Hazrat Makhdoom Ala-ud-deen Ansaari rahmatullāhi alaihi

30713030_1255013931299795_7095207452399894528_n

Alqaab :
‾‾‾‾‾‾‾‾‾‾
Laadle Masha’ikh, Qutb-e-Deccan.

****************
Aap ki wilaadat 30 Rabi-uṡ-ṡaani 720 Hijri (June 1320 A.D.) me Delhi ke qareeb Kilo-khadi me hui.

Aap ke waalid ka naam Hazrat Peer Mubarak Fakhr-ud-deen bin Taaj-ud-deen Ansaari Dehalawi aur waalida ka naam Bibi Raani Khurd hai.

Aap Sahaabi e Rasool Hazrat Abu Ayyoob Ansaari radiy-Allāhu ta’ala anhu ki aur Hazrat Khwaja Abdullāh Ansaari rahmatullāhi alaihi ki nasl se hain.

****************
Aap ne apne waalid se ibtidaai ta’aleem haasil ki.

728 A.H.(1328 A.D.) me jab Sultaan Muhammad bin Tughlaq ne Daar-ul-Hukoomat Delhi se Daulatabad (Devagiri) me tabdeel kiya aur Delhi ke logo ko Daulatabad jaane ke liye farmaan jaari kiya to Aap ke waalid bhi apne pariwaar ke saath Daulatabad aaye. Wo log 17 Moharram 729 Hijri (November 1328 A.D.) ko Daulatabad pahunche.

Aap Hazrat Bajun ke Maktab me daakhil hue aur Qur’an, Fiq’h, Mantiq, Falsafa aur deegar uloom ki ta’aleem haasil ki.
Aap 8 saal ki umr me Haafiz e Qur’an hue.

****************
Aap ke naana Hazrat Kabeerullāh Husaini jab bhi koi Soofi buzurg ki baargaah me jaate to Aap ko bhi saath le jaate.
Ek martaba Aap apne naana ke saath Hazrat Hasan-ud-deen Naqshbandi rahmatullāhi alaihi ke khidmat me tashreef le gaye to waha Hazrat Qaazi Aleem-ud-deen rahmatullāhi alaihi Aap ko god me uthakar pyaar karne lage. Ye dekhkar Hazrat Hasan-ud-deen Naqshbandi ne farmaaya “Ala-ud-deen! Tum to Laadle Masha’ikh ho.”

****************
Ek martaba Aap ke daada apne bete aur poto ke saah Hazrat Taaj-ud-deen Ansaari Hazrat Khwaja Burhaan-ud-deen Ghareeb rahmatullāhi alaihi ki baargaah me haazir hue aur apne pariwaar ke liye dua ke liye arz ki Khwaja ne Aap ki jaanib ishaara karke farmaaya “Fakhr-ud-deen! Tumhara beta Qutub e waqt hoga.”

****************
4 Rajab 736 Hijri (February 1336 A.D.) ko Aap ka pariwaar Delhi waapas aaya.

Phir Aap ne Hazrat Maulana Qadr, Hazrat Maulana Sharf-ud-deen Kathaili, aur Hazrat Qaazi Abdul Muqtdir se majeed ta’aleem haasil ki.

****************
Phir Aap Hazrat Khwaja Sayyed Naseer-ud-deen Mahmood Chishti rahmatullāhi alaihi ke mureed hue aur Hazrat se uloom-e-baatini ki ta’aleem haasil ki.

****************
757 Hijri me Hazrat ne apne wisaal se pehle Deccan jaane ke liye farmaaya.
Peer ke intiqaal ke baad un ke farmaan par 15 Sha’abaan 761 Hijri (July 1360 A.D.) ko Aap Deccan ke liye rawaana hue.
Pehle Aap Ajmer me Khwaja Ghareeb naaaz rahmatullāhi alaihi ke mazaar par tashreef le gaye. Waha kuchh din qayaam karne e baad Chanderi, Baroda, Khambayat aur Malwa hote hue Aap Daulatabad pahunche. Yaha kuchh din qayaam karke bahot saare soofi buzurgo se mulaaqaat karke aur bahot saare buzurgaane deen ke mazaar ar haazir hokar faiz haasil kiya.
Phir Qandhar, Ausa aur Usmanabad hote hue Gulbarga pahunche. Yaha par Malika Makhdoom Jahaan ne Wazeer Malik Saif-ud-deen Ghori aur afsaro ke saath Aap ka istiqbaal kiya. Yaha kuchh din qayaam karke Hazrat Shaikh Rukn-ud-deen Tola rahmatullāhi alaihi se mulaaqaat ki. Phir Hazrat Siraaj-ud-deen Junaidi rahmatullāhi alaihi se mulaaqaat karne ki koshish ki. Teesri baar me jab Hazrat Siraaj-ud-deen Junaidi se mulaaqaat hui to un se puchha ke “Mujhe kaha par sukoonat pazeer hona hai?” Hazrat ne Aap ko Aland jaane ke liye farmaaya.
Jum’aa ke roz Aap Aland ke liye rawaana hue.
Sultaan Muhammad Shaah Bahmani, Malik Saif-ud-deen Ghori, Jaame Masjid-Sultanpur ke Imaam Hazrat Qaazi Abdul Waahid Shaah Faarooqi, Jaame Masjid -Gulbarga ke Imaam Hazrat Mulla Akramullāh Noori Shaah Siddeeqi aur dusre log Sultanpur tak Aap ke saath aaye.
Sultanpur me Aap apne ustaad Hazrat Maulana Qadr ke mazaar par haazir hue.
Phir Hazrat Qaazi Abdul Waahid Shaah Faarooqi ke makaan par Aap ek raat thehre.
Dusre din namaaze fajr ke baad Aap waha se rawaana hue. Bahmani hukoomat ki jaanib se Aap ko shaandaar rukhsati di gai.
Phir Chincholi, Dhannur, aur Tallur hote hue Kodal-Hangarga pahnche. Yaha oont ko chhodkar Doli me baithkar aage ka safar shuru kiya.

