Hazrat Khwaja Habeeb Ali Shaah rahmatullāhi alaihi

39387249_1371859896281864_1306989398922887168_n

Alqaab :
‾‾‾‾‾‾‾‾‾
Qutb-e-Kokan, Shaah-e-Deccan.

******************
Aap ki wilaadat 20 Jamaadi uṡ ṡaani 1236 Hijri (1819 A.D.) ko Hyderabad me hui.

Aap ke waalid ka naam Nawaab Ahmad Yaar Khan bin Nawaab Izzat Yaar Khan aur waalida ka naam Bibi Amatul Fatima bint Hazrat Sayyed Ali Razwi al-Madani hai.

Aap Hazrat Abu Bakr Siddeeq radiy-Allāhu anhu ki nasl se hain.

******************
Aap ke pardaada Hazrat Maulana Hakeem Abdul Khadar bin Shaah Abdul Ghafur Siddeeqi Chinaki rahmatullāhi alaihi Ilm e Tab aur Tasawwuf wa Shariat ke maahir the aur Nawaab Meer Nizaam Ali Khan Bahaadur ki daawat par 1176 Hijri (1762 A.D.) me apne bhai Hazrat Maulana Hakeem Shaah Mohammad Ja’afar Siddeeqi Chinaki ke saath Ahmedabad (Gujrat) se Hyderabad tashreef laaye. Nawaab ne unhe ‘Hakeem ul Hukuma (Chief Royal Physician) aur Sadr Sudoor’ ka ohada diya. Un ke baad Maulana Hakeem Shaah Mohammad Ja’afar Khan ko aur un ke baad Hakeem Nawaab Izzat Yar Khan ko aur un ke baad Nawaab Ahmad Yaar Khan ko ye ohada mila.

******************
Hazrat Khwaja Haafiz Ali Shaah Khairabadi rahmatullāhi alaihi ne ek martaba Nawaab Ahmad Yaar Khan se farmaaya ke ‘Tumhare yaha mera farzand paida hoga. Us ka naam Habeeb rakhna.’ Ye sunkar Nawaab Ahmad Yaar Khan khaamosh rehkar sochne lage ke ‘Ye kaise mumkin hoga jab ke meri biwi ko hamal rehne ki umr guzar chuki hai.’ Khwaja Haafiz Ali Shaah Khairabadi ne foran farmaaya ‘Nahi nahi, Tumhare yaha yaqeenan beta paida hoga.’
Is ke baad Khwaja Haafiz Ali Shaah Khiarabad tashreef le gaye. Aur 2 saal baad Ahmad Yaar Khan ki biwi ko ek khubsurat beta hua. Jis ka naam Hazrat ke farmaan ke mutaabiq Habeeb Yaar Khan rakha gaya.
Jab aap ki umr 4 saal aur 4 din hui tab Khwaja Haafiz Ali Shaah Hyderabad tashreef laaye to Hazrat ne daryaaft kiya ke ‘Mera beta aa gaya hai?’ Nawaab Ahmad Yaar Khan ne kaha ‘Haan.’ Hazrat ne farmaaya ‘Us ka naam kya rakha hai?’ Nawaab Ahmad Yaar Khan ne kaha ‘Habeeb Yaar Khan Bahaadur.’ Hazrat ne farmaaya ‘Main us ki Bismillāh khwaani ke liye aaya hu.’
23 Shawwaal 1240 Hijri ko Bismillāh khwaani ki gai. Phir Hazrat ne apne ek haath me meethai rakhi aur dusre haath me sone ki ashrafiya rakhi aur aap ke saamne rakhkar aap se farmaaya ‘Tum ko jo pasand ho wo le lo.’Aap ne farmaaya ‘Main dono lunga.’ Hazrat Haafiz paak ne muskurakar farmaaya ‘Mera beta dunyaawi daulat ke badle Roohaani daulat pasand karega aur aur roohaani daulat se maalamaal hoga.’

******************
6 saal ki umr me Aap ne tanhai me Muraaqaba karna shuru kiya.
9 saal ki umr me hamesha ba-wuzu rehna shuru kiya.

******************
Aap Haafiz e Qur’an hue. Phir Hadeeṡ aur Tafseer ki ta’aleem haasil ki.
Aap ne Arabi aur Faarsi kitaabo ki ta’aleem haasil ki.

