Hazrat Khwaja Sadeed-ud-deen Huzaifa al-Mar’ashi rahmatullāhi alaihi

36371645_1310679785733209_1139310035986284544_n
Hazrat Khwaja Sadeed-ud-deen Huzaifa al-Mar’ashi rahmatullāhi alaihi :

Aap ki wilaadat Mar’ash (Shaam) me hui.

Aap ke waalid ka naam Ibne Qataadah hai.

****************
Aap 7 saal ki umr me Haafiz e Qur’an hue. Aur Qir’at ki 7 qism ke maahir hue.

16 saal ki umr me Aap ne Uloom e Zaahiri ki ta’aleem mukammal ki.

****************
Phir Hazrate Khizr alaihis salaam ke farmaan par Aap Hazrat Sultaan Ibrāheem bin Ad’ham rahmatullāhi alaihi ki baargaah me haazir hue.

Hazrat ne badi shafqat wa mohabbat ke saath uthkar Aap ko apne gale lagaaya aur farmaaya ‘Huzaifa! Itminaan rakho, In sha ALLĀH chand dino me tumhara kaam ban jaayega.’
Aap foran Hazrat ke mureed hue aur tanhai me Zirk e Ilāhi mashgool ho gaye.

Aap Peer ki khidmat karte rahe aur Sulook aur Tasawwuf ki ta’aleem haasil ki. Peer ke saath safar karte hue Aap ne bahot saare Auliya aur Asfiya se faiz haasil kiya.

18 saal ki umr me Aap Aalim e Ilme Ladunni ho gaye.

Phir Hazrat Sultaan Ibrāheem bin Ad’ham rahmatullāhi alaihi ne Aap ko Khirqa e Khilaafat ata farmaaya.

****************
Aap Saahib e Israar the.

Aap hamesha ba-wuzu rehte the aur insaani zaroorato ke siwa kabhi aap ka wuzu nahi toota.

Aap hafte me 6 din khaana khaate the aur farmaate ke “Soofi ka khuraak to Laa ilāha illallāh hai.”

Aap akṡar waqt Riyaazat wa mujaahida me guzaarte.

Aap har roz din me ek martaba aur raat me ek martaba pura Qur’an majeed tilaawat farmaate.

Aap Durwesho ka bahot ehtaraam karte the.

Aap hamesha taat ke libaas pahente the aur tanhaai me giryah o zaari me mashgool rehte the.

****************
Logo ne Aap se puchha ke “Aap ke is Qadr rone ki wajah kya hai?” to Aap ne farmaaya “Main is wajah se rota hu ke mujhe maaloom nahi ke Qayaamat ke din main Jannati giroh me hounga ya Jahannami giroh me hounga.”
Ye sunkar ek shakhs ne kaha ke “Phir Aap logo ko Mureed kyun karte hain.’ Us shakhs ki yeh baat sunkar Aap ne ek na’ara maara aur behosh ho gaye. Jab hosh me aaye to ghaib se aawaaz aai jis ko tamaam haazireen ne suni “Aye Huzaifa! Main tumhe Dost rakhta hu aur apne Habeeb Mohammad Mustafa sallallāhu alaihi wa sallam ke saath tumhe Jannat me jagah dunga.”
Us waqt majme me taqreeban 3000 Kuffaar o mushrikeen maujood the. Haatife ghaibi se ye aawaaz sunkar tamaam log musalman ho gaye.

****************
Aap jab Huzoor e aqdas sallallāhu ta’ala alaihi wa sallam ke Roza e paak ki ziyarat se musharraf hue to usi waqt Aap ko Huzoor Sarwar e Kaunain sallallāhu ta’ala alaihi wa sallam ka deedaar mayassar hua.
Aap ne Huzoor sallallāhu ta’ala alaihi wa sallam ki baargaah me ba-adab arz kiya ke ‘Ya Rasool-Allāh sallallāhu ta’ala alaihi wa sallam! Mujhe har waqt is baat ka khauf rehta hai ke kahi muje dozakh me na daal diya jaaye.’

Huzoore akram sallallāhu ta’ala alaihi wa sallam ne irshaad farmaaya “Huzaifa! Mard (e kaamil) bano, Tum Jannat me mere saath aaoge aur jo log tumhaare saath ta’alluq rakhenge wo bhi jannat me jaayenge.”

****************
Karaamat :
‾‾‾‾‾‾‾‾‾‾‾‾‾‾
Ek martaba chand log aaye aur kaha ke “Aye Huzaifa! Agar tum khuda ta’ala ki yaad me mashgool ho to hum tumhe is se rok denge.” (Ma’az-ALLĀH)
Aap ne farmaya ke “Agar tum hume nuqsaan pahuncha sakte ho to pahunchaao.” Aur Aap ne un ki taraf koi tawajjoh na ki.
Un me se ek aadmi ne bahot zor se Aap ka haath pakad kar takleef di. Aap ke munh se 3 martaba ‘Aah Aah Aah’ nikal gaya.

Usi waqt Aap ke dahen e paak (munh) se ek aag nikli aur un sab zaalimo ko jalaakar khaak kar diya.

****************
Aap ne Sulook ki kai kitaaben bhi likhi hain.

****************
Aap irshaad farmaate hain :
“Durvesh ko khaali haath, khaali pait aur duniya se khaali dil rehna chaahiye.”
“Agar tum kisi Durvesh ke haath me dirham dekho to us ke qareeb na jaao.”

****************
Aap Hazrat Khwaja Sultaan Ibrāheem bin Ad’ham rahmatullāhi alaihi ke mureed aur khalifa hain.

Aap ke khalifa :
Hazrat Khwaja Ameen-ud-deen Abu Hubaira Basri rahmatullāhi alaihi.

****************
Aap ka wisaal 14 Shawwaal 207 Hijri (March 823 A.D.) ko hua.

Aap ka mazaar Basra (Iraq) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Sadeed-ud-deen Huzaifa al-Mar’ashi aur tamaam Auliya Allāh aur ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.