Sayyed Shaah Barkaatullāh Marehrawi rahmatullāhi alaihi hain.

****************
Aap ka wisaal 14 Zil Qa’ada 1111 Hijri (3 May 1700 A.D.) ko Jumeraat ke roz hua.

Aap ka mazaar Kalpi (Uttar Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Fazlullāh Kalpawi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.