Hazrat Sayyed Shaahul Hameed Abdul Qaadir Nagori rahmatullāhi alaihi

51847151_1509529502514902_9125149295891185664_n

Hazrat Sayyed Shaahul Hameed Abdul Qaadir Nagori rahmatullāhi alaihi :

Alqaab :
‾‾‾‾‾‾‾‾‾
Qaadir Wali Shaah, Naagore Andavar (Shehanshaah-e-Nagore), Fard-ul-Ahbaab.

****************
Aap ki wilaadat 10 Jamaadi uṡ ṡaani 910 Hijri (November 1504 A.D.) ko Jum’aa ke roz Ayodhya ke qareeb Manikapur (Uttar Pradesh) me hui.

Aap ke waalid ka naam Hazrat Sayyed Hasan Quddoos bin Sayyed Hameed-ud-deen rahmatullāhi alaihi aur waalida ka naam Bibi Faatima hai.

Aap Hasani saadaat hain.
Aur Hazrat Ghauṡ e aazam Mohiy-ud-deen Abdul Qaadir Jeelaani radiy-Allāhu anhu ki 9wi pusht se hain.

Aap ke pardaada Hazrat Sayyed Hasan Qaadri Baghdadi Sultaan Firoz Shaah Tughlaq ke zamaane me Hind me tashreef laaye the.

*****************
Aap ki wilaadat se pehle Aap ki waalida maajida ko khwaab me bashaarat hui ke ‘Tumhare yaha ALLĀH ke fazl se aisa beta aane waala hai jo logo ko najaat dilaane waala hoga aur puri zindagi Islaam ki khidmat karega.’

Aap ki waalida jab 7 maah haamila thi tab Manikapur aur aas paas ke ilaaqe me shadeed qehat pada aur log zinda rehne ke liye ghaas ghaas khaane lage. Ek martaba Bibi Faatima ne apne shikam se aawaaz suni ke ‘Aye mere waalidain! Fikr mat karo. Kuchh anaaj lekar use ek bade bartan me paka lo. In shaa Allāh is se aap ki bhuk bhi mit jaayegi aur dusro ko khaana khilaana.’ Jis se sab ko ek din ke liye raahat ho gai.

*****************
Bachpan se hi Aap ilm o hikmat aur roohaniyat ki alaamat zaahir karne lage.

Aap ki wilaadat ke kuchh hi dino baad Indumati naami ek aurat aap ki waalida se milne aai. Us ko juzaam (leprosy) ki beemaari thi. Us ne aap ki waalida ki god me aap ko dekhkar dua ki ke ‘Mujhe is mubarak bache ke waseele se shifa ata farma. ‘ Aur ALLĀH ke fazl se us aurat ki puraani beemaari doodr ho gai aur bilkul tandurast ho gai.

Aap ki umr 2 mahine 19 din thi tab 29 taarikh ko baadal ki wajah se chaand nahi dikha aur logo ne tay kiya ke kal 30 sha’abaan hogi. Magar Aap ne subah saadiq se pehle hi doodh peena chhod diya. Aap ki waalida Bibi Faatima jaan gai ki aaj se Maahe Ramzaan shuru ho gaya hai.
Aap bachpan se hi panj waqta namaaz ada karte.

Jab Aap ki umr 4 saal ki thi tab Abdur Rahmān Tajjairi naami ek shakhs ne Aap ko dekhkar apni ghareebi door karne ke liye dua ki iltija ki. Aap ne us se farmaaya ‘In shaa Allāh tumhari ghareebi hamesha rehne waali nahi hai, bahot jald tumhare haalat badalne waale hain.’

***************
Aap ne apne daada Sayyed Hameed-ud-deen se taaleem haasil ki.
8 saal ki umr me Qur’an aur Ilme Nahaw ki ta’aleem mukammal ki.

Phir Aap ko uloome baatini ki ta’aleem haasil karne ki khwaahish hui. 18 saal ki umr me apne waalidain ke farmaan par Aap Hazrat Sayyed Shaah Muhammad Ghauṡ Gwaliori Shattari rahmatullāhi alaihi se taaleem haasil karne ke liye Gwalior ki jaanib rawaan hue.

