Shan e Imaam e Hasan Alaihissalam

*Ausaaf :* Hazrat Imaam Hasan Nihayat Reham Dil, Sakhi, Ibadat Guzar Aur Afu o Darguzar Ke Paikar The, Aap Fajar Ki Namaz Ke Bad Tulu e Aaftab Tak Taik Laga Kar Bedh Jate Aur Masjid Me Maujood Logo Se Deeni Masail Par Guftagu Farmate, Jab Aaftab Buland Ho Jata To Chasht Ke Nawafil Ada Farmate Phir Ummahatul Momineen Ke Ghar Tashrif Le Jate The.

📚 *Reference* 📚
Tarikh Ibne Asakir, Jild 13, Safa 241.

*Sakhawat :* Aap Kasrat Se Sadqa o Khairat Farmate The Hatta Ke 2 Martaba Aapne Apna Sara Maal Aur 3 Martaba Apna Aadha Maal Rahe Khuda Me Sadqa Farmaya.

📚 *Reference* 📚
Tarikh Ibne Asakir, Jild 13, Safa 243.

Huzoor Nabi e Kareem Hazrat Muhammad Mustafa ﷺ Ko Hazrat Imaam Hasan Alahis Salam Se Bepanah Muhabbat Thi, Piyare Aaqa ﷺ Aapko Kabhi Apni Aagosh e Shafqat Me Lete To Kabhi Kandhe Mubarak Par Sawaar Kiye Hue Ghar Se Bahar Tashrif Late, Aapki Mamooli Si Takleef Par Bhi Beqaraar Ho Jate, Aapko Dekhne Aur Piyar Karne Ke Liye Sayyeda Fatima Salamullah Alaiha Ke Ghar Tashrif Le Jate, Aap Bhi Apne Piyare Nana Jaan Nabi e Kareem ﷺ Se Behad Manoos The, Namaz Ki Halat Me Pusht Mubarak Par Sawar Ho Jate To Kabhi Dadhi Mubarak Se Khelte Lekin Sarkar e Do Aalam ﷺ Ne Aapko Kabhi Mana Nahi Kiya.
Ek Martaba Hazrat Imaam Hasan Alahis Salam Ko Huzoor Nabi e Kareem ﷺ Ke Shaan e Mubarak Par Sawaar Dekh Kar Kisi Ne Kaha : Sahabzade Aapki Sawari Kesi Acchi Hai To Huzoor Nabi e Kareem ﷺ Ne Farmaya : Sawaar Bhi To Dekho Kesa Accha Hain Ya’ani Hazrat Imaam Hasan.

📚 *Reference* 📚
*1.* Tirmizi, Jild 5, Safa 432, Hadees No 3809
*2.* Musnad Ahmad Bin Hanbal, Jild 2, Safa 440.

*1. Aapka Naam – Hasan*
Hazrat Jibrail Alahis Salam Aapke Naam e Nami Ism e Girami Ko Bahisht Se Ek Nihayat Umda Kapde Par Likh Kar Huzoor Nabi e Kareem Sallallahu Alaihi wa Aala Aalehi wa Sallam Ki Khidmat e Aaliya Me Hadiyatan Laye The.

📚 *Reference* 📚
Shawahid Un Nabuwwat, Safa 300.

*2. Aapki Kunniyat -* Abu Muhammad
*Aapke Alqaab -* Sibte Payambar, Rayhanat Al Rasool, Taqi wa Sayyed Hai.

📚 *Reference* 📚
Tarikh ul Khulafa, Safa 149.

*3. Aapki Wiladat -* 15 Ramzan ul Mubarak 3 Hijri Me Madina Munawwara Me Hui.

📚 *Reference* 📚
Al Bidaya wal Nihaya, Jild 5, Safa 519.

*4. Tehneek wa Ghutti -* Tajdar e Kaynat Sallallahu Alaihi wa Aala Aalehi wa Sallam Ne Aapke Kaan Me Aazan Kahi Aur Apne Luwab e Dahan Sharif Se Tehneek wa Ghutti Di.

📚 *Reference* 📚
Al Muajjam ul Kabeer, Jild 1, Safa 313, Hadees No 926.
Al Bidaya wal Nihaya, Jild 5, Safa 519.

*5. Aqeeqah -* Nabi e Kareem Sallallahu Alaihi wa Aala Aalehi wa Sallam Ne Imaam Hasan Ke Aqeeqah Me 2 Dumbe Zibah Farmaye.

📚 *Reference* 📚
Nasai, Kitab Al Aqeeqah, Safa 688, Hadees 4225.
Sunan Al Kubra, Jild 3, Safa 76, Hadees 4545.

