Hazrat Meer Sayyed Ahmad Kalpawi rahmatullāhi alaihi

44977662_1424655731002280_5537122557271998464_n

Alqaab :
‾‾‾‾‾‾‾‾
Shaikh-ul-Masha’ikh, Aaftaab-e-Hidaayat, Maahtaab-e-Wilaayat.

****************
Aap ki wilaadat Kalpi (Uttar Pradesh) me hui.

Aap ke waalid Hazrat Meer Sayyed Muhammad bin Sayyed Abu Saeed al-Hasani Tirmizi rahmatullāhi alaihi hai.

Aap ke pardaada Tirmiz se Jalandhar aaye the. Aur phir Aap ke daada Jalandhar se Kalpi tashreef laaye the.

****************
Aap ne apne waalid Hazrat Meer Sayyed Muhammad rahmatullāhi alaihi se ibtidaai ta’aleem haasil ki.
Is ke baad aap ke waalid ne apne khalifa Hazrat Afzal bin Abdur Rahmān Ilaahabadi rahmatullāhi alaihi ko Aap ki ta’aleem ke liye muqarrar kiya. Aap ne un ke paas ta’aleem mukammal ki.

Taalim mukammal hone ke bbad aap ke waalid e mohtaram ne 24 saal ki umr me khilaafat ata farmai aur Aap masnad par ronak afroz hue.

****************
Aap bahot bade Aabid aur A’arif the aur ibaadat wa riyaazat me kaamil aur paaband the.
Aap har amal Sunnat e Rasool ke mutaabiq karte the.
Aap ke akhlaaq o aadat apne aslaaf ke naqsh e qadam par thi.
Aap har farz namaaz ke baad ba aawaaz e buland Kalma e Tauhid kehte the.
Aap bahot narm dil aur sakhi the.

****************
Ek martaba Aap apne waalid ke saath Hazrat Khwaja Ghareeb nawaaz rahmatullāhi alaihi ke mazaar par ziyarat ke liye haazir hue tab Khwaja ne aap ko roohaani faiz ata farmaaya.

****************
Ek baar ek shakhs Aap ki baargaah me aaya aur arz kiya ke ‘Mera dil bahot sakht ho gaya hai. Koi qareebi rishtedaar ka inteqaal ho jaata hai tab bhi mujhe koi ranj o gham mehsoos nahi hota. Aap mujh par apni nazr e karam farma dijiye.’
Aap ne us shakhs ke dono haath pakde aur use hilaaya magar wo usi haal me raha. Aap ne 3 martaba aisa kiya. Us shakhs ka dil narm ho gaya aur us ki aankho se aansoo jaari ho gaye.
Jab use hosh aaya to foran wo Hazrat ka mureed ho gaya.

****************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :
(1) Jaami’ ul Kalaam
(2) Sharah Asma’ ul Husna
(3) Risaala Mu’aarif
(4) Mushaahidaat Soofiyah
(5) Deewaan-e-Sher.

****************
Aap ke 3 saahbzaade hain :
(1) Sayyed Shaah Fazlullāh
(2) Sayyed Shaah Sultaan Maqsood
(3) Sayyed Shaah Sultaan Mahmood.

****************
Aap (apne waalid) Hazrat Meer Sayyed Muhammad Kalpawi rahmatullāhi alaihi ke mureed aur khalifa hain.

Aap ke khalifa Hazrat Sayyed Shaah Fazlullāh rahmatullāhi alaihi hain.

****************
Aap ka wisaal 19 Safar 1084 Hijri (June 1673 A.D.) ko Jumeraat ke roz hua.

Aap ka mazaar Kalpi (Uttar Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Meer Sayyed Ahmad Kalpawi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.