****************
Aland pahunchkar gaanv ke baahar Aap ki mulaaqaat Hazrat Umar Chishti rahmatullāhi alaihi se hui. Aap ne kaafi der tak un se guftagu ki.

Aland aane ke baad 3 din tak Aap Gadhi me qayaam pazeer rahe (jaha par wazeer aur afsar rehte hain). Yaha badi ta’adaad me log Aap ki khidmat me aakar faiz haasil karte rahe.

Phir Aap gaanv ke baahar ek pahaadi par Hazrat Ahmad Mohiy-ud-deen Mardaana Ghaib rahmatullāhi alaihi ke mazaar ke qareeb sukoonat pazeer hue aur ta’aleem wa faiz ata farmaate rahe.

******************
Chand saal baad Hazrat Siraaj-ud-deen Junaidi rahmatullāhi alaihi ki peshan goi ke mutaabiq Aap tajheez wa tadfeen ka saamaan lekar oont par sawaar hokar Gulbarga ki jaanib rawaana hue. 16 Shawwaal 781 Hijri (1380 A.D.) ko Aap Hazrat Siraaj-ud-deen Junaidi rahmatullāhi alaihi ki qayaam-gaah par pahunche aur Hazrat ke pote Hazrat Abul Fazl Junaidi se gufagu ki. Jab Hazrat ke hujra ka darwaaza khola gaya to Hazrat ka wisaal ho chuka tha.
Aap ne Hazrat Abul Fazl Junaidi, Hazrat Mulla Akramullāh Noori Shaah Siddeeqi aur Hazrat Qaazi Abdul Waahid Shaah Faarooqi ke saath Hazrat ko ghusl aur kafan diya. Aap ne Hazrat ki namaaze janaaza padhaai.

Phir Aap Sultaan Mahmood Shaah Bahmani ki daawat par Hazrat ke khalifa aur Bahmani saltanat ke Wazeer Hazrat Malik Saif-ud-deen Ghori rahmatullāhi alaihi ke makaan par 10 din thehre aur Hazrat Shaikh Ādam bin Yousuf aur khaadimo ke saath nange paanv Gulbarga ke Buzurgaane deen ki baargaah me haazir hokar faiz haasil karte rahe. Is dauraan Aap ki mulaaqaat Hazrat Shaikh Baha-ud-deen Langot-band Majzub rahmatullāhi alaihi se bhi hui.

Phir Aap Sultanpur aaye aur apne ustaad Hazrat Maulana Qadr ke mazaar par haazir hue.

Phir Aland waapas tashreef laaye.

****************
Aap ne shaadi nahi ki.
Aap ne ek ladke ko god liya jo Hazrat Shaikh Saaleh Badru ke naam se mash’hoor hai.
Aur apne 3 bhai ke bete ko khilaafat ata farmai.

****************
Aap Arabi, Faarsi aur Dakkhani ke maahir the.
Aap ne Faarsi me 12 kitaaben tehreer farmai hai.

****************
Aap Hazrat Khwaja Sayyed Naseer-ud-deen Mahmood Chishti rahmatullāhi alaihi ke mureed aur khalifa hain.

Aap ke khulfa :
(1) Hazrat Shaikh Saaleh Badru rahmatullāhi alaihi,
(2) Hazrat Shaikh Khambar Ansaari rahmatullāhi alaihi,
(3) Hazrat Shaikh Sohrab Ansaari rahmatullāhi alaihi,
(4) Hazrat Shaikh Mubarak Ansaari rahmatullāhi alaihi.

****************
27 Rajab 783 Hijri ko Aap namaaze ishaa ada karne ke baad apne hujre me tashreef le gaye aur darwaaze band ho gaye. Subah ko logo ne dekha to Aap intiqaal farma chuke the.

Aap ka wisaal 27 Rajab 783 Hijri (1381 A.D.) ko 63 saal ki umr me hua.

Aap ka mazaar Aland (Karnataka) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Makhdoom Ala-ud-deen Ansaari urfe Laadle Masha’ikh rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.