Hazrat Shaikh Sayyed Abu Nasr Mohiy-ud-deen Mohammad Qaadri al-Jilani rahmatullāhi alaihi

47384304_1451395388328314_3886211861120548864_n

Aap ki wilaadat Baghdad (Iraq) me hui.

Aap ke waalid ka naam Hazrat Shaikh Sayyed Abu Saaleh Imaad-ud-deen Nasr Abdullāh bin Sayyed Taaj-ud-deen Abdul Razzaaq Qaadri al-Jilani rahmatullāhi alaihi hai.

Aap Hasani saadaat hain.
Aur Hazrat Ghauṡe aazam Sayyed Muhiy-ud-deen Abdul Qaadir Jilani rahmatullāhi alaihi ki nasl se hain.

****************
Aap ne apne waalid Hazrat Shaikh Sayyed Imaad-ud-deen Abu Saaleh Nasr rahmatullāhi alaihi se ta’aleem wa tarbiyat haasil ki.
Is ke baad Hazrat Hasan bin Ali bin Murtaza al-Alwi, Abu Is’hāq Yousuf bin Abu Haamid, Abul Fazl Muhammad bin Umar Armawi se Hadeeṡ ta’aleem haasil ki.

****************
Aap Jaleel-ul-qadr Aalim, Faqeeh aur Mohaddeeṡ the aur a’ala darje ke Mohaqqiq aur Mudarris the.

Aap ko Iraq ke Mufti muqarrar kiya gaya tha.
Aap ne Qaazi-ul-Quzzaat ke ohade se inkaar kiya.
Aur Baab-ul-Uzj me apne Jadde amjad ke Madrase me Dars o Tadrees me mashgool rehte.
Aap ne isha’at e Islaam ke liye Hind ke kai ilaaqe aur khaas kar Kashmir tak safar kiya.

Aap bahot hi raham dil aur sakhi the. Aap haajatmando ko madad farmaate.
Aap ki mehfil me ulama, durwesh, ghurba aur ameer sab log haazir hote. Aap sab ko faiz aur ta’aleem ata farmaate.

Aur puri raat Ibaadat, Riyaazat aur Tilaawat e Qur’an me guzaarte.

****************
Aap ke 4 saahabzaade hain :
(1) Sayyed Ja’afar Abdul Qaadir al-Kabeer
(2) Sayyed Ali
(3) Sayyed Abu Mas’ood Zaheer-ud-deen Ahmad
(4) Sayyed Abdullāh.

****************
Aap Hazrat Shaikh Sayyed Abu Saaleh Imaad-ud-deen Nasr Abdullāh Qaadri al-Jilani rahmatullāhi alaihi ke mureed aur khalifa hain.

Aap ke khulfa :
(1) Hazrat Shaikh Sayyed Ali Qaadri al-Jilani rahmatullāhi alaihi,
(2) Hazrat Shaikh Sayyed Abu Mas’ood Zaheer-ud-deen Ahmad Qaadri al-Jilani rahmatullāhi alaihi.

****************
Aap ka wisaal 27 Rabi-ul-Awwal 656 Hijri (13 April 1258 A.D.) ko hua.

Aap ka mazaar Baghdad (Iraq) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Sayyed Abu Nasr Mohiy-ud-deen Mohammad Qaadri al-Jilani rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.