Raaste me Moeen-ud-deen naami ek shakhs se Aap ki mulaaqaat hui. Jab dono safar karte hue ek jangal me pahunche to baagho ka ek jhund mila. Moeen-ud-deen ghabhara gaye. Magar Aap ne us jhund par ek nazar daali aura age chalne lage to us me se ek baagh (tiger) Aap ke pichhe pichhe chalne laga aur jangal khatm hote hi wo waapas laut gaya. Moeen-ud-deen ne puchha ‘Aap ko dar nahi laga?’ to Aap ne farmaaya ‘Agar hume ALLĀH par yaqeen ho aur us ki ita’at karte ho to har makhlooq hamari taabedaari karegi. Qur’an hume yehi sikhaata hai.’

Aage gaye to ek nadi aai magar koi kashti ka intazaam nahi tha. Is liye Aap paidal nadi paar karne lage. Ye dekhakar Najm-ud-deen naami ek shakhs ne Aap par jaadoo karne ki koshish ki. Magar wo na-kaam hua. Aur us ke sar par ek sing nikalne laga. Ye dekhkar us ne aap ki muafi maangi. Aap ko raham aaya aur us ka sing door kiya aur use naseehat farmakar aage badhe.

Gwalior pahunchkar Aap ne ek puraani masjid me namaaz ada karke ALLĀH ta’ala se dua ki.

Hazrat Sayyed Shaah Muhammad Ghauṡ Gwaliori rahmatullāhi alaihi apne shaagirdo ke saath aap ke istiqbaal ke liye aaye.
Aap ne 10 saal se zyada Hazrat ki khidmat me rehkar taaleem haasil ki.

*****************
Phir ijaazat lekar 404 shaagirdo ke saath Gwalior se Manikapur tashreef laaye.
Phir 12 saal tak isha’ate islaam ke liye Hind, Afghanistan, Baluchistan, Sri Lanka, Burma aur dusre mulko me safar kiya.

Is dauraan Aap ne ALLĀH ke fazl se kai karaamat zaahir ki, jis me murde ko zinda karna, gunge ko aawaaz ata karna, apaahij ko chalta karna, beemaaro ko shifayaab karna aur samundar me jahaaz ko doobne se bachaana saamil hai.

*****************
Ek martaba Aap Ajmer Khwaja Ghareeb nawaaz rahmatullāhi alaihi ke roze par ziyarat ke liye gaye to Roza mubarak ka darwaaza band tha. Aap ba-adab waha khade rahe. Kuchh der me roza mubarak ka darwaaza khul gaya. Aap andar tashreef le gaye aur darwaaza phir se band ho gaya. Aap ne 3 din tak andar rehkar faiz haasil kiya.

*****************
Jab Aap Makka mukarrama ki taraf safar kar rahe the to raaste me Aap ne apne shaagirdo ke saath ek pahaad ke neeche thehre. Aap ke ek shaagird ka oont pahaadi logo ke giroh ne chura liya aur use khaa liya. Aap ka shaathi pareshaan ho gaya. Aap ne us oont ki haddiya aur bacha hua gosht jama kiya aur farmaaya ‘Kum bi iznillāh’ to ALLĀH ke fazl se wo oont zinda ho gaya. Jab un pahaadi choro ne ye dekha to un sab ne muafi maangi aur musalman ho gaye.

Phir jab Lahore pahunche to ek masjid me qayaam farmaaya. Yaha Qaazi Noor-ud-deen ne Aap ko aulaad ke liye dua ki iltija ki. Aap ne unhe apna chabaaya hua paan diya aur farmaaya ke ‘Ye paan apni biwi Zohara ko khila dena aur tum dono 40 din tak ek dusre door rehna. In sha Allāh tumhare yaha beta paida hoga jo tumhe mujhe de dena hoga.’
Aap ki dua se Qaazi Noor-ud-deen ke yaha 12 Rajab 959 Hijri (7 July 1552 A.D.) ko beta paida hua. Aap ke farmaan ke mutaabiq is ka naam ‘Mohammad Yousuf’ rakha gaya.

Jab Aap Khurasan pahunche to Aap ko ek na-bina shakhs mila. Aap ko us ki mohtaaji par raham aaya. Aap ne us ke liye dua farmai to ALLĀH ke fazl se use binai mil gai.

Khurasan me Sultaan Mahmood naami ek ameer taajir tha. Us ko aulaad nahi thi. Aap ki shohrat sunkar us taajir ki biwi ne Hazrat ki baargaah me dua ke liye jaane ke liye kaha. Us ne kaha ‘Agar wo waaqqi me Wali hin to mere sukhe baagh ko sabz bana den.’ Dusre din us shakhs ne dekha ke us ka baagh sabz ho gaya. Wo aap me baargaah me aaya aur muafi maangi aur dua ke liye iltija ki. Aap ki dua se us ke yaha 1 ladka aur 2 ladki paida hue.

