Hazrat Khwaja Sayyed Abul Hasan, Ali Iraqi rahmatullāhi alaihi

30716018_1256263994508122_2938512307757514752_n

Alqaab :
‾‾‾‾‾‾‾‾‾‾
Haaji Mangroli Shaah, Qutb-e-Veraval.

********************
Aap ke waalid ka naam Sayyed Muhammad bin Ali hai.

********************
Aap Iraq se Hindustan ke Somnath (Prabhas Patan, Gujarat) me tashreef laaye aur Tableegh e Islaam karte rahe.

********************
Karaamat :
‾‾‾‾‾‾‾‾‾‾‾‾
Ek martaba Aap Somnath Mandir me gaye to dekha ke waha logo ne But ke saamne laddoo rakhe the. Aap ne farmaaya “Kya yeh but in laddoo ko khaata hai?” Logo ne jawaab diya ke “Yeh to nahi khaata magar ek ghante baad hum in laddoo ko khaa lenge.” Aap ne farmaaya “Agar main kahu to yeh but laddaa khaa lega.” Un logo ne kaha “Aisa nahi ho sakta.” Aap ne ungli se ishaara kiya to woh But saare laddoo khaa gaya.

********************
Aap ne Somnath ke Raaja ko Zulm se baaz aane ke liye bahot samjahaaya. Magar woh na maana.

Ek martaba Raaja ne ek budhi aurat ke be-qasoor jawaan bete ko qatl kar diya to aakhir kaar Aap ne mash’hoor aarifa kaamila Sayyeda Faatima urfe Maai Puri Maa rahmatullāhi alaihi ko ek khat diya aur farmaaya ke “Aap mere is musalle par baithkar aankhe bandh kar lena. Mera ye musalla Aap ko Sultaan Mahmood Ghaznawi ke darbaar me pahuncha dega. Aap is khat ko Sultaan Mahmood Ghaznwvi ko dekar phir isi tarah waapas aa jaana.”
Chunaanche Sayyeda Faatima urfe Maai Puri Maa Aap ke farmaan ke mutaabiq Aap ka khat Sultaan Mahmood Ghaznawi rahmatullāhi alaihi ko pahunchakar waapas aa gai.

Aap ka khat padhkar Sultaan Mahmood Ghaznawi apne lashkar ke saath Somnath ki jaanib rawaana hue. Lekin Zil Qa’ada 416 Hijri (December 1025 A.D.) me Sultaan Mahmood Ghaznawi ke Somanth pahunchne se pehle hi Aap ka wisaal ho gaya.

********************
416 Hijri (1025 A.D.) me Sultaan Mahmood Ghaznawi ko Somntath par fateh na mili. Kai baar chadhaai karne ke baad jab kaamyaab na hue to aakhir me 418 Hijri (1027 A.D.) me unho ne apne peer Hazrat Khwaja Abul Hasan al-Kharaqani rahmatullāhi alaihi ka kurta mubarak mangwaaya aur ALLĀH ta’ala se us ke waseele musalmano ki fateh ki dua ki to ALLĀH ta’ala ne un ke lashkar ke Hazrat Ja’afar wa Muzaffar Herati naami 2 mujaahid jawaano ke zariye Somnath par fateh ata farmai. Is jung me Hazrat Ja’afar aur Muzaffar shaheed ho gaye.

********************
Aap ka wisaal 1 Sha’abaan 416 Hijri (27 September 1025 A.D.) ko hua.

Aap ka mazaar Veraval (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Sayyed Abul Hasan, Ali Iraqi urfe Haaji Mangroli Shaah rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.