Hazrat Peer Sayyed Azeez-ud-deen Makki Shaah rahmatullāhi alaihi

46493085_1439106862890500_7433669322209230848_n

Aap Saadaat hain.

*************
Aap ‘Junaidi’ silsila ke Shaikh hain.

*************
Aap Aalime Zee Shaan the aur Paabande Shariat wa Saahibe Tareeqat the.

*************
Aap ka watan Baghdad tha.
Aap zaahiri wa baatini taaleem haasil karne ka baad Baghdad se Makka mukarrama tashreef le gaye aur Ka’abatullāh ki mujaawarat karte rahe. 12 saal tak waha E’atekaaf me rahe.
Phir 574 Hijri (1178 A.D.) me ALLĀH ta’ala ke hukm se Makka se Lahore tashreef laaye aur 36 saal tak Lahore me qayaam farmakar ta’aeem wa tadrees karte rahe aur faiz ata farmaate rahe.

*************
574 Hijri (1178 A.D.) me Sultaan Shahaab-ud-deen Ghori ne Lahore ka muhaashara kiya. Lahore ke log us muhaasare se bade pareshaan hue. Ghaznawi governor Khusro Malik bin Zaheer-ud-daulah Hazrat ki khidmat me haazir hokar dua ke liye arz ki. Aap ne sajde me jaakar dua farmai aur phir farmaaya ‘Jaao, tumhe ALLĀH ta’ala ne mazeed 6 saal tak amaan wa hifaazat ata faramaai hai. 6 saal tak koi hamla aawar tumhe tang nahi karega. Is ke baad ye saltanat Ghori khaandaan ko supurd kar di jaayegi.’
Chunaanche Sultaan Shahaab-ud-deen Ghori apna maqsad haasil kiye baghair waapas chala gaya.
Phir 580 Hijri me Sultaan Shahaab-ud-deen Ghori ne Siyalkot ko fateh karne ke baad Siyalkot ka qila taameer kiya. Us ko apni chhaavni banaaya. Aur Lahore par dobaara hamla kiya aur use fateh kiya.

*************
Aap ka wisaal 10 Rabi-ul-Awwal 612 Hijri (July 1215 A.D.) ko hua.

Aap ka mazaar Lahore (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Peer Sayyed Azeez-ud-deen Makki Shaah rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.