Phir 949 Hijri me jab Aap Jable Azwiya par muqeem the tab ek raat namaaze isha ada karne ke baad Aap ne apne shaagirdo se farmaaya ‘Mujhe Aap sab ke saath Manikapur jaana hoga. Mere waalide mohtaram ke inteqaal ka waqt qareeb hai.’ Phir ek hi raat me Aap ne apne shaagirdo ke saath us jagah se Manikapur ka taweel safar tay kiya. Dusre din Aap ke waalid ka inteqaal hua. Phir 5 din ke baad Aap ki waalida ka bhi inteqaal hua.

Phir Aap waapas Makka mukarrama ki taraf rawaana hue. Raaste me Sindh me 2 Yogi mile jo hawa me udte the aur bahot maghroor the. Aap ne apni jootiyo ko hukm diya to wo hawa me udne lagi aur dono Yogi ke sar par maarne lagi. Dono ne Hazrat ke qadmo me aakar muafi maangi. Aap ne unhe Takabbur chhodne ki naseehat farmai.

Sindh ke Raaja ne Aap ko daawat ki aur zeher milaaya hua khaana Aap ko pesh kiya. Aap ne Bismillāh padhkar khaana khaaya. ALLĀH ke fazl se Aap ko aur aap ke saathiyo ko koi nuqsaan na hua magar wo Raaja mar gaya. Us ki Raani ne Aap ko iltija ki. Aap ne dua farmai to wo Raaja phir se zinda ho gaya.

Phir Aap Sindh se Gwalior tashreef le gaye aur Hazrat Muhammad Ghauṡ Gwaliori rahmatullāhi alaihi se faiz haasil kiya.

Phir Aap kashti me sawaar hokar Hajje Baitullāh ke liye rawaana hue. Jeddah pahunche to Hazrat Ādam aur Bibi Hawwa ki ziyarat haasil hui.
Phir waha se paidal Takbeer padhte hue 3 din me Makka pahunche aur Arkaane Hajj ada kiye.
Phir jab Aap Madeena munawwara pahunche aur Roza e Rasool-Allāh sallallāhu alaihi wa sallam par haazir Salaam pesh kiya to Roz mubarak ke andar se jawaab mila ke ‘Wa alaikum assalaam yaa Waladi Khush aamadid’ Ye sunkar Aap ki aankho ke aansoo jaari ho gaye. Jab ijaazat ke liye Aap ne apne dono haath lambe kiye to Aap ke haatho me Huzoor sallallāhu alaihi wa sallam ke pasandeeda phalo ko maujood paaya.

Phir Aap Makka shareef waapas aaye aur taqreeban 6 saal tak muqeem rahe.
Makka me qayaam ke dauraan Abdullāh naami ek shakhs aap ki baargaah me aaya aur arz ki ‘Huzoor! Mera beta Abdul Azeez Scandinavia ki taraf safar par gaya hai. Magar ek arse se us ki ya us ke jahaaz ki koi khabar nahi hai. Wo mera eklauta beta hai.’ Aap ne dua farmai. 8 din ke baad Abdul Azeez apne jahaaz ke saath salaamat pahunch gaya. Abdullāh ne jahaaz aur us ka maal Hazrat ko batore hadiya pesh kar diya. Itne me ek aur shakhs waha aaya aur us ne apne gumshuda jahaaz ke liye dua ki iltija ki. Aap ne Abdullāh ka diya hua jahaaz aur tamaam maal us shakhs ko de diya.

Qaazi Noor-ud-deen ke farzanad Mohammad Yousuf 7 saal ki umr me taaleem haasil karne ke baad ek martaba namaaze asr ada karne ke baad ghar waapas aa rahe the tab ghaib se bashaarat hui ke ‘Aap ke waalide mohtaram Makka mukarrama me muqeem hain.’ Unho ne ghar aakar ye sab bataaya to waalidain un ko ek sandooq me se Hazrat ka Mishwaak nikaalkar diya. Wo apne waalidain ki ijaazat lekar Hazrat ki khidmat me jaane ke liye rawaana hua. Un ke waalid ne ashrafiyo aur 4 khaadimo bhi saath me diye. Thoda aage safar karne ke baad unho ne wo ashrafiya chaaro khaadimo me taqseem kar di aur ghode ke saath waapas jaane ke liye farmaaya. Is ke baad Makka mukarrama ki jaanib safar karte rahe. Jab wo Sana ke samundar ke kinaare par pahunche to Hazrat ne apne 2 shaagirdo ko Aap ko lene ke liye bheje. Un ke saath wo Hazrat ki khidmat me pahunche.
Hazrat ne Hazrat Mohammad Yousuf ko taaleem wa tarbiyat dena jaari rakha.
Ek baar Hazrat ne raat me pura Qur’n majeed likhkar diya aur Hazrat Mohammad Yousuf ne us ki tilaawat ki. Tilaawat sunkar Aap behad khush hue.

