Hazrat Khwaja Sayyed Siraaj-ud-deen Chishti rahmatullāhi alaihi :

50962099_2330511133628740_7029306444872679424_n

 

Alqaab :
‾‾‾‾‾‾‾‾
Siraaj-ul-Auliya, Makhdoom-ul-Millat.

****************
Aap ki wilaadat Dehli me hui.

Aap ke waalid ka naam Hazrat Khwaja Sayyed Kamaal-ud-deen Allama Chishti rahmatullāhi alaihi hai.

Aap Husaini saadaat hain.

****************
Aap ne apne waalid se Qur’an majeed ki aur dusre uloom ki taaleem haasil ki.
Aap ne Hazrat Allama Ahmad Thanesari aur Maulana Aalam Panipati rahmatullāhi alaihi se bhi taaleem haasil ki.

Aap bachpan se hi Ibaadat o Riyaazat aur Muraaqaba wa Mujaahida me waqt guzaarna pasanad farmaate.

****************
Aap ‘Aalim al Dahr (Scholar of the continent)’ ke naam se mash’hoor hain.

Hazrat Khwaja Naasir-ud-deen Chiraag e Delhi rahmatullāhi alaihi ke wisaal ke baad ek martaba Delhi me ulama ki mehfil Hazrat Makhdoom Jahaaniyan Jahaangasht rahmatullāhi alaihi se Aap ki mulaaqaat hui. Hazrat ne aap ko bahot mushkil sawaalat kiye. Aap ne har sawaal ka bakhubi jawaab diya, jis se Hazrat Makhdoom Jahaaniyan Jahaangasht rahmatullāhi alaihi mutmaeen ho gaye.
Mehfil khatm hone ke baad Hazrat Makhdoom Jahaaniyan Jahaangasht ko pata chala ke Aap Hazrat Khwaja Sayyed Kamaal-ud-deen Allaama rahmatullāhi alaihi ke farzand hain.
Us ke baad Hazrat Makhdoom Jahaaniyan Jahaangasht Aap se mile aur kaha ke ‘Hum aap ke waalide buzurghwaar ke shaagird hain aur Hazrat Khwaja Naasir-ud-deen Chiraag e Delhi rahmatullāhi alaihi ne jo Khilaafat naama mujh ko ata farmaaya hai wo bhi aap ke waalid saahab hi ke qalam se likha hua hai.’

****************
Ek martaba Delhi ke sultaan Firoz Shaah ne 7000 rupye bataure nazaraana zaade raah ke liye bheje aur aap ko Deccan tashreef le jaakar waha taaleem wa isha’at e deen karne ke liye guzaarish ki. Aap ne nazraana lene se inkaar kar diya aur raqam waapas bhej di.

Aap ne Patan (Gujarat) me taaleem e deen aur khidmat e khalq me zindagi guzaari.

****************
Aap Hazrat Khwaja Sayyed Kamaal-ud-deen Allama Chishti rahmatullāhi alaihi ke mureed aur khalifa hain.
Hazrat Khwaja Naasir-ud-deen Chiraag e Delhi rahmatullāhi alaihi ne bhi Aap ko 4 saal ki umr me khilaafat ata farmaai hai.

Aap ‘Chishti Naasiri’ silsila ke shaikh hain.
Aap ke khalifa (Aap ke saahbazaade) Hazrat Khwaja Sayyed Mohammad Ilm-ud-deen Chishti rahmatullāhi alaihi hain.

****************
Aap ka wisaal 21 Jamaadi ul awwal 817 Hijri (August 1414 A.D.) ko hua.

Aap ka mazaar Patan (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Sayyed Siraaj-ud-deen Chishti rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.