Hazrat Khwaja Sayyed Qutub-ud-deen Maudood Chishti rahmatullāhi alaihi

29365574_1237003793100809_7861271434360782848_n

Hazrat Khwaja Sayyed Qutub-ud-deen Maudood Chishti rahmatullāhi alaihi :

Alqaab :
‾‾‾‾‾‾‾‾
Shams Sufiyaan, Chiraag Chishtiyaan.

****************
Aap ki wilaadat 430 Hijri (1038 A.D.) me Chisht me hui.

Aap ke waalid ka naam Hazrat Khwaja Sayyed Nasir-ud-deen Abu Yousuf bin Sayyed Shams-ud-deen Abu Nasr Muhammad Saamaan Chishti hai.

Aap Husaini saadaat hain.

****************
Aap ne apne waalid se ibtidai ta’aleem haasil ki.
7 saal ki umr me Aap Haafiz e Qur’an hue.
Aap ne Shaikh Ahmad Jaami se bhi shariat aur tasawwuf ki ta’aleem haasil ki.
16 saal ki umr me Aap ne tamaam ta’aleem mukammal ki.

**********************
Bai’at ke baad Hazrat Khwaja Abu Yousuf Chishti ne Aap se farmaaya ‘Qutb-ud-deen Maudood! Faqr ikhtiyaar karo.’
Peer ki naseehat aur farmaan par Aap tanhaai me mujaahida karne lage. Aap ne 20 saal ibaadat, riyaazat aur muraaqaba me guzaare.
Aap din me 2 martaba aur raat me 2 martaba pure Qur’an majeed ki tilaawat karte the.

29 saal ki umr me Aap ke waalid ka intiqaal hua.

****************
ALLĀH ta’ala ne Aap ko ‘Tay-ul-Ard’ ki karaamat ata farmai thi. Aap jab bhi Ka’abatullāh ka tawaaf karne ka iraada karte the ALLĀH ke fazl se kuchh hi lamho me Makka mukarrama pahunch jaate.

ALLĀH ke fazl se Aap ko Kashf-e-Quloob (Revelation of the hearts) and Kashf-e-Quboor (Revelation of the graves) bhi haasil tha.

****************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :
(1) Minhaaj ul Aarifeen
(2) Khulaasat ul Shariah.

****************
Qaul :
‾‾‾‾‾‾‾‾
Aap irshaad famaae hain
‘Jo fuqara se mohabbat aur husn e sulook karta hai wo ALLĀH ta’ala aur us ke Rasool sallallāhu alaihi wa sallam ke qareeb hota hai aur jo un se nafrat karta hai wo Sunnat e rasool ki mukhaalifat karta hai.’

****************
Aap (apne waalid) Hazrat Khwaja Nasir-ud-deen Abu Yousuf Chishti rahmatullāhi alaihi ke mureed aur khalifa hain.

Aap se ‘Chishti Maudoodi’ silsila jaari hai.

Aap ke khulfa :
(1) Hazrat Haaji Noor-ud-deen Shareef Zandani rahmatullāhi alaihi,
(2) (Aa ke saahabzaade) Hazrat Khwaja Sayyed Najm-ud-deen Ahmad Mushtaaq rahmatullāhi alaihi,
(3) Hazrat Khwaja Abu Ahmad rahmatullāhi alaihi,
(4) Hazrat Khwaja Ahmad Zandani rahmatullāhi alaihi,
(5) Hazrat Shaah Sanjan rahmatullāhi alaihi,
(6) Hazrat Shaikh Abu Naseer Shakeeban rahmatullāhi alaihi,
(7) Hazrat Shaikh Hasan Tibti rahmatullāhi alaihi,
(8) Hazrat Shaikh Ahmad Baderoon rahmatullāhi alaihi,
(9) Hazrat Khwaja Sabz Paush rahmatullāhi alaihi,
(10) Hazrat Shaikh Uṡmaan Awwal rahmatullāhi alaihi,
(11) Hazrat Khwaja Abul Hasan rahmatullāhi alaihi.

****************
Aap ke wisaal se pehle ek mota shakhs ek khat lekar Aap ke paas aaya. Aap ne us khat ko padhne ke baad us khat ko chuma aur apni aankho se lagaaya. Aur foran Aap ka intiqaal ho gaya.

****************
Aap ka wisaal 1 Rajab 533 Hijri (March 1139 A.D.) ko hua.

Aap ka mazaar Chisht (Afghanistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Qutb-ud-deen Maudood Chishti rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.