Hazrat Sayyed Abu Abdullāh Mueez-ud-deen Ādam Naqshbandi Mujaddidi Binauri rahmatullāhi alaihi :

65745131_2846307212106781_3866486979000532992_n

Hazrat Sayyed Abu Abdullāh Mueez-ud-deen Ādam Naqshbandi Mujaddidi Binauri rahmatullāhi alaihi :

Alqaab :
‾‾‾‾‾‾‾‾‾‾
Qutb-ul-Aqtaab, Fakr-uz-Zamaan.

********************
Aap ki wilaadat 912 Hijri (1506 A.D.) me Binaur me hui.

Aap ke waalid ka naam Sayyed Ismāeel hai.
Aap Husaini saadaat hain aur Hazrat Imaam Sayyed Moosā Kaazim rahmatullāhi alaihi ki nasl se hain.
Aapke Aaba o ajdaad Baghdad se Hindustan tashreef laae.
Aap ki waalida Afghani thi.

***************
Ek martaba Huzoor Rasool-Allāh sallallāhu alaihi wa sallam Aap ke waalide maajid ne khwaab me tashreef laae aur apna daste mubarak unke seene par phera aur koi cheez nikaal kar ata farmaai aur farmaaya ke “Khaa lo.” Aap ke waalid ne use khaa liya. Usi shab istiqraare hamal hua. Aap farmaate the ke “Mujhe bataaya gaya hai ke mera wajood Huzoor sallallāhu alaihi wa sallam ke usi mubarak atiyaa ki wajah se hai.”

********************
Ek roz Aap ne ek ghaib se aawaaz suni “Ādam! Tum ne Qur’ane majeed kyun nahi padha?” Aap ne arz kiya ke “Khudavand! Tu Qaadire mutlaq hai. Agar chaahe to isi waqt Haafize Qur’an bana de.” Chunaanche fazle ilāhi se usi waqt Hifze Qur’an ki ne’amat ata hui.
Uske baad Aap ne Hazrat Shaikh Maulana Ya’aqoob Surfi Kashmiri aur Maulana Abdul Hakeem Sialkoti se mazeed ta’aleem haasil ki.

Phir Hazrat Haaji Khizr Khan Afghan Mujaddidi rahmatullāhi alaihi se Bai’at ki aur Hazrat ki khidmat me rehkar ta’aleem haasil ki.
Phir Hazrat ne Aap ko apne Peer o murshid Hazrat Mujaddid-e-Alfe ṡaani Imaam Shaikh Ahmad Sirhindi rahmatullāhi alaihi ki baargaah me bheja.
Hazrat ki khidmat me thode hi arse me Maraatibe aaliya par faa’iz ho kar Khilafat e Khirqa haasil kiya.

****************
Aap Ibaadat o Riyazat aur Zohad o Taqwa me bemiṡaal the.
Hamesha Shariat aur Sunnat ki itteba ki ta’aleem wa targheeb dete the.
Neki ka hukm karna aur Buraai se rokna Aap ka khaas mashrab tha.
Aap ki Surat dekhte hi Taalibaane haq ko Zikre Qalbi haasil ho jaata tha.
Aap ki nazare tawajjoh se logo ke dil ke aalam badal jaaya karte the.
Aap ki Khaanqaah me har waqt 1000 Taalibaane haq jama rehte the.
Ameero se parhez karte the aur Ghareebo mohtaajo ko imdaad farmaate the.
Khaanqaah me aam Langar jaari rehta tha.
Aapke Mureedeen ki ta’adad taqreeban 4,00,000 thi.

********************
Karaamat :
‾‾‾‾‾‾‾‾‾‾‾‾
Ek martaba qahet pad gaya aur galla (anaaj) mehnga ho gaya. Khaanqaah ke muaamlaat me dushwaari pesh aane lagi. Khuddaam ne Hazrat ki khidmat me arz kiya. Ek matka jis me thoda sa galla tha. Aap ne farmaaya “ Isko oonchi jagah par rakh do aur iska munh band kar do aur iske taliye me suraakh ka rdo aur ba-qadre zaroorat isi me se galla nikaalte raho. Iska Muh nahi kholna. In shaa Allāh barkat hogi.”
6 mahine tak mutavaatir usi matke se galla is tarah lete rahe aur Khaanqaah ka ka Langar jaari raha. 6 maah baad jab zamaana e qahet khatm hua aur matke ka munh khola gaya to us me jitna galla pehle tha utna hi maujood tha.

********************
Jab Aap Hajje Baitullāh ko tashreef le gae aur Hajj ada karne ke baad Madeena munawwara me Roza e Rasool par haazir hokar Aap ne Salaam arz kiya to Roza mubarak se 2 nooraani daste mubarak zaahir hue. Haazireen bhi ziyarat se musharraf hue. Aap ne ba adab un mubarak haatho ka musaafa kiya aur bosa diya.
Phir Huzoor Rasool-Allāh sallallāhu alaihi wa sallam ki baargaahe aali se Aapko bashaarat di gai “Ya Waladi! Anta fi jawaari.” [ya’ani “Aye Farzande man! Tum mere jawaar me rahoge.”] 
Phir Haramain shareefain me Aap ki aisi shohrat hui ke log badi ta’adaad me Aapki khidmat me aane lage aur bil khusus Aap se Musaafe ke liye logo ki badi bheed rehne lagi.

****************
Aap Hazrat Haaji Khizr Khan Afghan Naqshbandi Mujaddidi rahmatullāhi alaihi ke mureed hain.
Hazrat Mujaddid-e-Alfe ṡaani Imaam Shaikh Ahmad Sirhindi rahmatullāhi alaihi ne Aap ko Khilaafat ata farmai hai.
Hazrat ne Aap ko Naqshbandi, Qaadri Chishti aur Suharwardi silsila ki Ijaazat o Khilafat ata farmai hai.

Aap ke khalifa Hazrat Sayyed Abdullāh Akbarabadi rahmatullāhi alaihi hain.

****************
Aap ka wisaal 13 Shawwaal 1053 Hijri (25 December 1643 A.D.) ko hua.

Aap ka mazaar Jannatul Baqi, Madeena munawwara me Hazrat Uṡmaan Ghani radiy-Allāhu ta’ala anhu ke bagal me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Ādam Naqshbandi Mujaddidi Binauri rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.