Is ke baad Aap ne kai mulko me safar karke Auliya Allāh aur buzurgaane deen ki baargaah me aur un ke mazaar par haazir hokar faiz haasil kiya.
Aap ne Baghdad me Hazrat Ghauṡ e aazam Abdul Qaadir Jeelaani radiy-Allāhu anhu ke mazaar par haazir hokar faiz haasil kiya.

Jab Aap Kuwait pahunche to Aap ne Hazrat Mohammad Yousuf ko ek maqaam par baithkar musassal zikr aur muraaqaba karne ke liye farmaaya. Hazrat Mohammad Yousuf ne Aap ke farmaan taamil ki. Kuchh waqt ke baad wo banjar ilaaqa sar o sabz ho gaya. Hazrat ne ek sukhi tehni zameen me daali to us me 2 patto se bhari hui shaakhen paida ho gai.
Aap ne khush hokar Hazrat Mohammad Yousuf ko Shattaari aur Qaadri silsila ki khilaafat ata farmai.

Phir Aap Jeddah aaye aur jahaaz me safar karke Kerala ke Ponnani tashreef laaye. Yaha Aap ne Zain-ud-deen Makhdoom naami taajir ke baagh me qayaam kiya. Jab Aap wuzu kar rahe the tab paani behkar jis simt gaya us taraf ka hissa sabz ho gaya.

Phir Aap Maldives tashreef le gaye. Yaha par ek riwaaj tha ke har saal log Jinn ko ek kunwaari ladki ki bali chadhaate the. Jab Aap waha pahunche to log is rasm ko ada karne ki tayyaari kar rahe the. Jab log us rasm ko ada karne ke liye gaye to Aap bhi gaye aur jab Jinn aaya to Aap ne use pakadkar ek botal me band kar diya. Us botal ko mazboot dhakkan lagakar bada patthar baandhkar samundar me phenk diya. Is tarah waha ke logo hamesha ke liye us jinn se najaat mil gai.

Phir Aap Kanyakumari gaye aur waha se Ceylon (Sri Lanka) gaye. Yaha Aap ne us pahaad ki ziyarat ki jaha par Hazrat Ādam alaihis salaam dunya me tashreef laaye the.

Phir Aap apne shaagirdo ke saath Kayalpattinam, Kilakarai, Pattaari aur dusre maqaam se hote hue Melappalayam pahunche. Yaha Aap ne Chilla kashi ki.

Phir Aap Tenkasi gaye. Yaha Aap ke kuchh saathiyo ne bhuk ki wajah se mandir ke bail ko zibah karke khaa liya. Hinduo ne Aap ko fariyaad ki. Aap ne muafi maangi aur apne shaagirdo se us bail ki haddiya jama karne ke liye farmaaya. Phir Aap ne apne asaa se use chhua to ALLĀH ta’ala ke fazl se wo bail zinda hokar khada ho gaya.

Phir Aap Pothigai pahaad par gaye. Jaha par kuchh Yogi rehte the. Aap ne Hazrat Mohammad Yousuf ko ek kaansa ata kiya tha. Jis me se khaana milta rehta tha. Do Yogiyo ne us kaanse ko churakar apne sardaar ko diya. Us ne ek gad’ha karke us kaanse ko andar rakh diya. Aap ke farmaan par Hazrat Mohammad Yousuf ne us jagah par gaye aur us sardaar ki maujoodagi me kaanse ko hukm diya to wo zameen chirkar baahar aa gaya aur Hazrat Mohammad Yousuf ke haath me aa gaya.

Phir Aap Tiruchirapalli gaye aur Hazrat Tabr-e-Aalam Nathar Wali rahmatullāhi alaihi ke mazaar par aaye aur Roza mubarak ke andar 3 din aur 3 raat rehkar faiz haasil kiya.
Phir waha Chilla kashi ki.

