Hazrat Sayyed La’al Shaah Hamadani rahmatullāhi alaihi

32533591_1273830272751494_2772200827480178688_n

Hazrat Sayyed La’al Shaah Hamadani rahmatullāhi alaihi :

Aap ki wilaadat Danda Shaah Bilaawal (Punjab) me hui.

Aap ke waalid ka naam Sayyed Jeewan Shaah hai.

Aap ke pardaada Sayyed Shaah Bilaawal Hamadani Hamadan (Iran) se Hindustan tashreef laaye aur Punjab me Mianwali aur Chakwal ke bich me ek maqaam par sukoonat ikhtiyaar ki. Ye qasba ‘Danda Shaah Bilaawal’ ke naam se mash’hoor hai.

****************
Aap ne Hazrat Maulana Ahmad Deen Angwi se ta’aleem haasil ki.

****************
Ta’aleem mukammal hone ke baad Aap 15 saal tak Hazrat ke saath usi madrasa me mudarris rahe.

Hazrat ke intiqaal ke baad 2 saal tak Khwaja Dost Muhammad Kandahari rahmatullāhi alaihi ki sohbat me rehkar Tasawwuf ki ta’aleem aur faiz haasil kiya.
1284 Hijri (1868 A.D.) me intiqaal se pehle Hazrat bahot beemaar the tab Aap ko qareeb bulaaya aur apna haath Aap ke seene par rakha. Hazrat ke faiz ata karne par Aap be-hosh ho gaye. Hosh me aane par Aap ne farmaaya ke ‘Mera seena har najaasat aur jang se paak saaf ho gaya aur aa’ine ki tarah chamakne laga hai.’

Is ke baad Aap ne Khwaja Dost Muhammad Kandahari ke khalifa Khwaja Uṡmaan Damani rahmatullāhi alaihi se Bai’at ki aur kai saal tak Hazrat ki sohbat me rehkar faiz aur ta’aleem haasil ki.

****************
Ek martaba Khwaja Uṡmaan Damani ki khaanqaah ke aas paas logo me ek muhlik beemaari phaili hui thi. Jab Aap gaanv me tashreel laaye to Khwaja Uṡmaan Damani ne farmaaya ke ‘Ab is ilaaqe se ye beemaari door ho jaayegi kyun ki Sayyed La’al Shaah yaha aa chuke hain.’ Aur is tarah Aap ki tashreef aawaari ki barkat ALLĀH ta’ala us beemaari ko rok diya.

Apne aakhri dino me jab Khwaja Uṡmaan Damani bahot beemaar aur jaeef ho gaye tab bai’at ke liye apni baargaah me aane waalo ko Khwaja Mohammad Siraaj-ud-deen ya Sayyed La’al Shaah Hamadani ke paas bhej dete the.

Aap 30 saal tak logo ko ta’aleem aur faiz ata karte rahe aur hazaaro logo ko aur khusoosan Awaan qabeele ko Naqshbandi silsile me daakhil farmaaye.

****************
1308 Hijri (1891 A.D.) me Aap ne Hajj e Baitullāh ada kiya.

****************
Aap ki 2 saahabzaadiya hain.

****************
Aap Hazrat Khwaja Muhammad Uṡmaan Damani rahmatullāhi alaihi ke mureed aur khalifa hain.
Aur ‘Naqshbandi Mujaddidi’ silsile ke Shaikh hain.

Aap ke mash’hoor mureed :
(1) Hazrat Sayyed Muhammad Shaah Hamadani rahmatullāhi alaihi
(2) Hazrat Peer Muhammad Fazal Ali Quraishi rahmatullāhi alaihi
(3) Hazrat Maulana Abul Sa’ad Ahmad Khan rahmatullāhi alaihi.

****************
Aap ka wisaal 27 Sha’abaan 1313 Hijri (12 February 1896 A.D.) ko Budh ke roz hua.

Aap ka mazaar Danda Shah Bilawal (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed La’al Shaah Hamadani rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.