Hazrat Khwaja Faiz Mohammad Chishti Shah-jamali rahmatullāhi alaihi

29595168_1243374019130453_507509800573997442_n

Hazrat Khwaja Faiz Mohammad Chishti Shah-jamali rahmatullāhi alaihi :

Aap ki wilaadat 16 Zil Qa’ada 1290 Hijri (5 January 1874 A.D.) ko Jumeraat ke roz Subah ko Shah jamal, Dera Ghazi Khan me hui.

Aapke waalid ka naam Hazrat Maulana Noor-ud-deen hai.

***************
Aap ne ibtidaai ta’aleem apne waalid Hazrat Maulana Noor-ud-deen se haasil ki.
Phir Hazrat Maulana Naseer bakhsh Chishti se majeed ta’aleem haasil ki.
Phir Hazrat Maulana Khaleel Ahmad (Rohilan wali, Zila Muzaffar) aur Hazrat Haafiz saahib (Sailan wali, Zila Mianwali) se Dars e Hadeeṡ aur deegar uloom ki ta’aleem haasil ki.

****************
Aap Aalim-e-Kabeer, Faazil-e-Munfarid, Muhaddeeṡ-e-Jaleel, Ustaad-ul-Ulama, Murshid-e-Barhaq, aur Ghauṡ e zamaan the.

Aap puri zinagi Qur’an wa Hadeeṡ ki ta’aleem wa tadrees karte rahe.

Aap paabande Sunnat e Rasool the aur logo ko bhi is ki taaqid wa naseeha karte the.

Aap ke shaagirdo me Hazrat Maulana Mohammad Zareef Faizi rahmatullāhi alaihi, Hazrat Khwaja Ghulaam Yāseen Chishti Shah-Jamali rahmatullāhi alaihi, Hazrat Maulana Sayyed Meer Khoshabi, Hazrat Maulana Ghulaam Mahmood Piplanwi, Hazrat Maulana Peer Abdullāh, Hazrat Abdul Kareem Faizi mash’hoor hain.

****************
Hazrat Maulana Mohammad Zareef Faizi rahmatullāhi alaihi farmaate hain ki :
Ek martaba Aap Hazrat Khwaja Noor Muhammad Naroowala rahmatullāhi alaihi ke urs ke mauqe par Hajipur tashreef le gaye. Waha ke sajjaada nasheen Mian Allāh Diwaaya saahib ne Aap ke khaane aur thehrne ke intazaam par tawjjoh nahi di. Raat ko unho ne khwaab me wo Huzoor Rasool-Allāh sallallāhu alaihi wa sallam ki ziyarat hui aur dekha ke Khwaja Faiz Mohammad Chishti Shah-jamali Huzoor sallallāhu alaihi wa sallam ke saamne baithe hain aur Huzoor sallallāhu alaihi wa sallam ne Mian Allāh Diwaaya se irshaad farmaaya : “Tumhe jis ke sadqe me sab ne’maten milti hai usi ko tum ne nazar andaaz kiya.’” Unho ne arz kiya “Ya Rasool-Allāh sallallāhu alaihi wa sallam! (Wahaabi) Maulwi un ko Bid’ati kehte hain.” Huzoor sallallāhu alaihi wa sallam ne farmaaya “Jo Maulwi in par tanqeed karte hain wo in ke shaagirdo ke barabar bhi nahi hain.”

****************
Aap ke 3 saahabzaade hain :
(1) Khwaja Ghulaam Yāseen
(2) Khwaja Allama Mohammad Akram
(3) Khwaja Moammad Aazam.

****************
Aap Hazrat Khwaja Abdur Rahmān Chishti Multani Arabi rahmatullāhi alaihi ke mureed aur khalifa hain.
Hazrat Khwaja Shaah Allāh bakhsh Chishti Taunsawi rahmatullāhi alaihi ne bhi Aap ko khilaafat ata farmai hai.

Aap se ‘Chishti (Nizaami Naasiri) Faizi’ silsila jaari hai.

Aap ke khulfa :
(1) Hazrat Khwaja Ghulaam Yāseen Chishti Shah-Jamali rahmatullāhi alaihi,
(2) Hazrat Maulana Mohammad Zareef Faizi rahmatullāhi alaihi,
(3) Hazrat Allama Mufti Muhammad Manzoor Ahmad Faizi rahmatullāhi alaihi.

****************
Aap ka wisaal 8 Rajab 1364 Hijri (18 June 1945 A.D.) ko hua.

Aap ka mazaar Sandali shareef, Zila Dera Ghazi Khan me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Faiz Mohammad Chishti Shah-jamali rahmatullāhi alaihi aur tamaam Auliya Allāh aur Ahle bait aur Ashaaba ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.