Hazrat Khwaja Hameed-ud-deen Chaheldaah Suharwardi rahmatullāhi alaihi

44821306_1422006657933854_8099351118074609664_n

Aap Qutb-ul-Aqtaab aur Aarif Billāh the.
Aap ne Ahmedabad me 12 saal tak Ilm haasil kiya aur Saahibe Ma’arefat wa Haqeeqat hue lekin apna raaz zaahir nahi karte the.

Puri zindagi Sunnate Rasool ke mutaabiq amal karte rahe.
Hamesha saadgi apnaate.
Raaste me chalte waqt kabhi idhar udhar nazar na karte.
Kabhi kisi ghair aurat ki taraf nazar na karte.
Aap kabhi chaar paai par nahi sote the.
Aap ne kabhi lazeez khaana tanaawul na farmaya. Aap ki giza Jav ki roti thi. Aap kabhi kisi ke yaha daawat me tashreef le jaate to sirf ek ya do luqme khaa kar waapas chale aate.

*********************
Karaamat :
‾‾‾‾‾‾‾‾‾‾‾‾
(1) Ek martaba Aap apne saahabzaade Hazrat Khwaja Mahmood Dariyai Dulha rahmatullāhi alaihi ke saath Chikhli jojha ke jangal me tashreef le gaye. Aap ne ird gird wuzu ke liye paani talaash kiya magar paani kahi nazar na aaya. Aap ne ek darakht ki jad me apni mubarak ungli se lakeer khinchi. Foran us darakht ki jad se paani behna shuru ho gaya. Us paani se dono ne wuzu kiya aur zikre Ilāhi me masroof ho gae.
Woh paani ka chashma behta raha aur jab paani Qasbe ke nazdeek aa gaya to logo ne aakar arz ki ke “Huzoor! Paani agar qasbe ke andar daakhil hoga to hum ko nuqsaan karega.” Ye sun kar Aap ne paani se mukhaatib hokar farmaaya “Qasbe ke kinaare kinaare beh jaa.” Aap ke farmaane se woh chashma kinaare kinaare behta hua aage jaa kar ‘Mahi’ nadi se mil gaya.

(2) Burhanpur me Aap ki chaahne waali ek Aurat rehti thi. Use jab khabar mili ke Hazrat ka wisaal ho gaya hai to woh rone lagi aur kehne lagi ke “Afsos ke main Aap ki mureed na ho saki.”
Ek raat use khwaab me Aap ki ziyarat hui aur khwaab hi me Aap ne use mureed kiya. Jab woh bedaar hui to Shajarah shareef us ke saamne maujood tha.

****************
Aap ke 2 saahbabzaade hain :
(1) Ahmad Daata Wali,
(2) Mahmood Dariyai Dulha.

****************
Aap Hazrat Shaah e aalam Sayyed Siraaj-ud-deen Muhammad rahmatullāhi alaihi ke mureed aur khalifa hain.

Aap ke khalifa :
Hazrat Khwaja Mahmood Dariyai Dulha rahmatullāhi alaihi.

****************
Aap ka wisaal 6 Safar ko hua.

Aap ka mazaar Birpur (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Hameed-ud-deen Chaheldaah Suharwardi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.