Hazrat Khwaja Noor Muhammad Maharwi rahmatullāhi alaihi

21078530_1111615995639590_8393488273981761151_n

Hazrat Khwaja Noor Muhammad Maharwi rahmatullāhi alaihi :

Laqab :
‾‾‾‾‾‾‾‾‾‾
Qibla-e-Aalam.

**********************
Aap ki wilaadat 14 Ramazaan 1143 (23 March 1731 A.D.) ko Mahar ke qareeb Chotala (Bahawalpur, Punjab) me hui.

Aap ke waalid ka naam Hindaal bin Taataar aur waalida ka naam Aaqila Bibi hai.
Aap ke waalid Kharal Panwar Raajput the.

Aap ka asla naam Bahbal tha.

**********************
Aap ne 6 saal ki umr me Dera Gazi Khan Haafiz Mohaammad Mas’ood se ta’aleem shuru ki aur Haafiz e Qur’an hue.
Phir Lahore me ta’aleem haasil ki aur Aalim bane.

Phir Delhi tashreef le gaye aur 35 saal tak Hazrat Maulana Fakhr-ud-deen Chishti Dehalwi rahmatullāhi alaihi ki khidmat me rehkar ta’aleem aur faiz haasil kiya.

Ek martaba Hazrat Maulana Fakhr-ud-deen Chishti Dehalwi ne Aap ko ek wazeefa diya aur farmaaya ke ‘Ise kaṡrat se padhte rehna.’ Kuchh din baad Hazrat ne puchha ke ‘Wazeefa padhne se kuchh faiz haasil hua?’ Aap ne arz kiya ‘Huzoor! Ab tak nahi hua.’ Hazrat ne farmaaya ‘Ab se is wazeefa ko kam padhna.’ Aap ne Hazrat ke farmaan ki taamil ki. Kuchh din baad Hazrat ne phir se Aap se puchha ‘Kuchh faiz haasil hua?’ Aap ne arz kiya ‘Huzoor! Ab tak nahi hua.’ Hazrat ne farmaaya ‘Ab is wazeefa ko padhna band kar do.’ Aap ne Hazrat ke farmaan ki taamil ki. Jaise hi Aap ne wazeefa band kiya aap ne mehsoos kiya ke Aap ko baatini faiz milna jaari ho gaya. Hazrat ne farmaaya ke ‘Ye sirf tumharri farmaan bardaari ka ek imtihaan tha.’

Hazrat Aap se bahot mohabbat karte the aur Aap ko ‘Noor Muhammad’ ka khitaab ata farmaaya.
Aap ke Delhi se Mahar tashreef le jaane ke baad Hazrat ne logo se farmaaya ‘Makhan le gaya Punjabi, Chhaachh piyo Sansaar.’

**********************
Aap Hazrat ki ijaazat se Mahar tashreef laaye aur logo ko ta’aleem wa faiz ata farmaate rahe.
Punjab aur Sindh me beshumaar logo ne Aap ke zariye hidaayat haasil ki aur beshumaar log Islaam me daakhil hue.

**********************
Aqwaal :
‾‾‾‾‾‾‾‾‾‾‾‾
(1) Khalq ki khidmat karo, Khaaliq tum se raazi ho jaayega.
(2) Yeh jaan lena zaroori hai ke main gunaah se paak nahi hu. Jis ko ye samajh mil gai us par ALLĀH ka bada fazl hua.
(3) Qalb ki beemaariyo ko door karne ki bahot saari dawa hain, Magar jo dawa lena hi nahi chaahta ho wo kabhi durust nahi ho sakta.
(4) Huzoor Rasool-Allāh sallallāhu alaihi wa sallam par eimaan laane waale ke liye sab se ahem baat ye hai ke apne sahi aqeede par ṡaabit qadam rahe aur shariat ka paaband rahe.

**********************
Aap ke 3 saahabzaade aur 2 saahabzaadiya hain.

Sahabzaade :
(1) Noor Ahmad, (2) Noor Hasan, (3) Noor Samad.
Saahabzaadiya :
(1) Zeenat Bibi, (2) Saahib Bibi.

**********************
Aap Hazrat Maulana Fakhr-ud-deen Chishti Dehalwi rahmatullāhi alaihi ke mureed aur khalifa hain.
Aur ‘Chishti Nizaami Fakhri’ silsila ke Shaikh hain.

Aap ke khulfa :
(1) Hazrat Khwaja Noor Muhammad Naroowala rahmatullāhi alaihi (Haji pur),
(2) Hazrat Khwaja Shaah Sulaimān Taunswi urfe Peer Pathaan rahmatullāhi alaihi (Taunsa),
(3) Hazrat Mian Muhammad Husain Panwar rahmatullāhi alaihi Chishti (Mehmood Kot),
(4) Hazrat Haafiz Jamaalullāh Multani rahmatullāhi alaihi (Multan).

**********************
Wisaal se pehle mureedo ne wasiyat aur naseehat ke liye kaha to Aap ne farmaaya ke ‘Saadaat e kiraam ki aur Buzurgaane deen ki ta’zaeem wa khidmat karte rahoge hamesha kaamyaab rahoge.’

**********************
Aap ka wisaal 3 Zil Hijjah 1205 Hijri (3 August 1791 A.D.) ko hua.

Aap ka mazaar Chishtian (Punjab, Pakistan) me Hazrat Khwaja Taaj-ud-deen Chishti rahmatullāhi alaihi ke mazaar ke qareeb hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Noor Muhammad Bahbal Maharwi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.