Hazrat Maulana Mufti Shaah Irshaad Husain Rampuri rahmatullāhi alaihi

52527253_1514317798702739_3162333799560249344_n
Hazrat Maulana Mufti Shaah Irshaad Husain Rampuri rahmatullāhi alaihi :

Alqaab :
‾‾‾‾‾‾‾‾‾‾
Qutb-ul-Irshaad, Siraaj-ul-Fuqaha.

*******************
Aap ki wilaadat 14 Safar 1248 Hijri (November 1832 A.D.) ko Mohalla Pila Taalab, Mustafabaad (Rampur) me hui.

Aap ke waalid ka naam Hazrat Maulana Hakeem Ahmad Husain bin Ghulaam Mohiy-ud-deen Mujaddidi al-Faarooqi hai.

Aap Hazrat Mujaddid-e-Alfe Ṡaani Imaam Shaikh Ahmad Sirhindi rahmatullāhi alaihi ki nasl se hain.

*****************
Ek martaba Hazrat Haaji Mohammad Rampuri ne Hazrat Maulana Haafiz Inayatullāh Khan se un ke israare bai’at par farmaaya tha ke ‘Tum abhi ta’aleem haasil karo. Ek Qutb-e-waqt ka zahoor hone waala hai. Un se naseebe kaamil milega.’

*****************
Aap ne Apne waalide maajid Maulana Hakeem Ahmad Husain, Apne biraadar Maulana Imdaad Husain Rampuri, Shaikh Ahmad Ali, aur Shaikh Waajid Ali se Faarsi ki ta’aleem aur Maulana Haafiz Ghulaam Nabi, Maulana Jalaal-ud-deen, aur Maulana Naseer-ud-deen Khan se Arabi ki ta’aleem haasil ki. Lucknow me majeed ta’aleem haasil ki.
Phir Maulana Mohammad Nawaab Khan Afghani Naqshbandi se Ma’aqoolaat ki ta’aleem haasil ki.

Maulana Mohammad Nawaab Khan Afghani ke taaleem ke duraan Nawaab Qalb Ali Khan ko bhi Aap ke saathi the. Phir un ke daada Rampur ke Nawaab Nawaab Muhammad Saeed Khan ne Nawaab Qalb Ali Khan ke liye 2 Shia Aalimo ko Imaamiya Shia Firqe ki ta’aleem ke liye rakha. Wo aalim jo bhi sikhaate wo Nawaab Qalb Ali Khan apne saathi Irshaad Husain ko aakar bataate. Aap un ke har galat aqeede ko mukammal daleel ke saath rad karte. Jab Nawaab Muhammad Saeed Khan ko is ka pata chala to us ne Nawaab Qalb Ali Khan ko Maulana Mohammad Nawaab Khan Afghani ke madrase se nikaal liya. Magar Maulana Irshaab Husain ki taaleem ke sabab Nawaab Qalb Ali Khan Sunni aqeede par hi rahe aur Hanafi mazhab par rahe aur Naqshbandi buzurgo se khaas mohabbat karte the.

Is ke baad Maulana Mohammad Nawaab Khan Afghani Delhi tashreef le gaye. Aap bhi un ke saath Delhi gaye.

Delhi me Aap Hazrat Maulana Shaah Ahmad Saeed Faarooqi Mujaddidi ke mureed hue. Aur Hazrat se uloome baatini ki ta’aleem haasil ki.

1273 Hijri (1857 A.D.) ke gadar ke nakaam hone ke baad Angrez hukoomat ke zulm se bachne ke liye Shaah Ahmad Saeed Faarooqi Mujaddidi Madeena munawwara ki taraf rawaana hue. Aap bhi Hazrat ke saath Panipat tak gaye. Phir Hazrat ki ijaazat se Rampur waapas aaye.

Phir jab Aap apne khaadim Muhammad Moosā Bukhari ke saath Hajj ke liye tashreef le gaye to Madeena shareef me 1 saal Hazrat ki sohbat me rehkar ta’aleem wa faiz haasil kiya. Phir Huzoor sallallāhu alaihi wa sallam ke farmaan par Hazrat ne Aap ko Rampur waapas bheja.

Aap ne Maulana Abdul Kareem urfe Mulla Faqeer Akhund Qaadri Chishti ki khanqaah me hujre me qayaam ke dauraan 9 maah me Qur’an majeed hifz kiya.

******************
1284 Hijri (1867 A.D.) me Madrasa Irshaad-ul-Uloom qaa’im kiya. Aur 1306 Hijri (1889 A.D.) tak ta’aleem wa tadrees karte rahe.
Phir 13 Rajab 1307 Hijri (10 March 1890 A.D.) ko Maulana Sayyed Ahmad Qaadri ko Sadr-ul-Mudarriseen banaaya.

******************
Aap Ilm o Amal aur Taqwa o Zohad me be-miṡaal the.

Aap har shakhs se achha bartaav karte the. Ahle Sunnat par shafaqqat farmaate the.
Aap ameero se be-niyaaz rehte the, Mohtaajo ki madad farmaate the.

Aap Hizb-ul-Bahr, Salaat-ul-Ishraaq, Salaat-ul-Istikhārah, aur Khatm-e-Hazrat Imaam Rabbaani Mujaddid Alfe Ṡaani ada karte.

