Hazrat Sayyed Noor Muhammad Badayuni Naqshbandi Mujaddidi rahmatullāhi alaihi

37742972_1338841556250365_4623852402351538176_n

Aap ki wilaadat 1075 Hijri (1664 AD.) me hui.

********************
Aap ne Hazrat Muhammad Shareef se ta’aleem haasil ki.

*******************
Aap Hazrat Khwaja Shaikh Muhammad Saif-ud-deen Sirhindi Naqshbandi rahmatullāhi alaihi ke mureed hue aur Hazrat ki khidmat me rehkar ta’aleem wa faiz haasil kiya.

Hazrat ke wisaal ke baad Aap ne Hazrat Haafiz Muhammad Mohsin Dehlawi rahmatullāhi alaihi se ta’aleem wa faiz haasil kiya.

*******************
Aap har amal Sunnate Rasool ke mutaabiq karte.
Puri zindagi Aap ke dastar khwaan par ek saath 2 sabziya nahi rakhi gai.
Aap kabhi Ameero ki taraf se bheja gaya khaana nahi khaate the. Aur farmaate ke ‘Bahot kam mumkin hai ke Ameero ka khaana haraam maal se paak ho.’

********************
Aap ke pados me ek shakhs rehta tha. Us ne manshiyat faroshi (nasha laane waali cheez bechna) shuru ki. Aap ne farmaaya ‘Manshiyat faroshi ki taariki hamari roohani safar me rukaawat daal rahi hai.’ Aap ka ek shaagird us shakhs ko zabar dasti waha se door chhod aaya. Jab Aap ko is baat ka pata chala to Aap ne farmaaya ‘Ab hamari roohaniyat ko aur zyada rukaawat ho gai hai. Pehle us shakhs ko naseehat deni chaahiye.’ Aap ne us shakhs ko talaash karke bulaaya aur apne shaagirdo ki jaanib se muafi maangi. Phir use kuchh raqam di aur irshaad farmaaya ‘Tumhe is haraam rozgaar se door rehna chaahiye aur halaal kamaai ka tareeqa apnaana chaahiye.’ Aap ke is husne sulook se us shakhs par aisa aṡar hua ke us ne foran tauba ki.

********************
Aap saahibe kashf the aur aane waale zaa’ireen ke baatini haal ko bhi jaan lete aur unhe naseehat farmaate.

Ek martaba ek mureed raaste me ek ghair mehram aurat ko taak kar aaya. Jab wo Aap ke paas aaya to Aap ne farmaaya ‘Tum se Zina ki taariki dikhti hai. Lagta hai ke tum kisi ghair mahram aurat ko taak kar aaye ho.’ Phir Aap ne apne faiz se us ki roohaani taariki door farmai.

Ek martaba ek mureed Sharaabi se baat karke Aap ke paas aaya. Aap ne us se farmaaya ‘Tum se Sharaab ki taariki dikh rahi hai. Lagta hai ke tum Sharaabi se baat karke aa rahe ho.’

Ek martaba 2 aurat Aap ka imtihaan lene ke iraade se Aap ki baargaah me aai aur kaha ke ‘Hum aap se baiat karne ke liye aai hain.’ Aap ne farmaaya ke ‘Tum Raafzi firqe se ho. Pehle tauba karke apna aqeeda sahi karo. Is ke baad hi tum Silsila me daakhil ho sakti ho.’ Ye sunkar un me se ek aurat ne tauba ki aur Aap ki mureed hui. Dusri aurat mureed hue bagair waha se laut gai.

Apa farmaate ke ‘Gunaahgaar logo ki sohbat se Roohaani nisbat par dhabba lag jaata hai.’

Isi tarah agar koi shakhs Kalma ya Durood shareef padhkar Aap ki baargaah me jaata to Aap khush ho jaate aur us ke amal ko bhi bata dete.

********************
Agar mureed door ho to bhi Aap un ki khata se waaqif rehte aur unhe tambih farmaate.
Ek martaba Aap ka ek mureed sohbat ke iraade se ek aurat ke paas gaya. Achaanak un ko Hazrat ka chehra dikhaai diya. Wo aurat dar gai aur ek kone me chali gai. Is tarah Aap ne apne mureed ko gunaah karne se bacha liya.

********************
Karaamat :
‾‾‾‾‾‾‾‾‾‾‾‾‾‾
Ek martaba ek aurat Aap ki baargaah me aai aur kaha ke meri ladki gum ho gai hai aur mil nahi rahi hai. Aap ne us aurat ki taraf dekha aur phir muraaqaba karne lage. Phir Aap ne farmaaya ‘Falaan roz falaan waqt par tumhari ladki aa jaayegi.’ Aap ke bataaye hue waqt par us aurat ki ladki us ke ghar par aa gai. Us se puchha to us ne bataaya ke ‘Ek jinn mujhe le gaya tha. Main ek sehra me tanha baithi hui thi. Ek buzurg aaye aur mera haath pakadkar mujhe yaha lekar aaye.’
Kisi ne Aap se puchha ke ‘Aap ne us aurat ko thoda intazaar karaaya aur phir kaha ke us ki ladki waapas aa jaayegi. Aisa kyun?’ Aap ne farmaaya ke .Maine muraaqaba karke ALLĀH se ye guzaarish ki ke agar mujh me waha tak pahunchne ki taaqat na ho to tere karam se mujhe madad farma.’ ALLĀH ne mujhe wo taaqat ata ki aur phir main aage badha aur us ladki ko hifaazat ke saath waapas lekar aaya.’

********************
Aap Hazrat Khwaja Shaikh Muhammad Saif-ud-deen Sirhindi Naqshbandi rahmatullāhi alaihi ke mureed aur khalifa hain.
Hazrat Haafiz Muhammad Mohsin Dehlawi rahmatullāhi alaihi ne bhi Aap ko khilaafat ata farmai hai.

Aap ke khalifa :
Hazrat Shams-ud-deen Mirza Mazhar Jaan-e-Jaanaan Dehalawi rahmatullāhi alaihi.

********************
Aap ka wisaal 11 Zil Qa’ada 1135 Hijri (13 August 1723 A.D.) ko hua.

Aap ka mazaar Delhi me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Noor Muhammad Badayuni Naqshbandi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.