Hazrat Khwaja Ahmad Chishti Mairawi rahmatullāhi alaihi

43629495_1410268542440999_3570304887512104960_n

Aap ki wilaadat 1250 Hjri (1834 A.D.) me Kohistan me hui.

Aap ke waalid ka naam Muhammad Barkhurdaar hai.

Aap Khokhar Awaan qabeele se hain.

*******************
Aap ne apne waalid se Qur’an majeed ki ta’aleem haasil ki.
Unki wafaat ke baad Aap ke maamu Ali Khan ne Aap ki tarbiyat wa kafaalat ki. Aap ke waali aur maamu Hazrat Khwaja Shaah Sulaimān Taunsawi rahmatullāhi alaihi ke mureed the. Is liye Aap ko un ke Aastaane me daakhil kar diya. Waha Aap ne 8 saal tak ta’aleem haasil ki. Is dauraan Riyaazat bhi karte rahe.
Phir Multan tashreef le gaye aur ulama se iktisaabe faiz kiya. Phir Maulana Mamlook Ali ke shaagird bane.

****************
Takmile uloom ke baad Aap 7 saal tak safar karke Kashmir, Paak Pattan, Multan, Dehli, Ajmer aur Kaliyar jaakar faiz haasil kiya. Phir Taunsa waapas aaye.

Kuchh arse baad phir siyaahat ke liye tashreef le gaye. Jab Pindi Ghep (Zila Atak) me Maqaame Maira par pahunche to Aap ki tabiyat ko bahot sukoon mila aur waha mustaqil qayaam pazeer ho gaye aur ta’aleem wa faiz ata farmaate rahe.
Aap ne sab se pehle yaha ek Deeni idaara qaayam kiya jaha door o nazdeek ke talba ta’aleem haasil karne aane lage. Phir Masjid aur Khaanqaah ki ta’amir ki.

****************
Aap haq parast wa haq go the.
Aap hamesha Sunnate Rasool ko apnaane ki ta’aleem farmaate.
Angrezi hukoomat aur us ke Hawaariyo ko Islaam ka dushman samajhte the aur un ki tehzeeb se door rehne ki taaqid farmaate.

****************
Hazrat Peer Sayyed Meher Ali Shaah Golrawi rahmatullāhi alaihi ke saath Aap ka bahot achha ta’alluq tha. Hazrat Aap ko Laalu (bhai) kehkar bulaate.

****************
Aap Hazrat Khwaja Shaah Sulaimān Chishti Taunsawi rahmatullāhi alaihi ke mureed aur khalifa hain.

Hazrat Khwaja Shaah Allāh-Bakhsh Taunsawi rahmatullāhi alaihi aur Hazrat Khwaja Mohammad Faazil Shaah rahmatullāhi alaihi ne bhi Aap ko khilaafat ata farmai hai.

****************
Aap ka wisaal 5 Moharram 1330 Hijri (27 December 1911 A.D.) ko hua.

Aap ka mazaar Maira (Punjab, Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Ahmad Chishti Mairawi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.