******************
30 Moharram 1252 Hijri (May 1836 A.D.) ko 16 saal ki umr me aap Hazrat Khwaja Haafiz Sayyed Mohammad Ali Shaah Khairabadi Chishti rahmatullāhi alaihi ke mureed hue aur kuchh arse baad apni tamaam milkiyat chhodkar Peer ki khidmat me lag gaye aur faiz aur ta’aleem haasil karte rahe.
Aap ne Peer saahab se Maulana Jalaal-ud-deen Rumi ki ‘Maṡnawi shareef’ ki ta’aleem haasil ki.
Aap ne Kashf-ul-Mahjub Dalaa’il-ul-Aarifeen, Madaarij-un-Nabuwwah, Raahat-ul-Quloob, Fusus-ul-Hikam, Kashkol-e-Kaleemi, Ghunyat-ut-Taalibeen aur Tafseer e Ibn Kaseer ki bhi ta’aleem haasil ki.

******************
Aap ne apne Peer ki mohabbat me chand mash’hoor ash’aar likhe hain :
(1) ‘Hum ko Haafiz ki gali ka woh tasawwur bandha,
Shauq Jannat na raha baagh e Iram bhool gaye.’

(2) ‘Hamari kuchh bhi na thi haqeeqat, Tumhare dar se mili hai izzat,
Kharaab hone na dijiyo saahib, Tumare dar ka bana hua hu.’

******************
Aap Peer ke farmaan par Mumbai tashreef laaye aur Dockyard Road, Mazgoan (Mumbai) me apni Khaanqaah shuru ki aur ta’aleem aur faiz ata karte rahe.
Aap ne Islaam ki aur Chishti silsile ki isha’at ke liye bahot saare mulko me apne khulfa bheje.
Aap apne mureedo aur shaagirdo ko hamesha ikhlaas ke saath Islaam ki isha’at karne ki aur Khidmate khalq karne ki aur bin zaroori bahes se door rehne ki ta’aleem dete.

******************
Aap ne taqreeban 22 kitaaben likhi hain.
Jin me Habeeb-ul-Taalibaan aur Habeeb-un-Naas fee Radd il Khannaas mash’hoor hain.

Aap ne Hindi, Urdu, Farsi aur Kokani me Nazmen likhi hain.
‘Deewaan-e-Habeeb’ (3 Jild) me Aap ki Nazamo ka majmua hai.

******************
Aap farmaate hain :

(1) Fanaa ke 3 darje hain : Fanaa fish Shaikh, Fanaa fir Rasool aur Fanaa Fillāh.
Aur har darje ke andar beshumaar darje hote hai.

(2) Zikr ki 4 qismen hain :
Zikr an-Naasoot, Zikr al-Malakoot, Zikr al-Jabaroot and Zikr al-Laahoot.

Zikr an-Naasoot ya’ni ‘Laā Ilāha Ill-Allāh’ ka zikr, ye Zikr e Shariat hai.
Zikr al-Malakoot ya’ni Ill-Allāh ka zikr, ye Zikr e Tareeqat hai.
Zikr al-Jabaroot ya’ni ‘Allāh’ ka zikr, ye Zikr e Ma’arifat hai.
Zikr al-Laahoot ya’ni ‘Hu’ ka zikr, ye Zikr e Haqeeqat (ultimate reality) hai.

******************
Aap ke 2 saahabzaade hain :
(1) Khwaja Hidaayat Ali Shaah urfe Hidaayat Yaar Khan,
(2) Khwaja Makhdoom Haafiz Ali Shaah urfe Kareem Yaar Khan (Sajjaada Nasheen).

******************
Aap Hazrat Haafiz Sayyed Khwaja Mohammad Ali Shaah Khairabadi Chishti rahmatullāhi alaihi ke mureed aur khalifa hain.
Aap ‘Chishti Habeebi’ silsila jaari hai.

Aap ke khulfa :
(1) Hazrath Khwaja Shaah Ghulaam Muhammad urfe Soofi Saahib (Durban / South Africa),
(2) Hazrat Maulana Abdul Lateef Qaazi Siddeeqi (Cape Town / South Africa),
(3) Hazrat Khwaja Shaah Mohammad Ibrāheem Soofi (Ajmer),
(4) Hazrat Khwaja Hidaayat Ali Shaah (Hyderabad),
(5) Hazrat Khwaja Makhdoom Haafiz Ali Shaah (Hyderabad),
(6) Hazrat Sayyed Faqeer Muhammad Shaah (Ahmednagar).

******************
Aap ka wisaal 6 Zil Hijjah 1323 Hijri (1 February 1906 A.D.) ko Jumeraat ke roz Mumbai me hua.

Aap ke jism e aqdas ko rail se Hyderabad laaya gaya.
Namaaz e Eid ke baad Aap ki namaaz e janaaza padhi gai aur is ke baad Makkah Masjid, Hyderabad me Hazrat Maulana Hasan uz zamaan Haafizi ne bhi Aap ki namaaze janaaza padhaai jis me badi ta’adaad me log saamil hue.
10 Zil Hijjah 1323 Hijri ko dafn kiya gaya.

Aap ka mazaar Katalmandi, Hyderabad (Telangana) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Habeeb Ali Shaah rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.