***************
Aap ka shumaar Hindustan ke un bargizada ulama me hota hai jinho ne mushkil waqt me Ahle Sunnat wa Jama’at ki khidmat ki.

Aap Waaqif-e-Israar-e-Rabbaani, Jaami-ul-Manqool-wa-Ma’aqool, Taaj-ul-Muhaddeeṡeen wa Mufassireen, Siraaj-ul-Fuqaha the.

Aap ko tamaam uloom wa funoon par yaksaan mahaarat haasil thi.
Rampur ke qareeb ke aur door daraaj ke ilaaqe se log Aap ki baargaah me ilm haasil karne aate the.

Hafte me 4 din namaaze asr baad Aap Maṡnawi Rumi, Maktoobaat Imaam Rabbaani, Awaarif-ul-Ma’arif, aur Ihyā-ul-Uloom ki ta’aleem dete.

Aap har Jum’aa ko baad namaaze jum’aa Tafseer e Qur’an majeed 1 ruku bayaan farmaate.
Saal me 2 baar Aap mehfil munaaqid karke pure Qur’an majeed ki tafseer bayaan farmaate.

Mangal aur Jumeraat ko Fatwa dete.

Aap ne kai mauzu par mazboot daleel aur sabot pesh kiya jin me Huzoor Nabi e kareem sallallāhu alaihi wa sallam ke Waalidain ke Muslim hona, Jashne Meelaad-un Nabi ki haqeeqat, Huzoor sallallāhu alaihi wa sallam par Salaat o Salaam pedh karna, Waseela aur Istigasah ki haqeeqat saamil hain.

******************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :

(1) Intisaar-ul-Haqq (Taqleed ki haqeeqat aur Imaame aazam Abu Haneefa rahmatullāhi alaihi ki azmat ka bayaan)
(2) Irshaad-us-Sarf.

 Aap ke fataawa ko ‘Fataawa Irshaadiya’ (2 Jild) naami kitaab me jama kiye gaye hain.

******************
Aap ke mash’hoor shaagird :
(1) Maulana Ihsaan Husain Rampuri
(2) Shaikh Salaamatullāh Naqshbandi Mujaddidi Rampuri
(3) Maulana Haamid Husain Rampuri
(4) Maulana Peer Sayyid Jama’at Ali Shaah Muhaddeeṡ Rampuri
(5) Maulana Hakeem Husain Raza Khan Qaadri Bareilwi
(6) Maulana Mufti Sayyid Deedaar Ali Qaadri Razwi Alwari
(7) Shibli Numaani.

******************
Karaamat :
‾‾‾‾‾‾‾‾‾‾‾‾‾
Ek martaba ek shakhs Aap ke paas aaya aur arz kiya ‘Aaj meri namaaze fajr qaza ho jaane ki wajah se main ranjeeda hu.’ Aap khaamosh rahe.
Magar is ke baad us shakhs ki kabhi namaaze fajr qaza na hui kyun ki roz namaaz ke waqt par use mehsoos hota ke jaise koi namaaz ke liye use jaga raha hai.

******************
Pariwaar :
‾‾‾‾‾‾‾‾‾‾‾‾
Aap ne Huzoor Nabi e kareem sallallāhu alaihi wa sallam ki sunnat ada karte hue ek bewa se nikaah kiya.

Aap ke 5 saahabzaade aur 2 saahabzaadiya hain.

5 Saahabzaade :
(1) Ihsaan Husain
(2) Ma’awaan Husain
(3) Rehaan Husain
(4) Irfaan Husain
(5) Rizwaan Husain.

*******************
Aap Hazrat Maulana Shaah Ahmad Saeed Faarooqi Mujaddidi ke mureed aur khalifa hain.

Aap ke khulfa :
(1) Maulana Mufti Muhammad Salaamatullāh Naqshbandi Mujaddidi Rampuri
(2) Maulana Haaji Riyaasat Ali Khan Naqshbandi Mujaddidi Shahjahanpuri
(3) Maulana Haafiz Inayatullāh Khan Naqshbandī Mujaddidi Rampuri
(4) Maulana Imdaad Husain Mujaddidi Rampuri
(5) Maulana Abdul Ghaffaar Khan Naqshbandi Hanafi Rampuri
(6) Maulana Abdul Qayyoom Khan Naqshbandi Mujaddidi
(7) Maulana Soofi Abdur Rahmān Naqshbandi Mujaddidi Bengali
(8) Maulana Abdul Qaadir Khan Naqshbandi Mujaddidi.

******************
8 Jamaadi uṡ ṡaani 1311 Hijri ko Aap ko shadeed bukhaar aaya.
Aap ne tamaam cheeze jo aap ke paas thi wo un ke maaliko ko lauta di.

Is haalat me bhi Aap panj-gaana namaaz ba-jama’at ada karte rahe, tamaam awraad bhi karte rahe aur ek tihaai Qur’an majeed ki tilaawat karte rahe.

******************
Aap ka wisaal 15 Jamaadi uṡ ṡaani 1311 Hijri (26 December 1893 A.D.) ko 63 baras ki umr me hua.

Aap ka mazaar Rampur (Uttar Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Maulana Mufti Irshaad Husain Rampuri rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.