Hazrat Allama Maulana Muhammad Noor-bakhsh Tawakkali rahmatullāhi alaihi

50783000_1486913264776526_8819915363257942016_n

Laqab :
‾‾‾‾‾‾‾‾‾
Fakhr-e-Ahle Sunnat.

*****************
Aap ki wilaadat 12 Rabi ul Awwal 1305 Hijri (1888 A.D.) me Chak Qadyan, Zila Ludhiana me hui.

*****************
Aap ne ibtidaai ta’aleem apne ilaaqe ke ulama se haasil ki.
Phir Aligarh University se M.A. Arabi ki degree haasil ki.
Phir Municipal Board College me Professor bane aur saath me Maulana Ghulaam Rasool Qaasimi Amritsari ki khidmat me haazir hokar Hadeeṡ, Tafseer aur Fiq’h ki ta’aleem haasil karte rahe.

*****************
Jab Aap Mohammadian School, Ambala me Head Master the un dino me Hazrat Khwaja Tawakkal Shaah Ambalawi rahmatullāhi alaihi [Wisaal 1315 Hijri (1897 A.D.)] se bai’at ki aur phir khilaafat aur ijaazat se sarfaraaz hue.

Ek arse tak Aap Jaamia Naeemia, Lahore ke Naazime ta’aleemaat rahe aur saath saath Government College me Shoaba e Arabi ke Professor bhi rahe. Kuchh muddat ke baad College se musta’af ho gaye.

Apni ta’aleemaat ke zariye Aap ne Ahle Sunnat wal Jama’at ki azeem khidmat ki hai.

***************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :
(1) Seerat e Rasool e Arabi
(2) Moazizaat-un-Nabi
(3) Meelaad-un-Nabi
(4) Ghazwat-un-Nabi
(5) Qaseeda-ul-Burda Sharh-ul-Umda
(6) Sirat e Ghauṡ ul aazam
(7) Tazkira Masha’ikh-e-Naqshbandia
(8) Imaam Bukhari Shaafa’i
(9) Kitaab-ul-Barzakh
(10) E’ajaz-ul-Qur’an
(11) Tafseer Soorah al-Fatiha wa Baqarah
(12) Aqaa’id e Ahle Sunnat
(13) Al-Afwaah-ul-Saheeh fee Jawaab-ul-Jarh alaa Abi Haneefa (Imaame aazam Abu Haneefa rahmatullāhi alaihi par Raafzi aur Ghair Muqallideen ke aitaraazaat ka jawaab)
(14) Tahfah e Shia (2 Jild)
(15) Sar Gazasht Ibn-e-Tamaima.

*****************
Aap Hazrat Khwaja Tawakkal Shaah Ambalawi rahmatullāhi alaihi ke mureed aur khalifa hain.

*****************
Sid’hi se girne ki wajah se Aap kuchh arsa beemaar rahe.

Aap ka wisaal 13 Jamaadi ul awwal 1368 Hijri (24 March 1948 A.D.) ko hua.

Aap ka mazaar Lalpur, Faisalabad (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Allama Maulana Muhammad Noor-bakhsh Tawakkali rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.