_Kisi Maa Ne Aesa Baccha Nahi Jana_

Hazrat Sayyedna Abdullah Bin Zubair Razi Allahu Tala Anhu Bhi Baqi Sahaba e Kiram Ki Tarah Nawasa e Rasool Hazrat Sayyedna Maula Imaam Hasan Mujtaba Alahis Salam Se Bhut Muhabbat Farmate The, Ek Moqa Par Hazrat Abdullah Bin Zubair Razi Allahu Tala Anhu Ne Farmaya Allah Subhanahu Wa Ta’ala Ki Qasam Aurton Ne Hasan Bin Ali Jaisa Farzand Nahi Jana.

📚 *Reference* 📚
Subul Al Huda Wal Rashad Fi Seerat Khair Al Abad, Jild 11, Safa 69.

_Imaam Hasan Ki Qabr e Anwar Ki Bedbi Karne Wale Ka Anjam_

Hazrat Aamash Razi Allahu Tala Anhu Se Riwayat Hai Ke Aapne Bayan Kiya Ke Ek Badbakht Shaks Ne Sayyedna Imaam Hasan Mujtaba Alahis Salam Ke Mazar e Anwar Par Badbakhti Se Bol o Baraz Kar Diya Wo Usi Waqt Pagal o Majnun Ho Gaya Aur Marte Dam Tak Kutto’n Ki Tarah Bhaunkta Raha Bad Maut Bhi Uski Qabr Se Bhayanak Aawaz Aati Goya Ke Koi Kutta Bhaunk Raha Hai.

📚 *Reference* 📚
Tarikh e Damishq, Ibne Asakir, Jild 13, Safa 305.

_Hazrat Imaam Hasan Ke Janaze Me Logo Ka Hujoom_

Jab Hazrat Imaam Hasan Mujtaba Alahis Salam Ki Shahadat Hui To Jab Aapko Jannat ul Baqi Me Madfan Ke Liye Le Jaya Gaya To Logo Ki Itni Tadad Wahan Thi Ki Sa’alba Bin Malik Kehte Hain Ki Pura Jannat ul Baqi Qabristan Logo Se Bhar Gaya Tha, Yahan Tak Agar Aasman Me Se Ek Sui Fenki Jaye To Zameen Par Na Gire Balki Kisi Ke Sar Par Gire, Itna Bada Qabristan Bhi Is Tarah Bhar Gaya Tha.

📚 *Reference* 📚
*1.* Shawahidun Nabuwat, Safa 300.
*2.* Tohfa e Najat, Jild 11, Safa 178, 215.

Hazrat Barah Bin Aazib Razi Allahu Tala Anhu Bayan Karte Hain Ki Mene Nabi e Kareem Sallallahu Alaihi wa Aala Aalehi wa Sallam Ko Dekha Is Haal Me Ki Aap Sallallahu Alaihi wa Aala Aalehi wa Sallam Ne Hazrat Imaam Hasan Alahis Salam Ko Apne Kandhe Par Uthaya Hua Tha Aur Farma Rahe The “Aye Allah Me Isse Muhabbat Karta Hu Tu Bhi Isse Muhabbat Farma”.

📚 *Reference* 📚
Sahih Bukhari, Jild 02, Safa 453, Hadees No 944.

Ek Martaba Hazrat Imaam Hasan Mujtaba Alahis Salam Paidal Hajj Ke Liye Ja Rahe The Raste Me Ek Manzil Par Aapne Qayam Farmaya Wahan Aapka Ek Aqidatmand Hazir e Khidmat Hua Aur Arz Kiya Ke Huzoor Me Aapka Ghulam Hun, Mere Biwi Dard e Zeh Me Mubtala Hai Aap Dua Farmaye Ke Tandurust Ladka Paida Ho, Hazrat Imaam Hasan Ne Farmaya Tum Apne Ghar Jao Tumhe Jese Farzand Ki Tamanna Hai Wesa Hi Farzand Tumko Allah Ta’ala Ne Ata Farma Diya Hain Aur Tumhara Ye Ladka Hamara Aqidatmand Aur Jaa’n Nisaar Hoga, Wo Shaks Jab Apne Makaan Par Poucha To Ye Dekh Kar Khushi Se Bagh Bagh Ho Gaya Ke Waqai Hazrat Imaam Hasan Ne Jese Farzand Ki Basharat Di Thi Wesa Hi Ladka Uske Yahan Paida Hua.

📚 *Reference* 📚
Shawahidun Nabuwat, Safa 302.