Hazrat Peer Sayyed Shaah Ghulaam Mohiy-ud-deen Baabuji rahmatullāhi alaihi

51697041_1503277843140068_5471334219621859328_n
Aap ki wilaadat Jamaadi ul awwal 1309 Hijri (December 1891 A.D.) ko Golra ne hui.

Aap ke waalid ka naam Hazrat Peer Sayyed Mehar Ali Shaah bin Sayyed Nazar-ud-deen rahmatullāhi alaihi hai.

Aap Hasani Saadaat hain.
Aur Hazrat Ghauṡe aazaam Shaikh Sayyed Abdul Qaadir Jilani radiy-Allāhu ta’ala anhu ki nasl se hain.

Aap ki wilaadat par izhaare masarrat karte hue farmaaya “Hamare ghar me ALLĀH ALLĀH karne waali ek rooh aa gai hai.”

******************
Aap ne Qaari Abdur Rahmān Jaunpuri se Ilme Tajweed ki ta’aleem haasil ki.
Hazrat Ustaad-ul-Ulama Allama Maulana Mohammad Ghaazi rahmatullāhi alaihi aur Hazrat Shaikh-ul-Islaam Sayyed Meher Ali Shaah Golrawi rahmatullāhi alaihi se majeed ta’aleem haasil ki.

Waalide Giraami ke Faize tawajjoh aur Roohaani tarbiyat ne Aap ko jald hi Mehre Tareeqat o Shariat bana diya.

******************
Takmeel ke baad Hazrat Sayyed Meher Ali Shaah Golrawi rahmatullāhi alaihi ne Aap ko Khilaafat wa Ijaazat se nawaaza. Lekin Aap kisi ko Bai’at karne ke liye tayyaar na hue. Hazrat ne farmaaya ke “Shehzaade! Jo Shakhs tumhare haath par Bai’at karega us ki zimmedaari meri hai.”

******************
Aap ek bade Aalim aur Aarif the.
Aap 37 saal Masnade irshaad par jalwa afroz rahe aur khidmate deen karte rahe.
Aap ne kai masaa’il par Fatawe bhi jaari kiye.

Aap ki baargaah me Shaah o Gada sab haazir hote aur Aap sab se yak sa sulook karte.
Khaanqaah me aane waale zaa’ireen ko mohabbat ke saath milte aur faiz ata farmaate.

Aap Khaamosh mizaaj, Naam o Numood se door, Tasleem o Raza aur Sabr o Istiqlaal ke paikar the.
Har waqt Ba wuzu rehte. Har haal me Yaade Ilāhi aur Zikr o Fikr me mashgool rehte.

Aap bade sakhi aur jawwaad the.
Hamesha Khidmate khalq me masroof rehte. Bewaao, Yateemo, Fuqara va Masaakin, aur Dosto ko khufiya imdaad wa i’aanat karte.
Madaaris aur Deeni Idaaro ko imdaad karte.
Tehreeq e Khatme Nabuwwat ko saath dene waalo ko mohabbat ke saath Ta’aawun karte.

Aap ne ta’aleem deeen ke liye Beirut, Damascus (Syria), Baitul Muqadas, Egypt, Geneva, Paris (France), United Kingdom, Germany, Rom, Turkey aur Baghdad ka safar kiya.

******************
Ek martaba Aap Rawalpindi ki taraf se aa rahe the. Aap ke waalid Hazrat Sayyed Meher Ali Shaah baalakhane par the. Door se Aap ko dekhkar farmaaya “Ghulaam Mohiy-ud-deen aa raha hai.” Phir tabassum karte hue farmaaya ke “Dekho! Ghoda daud raha hai magar saath me apne kaam me barabar mashgool hai.”

******************
Aap ko bachpan se hi Train ke Engine se khaas dilchaspi thi. Ek martaba kisi dost ne is ki wajah puchhi to Aap ne farmaaya ke “Mujhe Engine ki 4 baaten pasand hain :
(1) Hausla : Jitni zyada Aag daalo utna hi Tez chalti hai.
(2) Wafa : Jaha Khud jaayega wahi tamaam Dibbo ko bila tameez saath le jaayega.
(3) Isaar : Khud jalta hai aur dusro ko Manzile maqsood tak pahunchata hai.
(4) Istiqaamat : Hamesha Mu’ayyan raaste (Track) par chalta hai.”

Is tarah Aap ne Engine ki miṡaal se bade aasaan andaaz me Murshid ki khususiyaat bayaan farmaa di.

******************
‘Farmudaat : Musaafir chand roz’ kitaab me Aap ke likhe hue 101 khato ko jama kiya gaya hai.

******************
Aap ke 2 saahabzaade hain :
(1) Shaah Ghulaam Moeen-ud-deen,
(2) Maulana Shaah Abdul Haq.

*******************
Hazrat Shaikh-ul-Islaam Peer Sayyed Meher Ali Shaah Chishti Golrawi rahmatullāhi alaihi ke mureed aur khalifa hain.

Aap ke khulfa :
(1) Hazartt Peer Sayyed Ghulaam Naseer-ud-deen Naseer rahmatullāhi alaihi
(2) Hazrat Maulana Faqeer Muhammad Ameer saahab
(3) Hazrat Maulana Qaari Ghulaam Muhammad Peshawari
(4) Hazrat Maulana Mehboob Aalam Hazarawi
(5) Hazrat Maulana Sher Muhammad Lahori
(6) Hazrat Maulana Abdul Haq Susralwi
(7) Hazrat Maulana Gul Faqeer Peshawari
(8) Hazrat Sayyed Chandan Shaah
(9) Hazrat Sayyed Mumtaaz Ali Shaah.

*******************
Aap ka wisaal 2 Jamaadi uṡ ṡaani 1394 Hijri (22 June 1947 A.D.) ko Raat ko 11 baje hua.

Aap ka mazaar Golra (Islamabad / Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Ghulaam Mohiy-ud-deen Golrawi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.