Phir 950 Hijri (1543 A.D.) Jab Aap Thanjavur pahunche to waha ke Raaj Achuthappa Naikan bahot arse se itna beemaar tha ke haath pair bhi hila nahi sakta tha. Us ne Hazrat ko mahel me aakar us ke liye dua ke liye iltija ki. Aap mahel me pahunche aur us ka haal dekhne ke baad Aap ne jaan liya ke Raaja ko jaadoo ke zariye beemaar kar diya gaya hai. Aap ne apne us farzand ko ek kabootar dhundhne ke liye farmaaya. Wo jab Hazrat ka bataaya hua kabootar lekar aaye to Aap ne us kabootar ke jism se ek ek karke sooiya nikaalna shuru kiya. Jaise hi sab sooi nikal gai Raaja bilkul tandurast ho gaya. Ye dekhkar us ki Raani ne Aap se aulaad ke liye iltija ki. Aap ne us ke liye saahibe aulaad aulaad ki dua farmaai. Aur ALLĀH ke fazl se Raaja ko aulaad hui. Us ne maal o daulat dena chaaha magar Aap ne use lene se inkaar kar diya. Aakhir me Raaja ne Aap ko Nagore me samundar ke kinaare 30 acre zameen batore hadiya pesh ki. Aur Aap waha sukoonat pazeer hue.

Aap Therampettai, Koothanallur, aur Thirukalachery hote hue Thiruvarur aaye. Thiruvarur me ek mandir me tehwaar ke liye ek Rath tha jo rook gaya tha aur aage nahi chal raha tha. Jab logo ne Aap ko dekha to Aap se iltija ki. Aap ne sab ko door hataaya aur us Rath par ek nazar daali to wo apne aap chalne laga.

Phir Aap apne saathiyo ke saath Mela-Nagore pahunche to logo ne Aap ko takleef dena shuru kiya. Aap waha se nikal gaye. Aap ke waha se nikalte hi waha zalzala aaya aur sab imaaraten gir gai. Phir sailaab aaya jis se sab behne laga. Log waha se jaan bachakar dusre gaanvo me bhaag gaye.

Phir Aap Nagore tashreef laaye aur yaha chila kashi ki. Ye jagah ‘Chilladi’ ke naam se mash’hoor hai.
Yaha Aap ko Hazrate Khizr alaihis salaam ne aakar bashaarat di ke ek maqaam par ret ke andar ek imaarat dabi hui hai. Aap ne apne shaagirdo ko us maqaam par jaakar khodne ke liye farmaaya. Aur waha par ret se us imaarat ko baahar nikaala gaya.

Raya Kunjali Maricar naami ek ameer shakhs Hazrat ki shohrat se na-raaz th aur hasad ki wajah se Aap ki burai karta tha. ALLĀH ke ghazab se use munh me Cancer hua. Dawa karaane par bhi wo theek nahi hua to Sayyed Makhdoom use doli me bithakar Hazrat ke paas lekar aaye. Raya Kunjali Maricar ne Aap se muafi maangi. Aap ne us ke munh me apna thoonk daal diya. ALLĀH ke fazl se wo bilkul tandurast ho gaya.

*****************
Mela-Nagore me Khwaja Mahadoom al-Yamani ki badi saahabzaadi Bibi Zohara se Hazrat Mohammad Yousuf ka paighaam bheja. Khwaja Mahadoom-ul-Yamani ne apni ameeri ke ghroor me inkaar kar diya.
Is ke baad Khwaja Mahadoom ke maal se bhare hue 3 jahaaz samundar me doob gaye aur un ki badi saahabzaadi beemaar hui aur us ka inteqaal hua.
Khwaja Mahadoom ko apni galti ka ehsaas hua. Wo Hazrat ki baargaah me aaye aur apni dusri saahabzaadi Sultaana Bibi se Hazrat Mohammad Yousuf ka nikaah karaane ke liye raazi hue.
Aur un ke 6 saahabzaade aur 2 saahabzaadiya hue.

********************
Phir Aap jahaaz par sawaar hokar Darnacheri (Burma) bandar-gaah par gaye. Waha Budh mazhab ke logo ko islaam ki taaleem di to unho ne maanne se inkaar kiya. Is par Aap ne karaamat dikhaai ke un ke but bolne lage aur Islaam ki ta’areef bayaan karne lage. Ye dekhkar wo sab musalman ho gaye.

Kuchh arsa waha rehne ke baad Aap Nagore waapas aaye.

Ek martaba Aap Hajjaam ke paas khat banwa rahe the. Aap ne apne haath me ek aa’ina pakda hua tha. Achaanak Aap ne us aa’ine ko Bengaal ke samundar ki jaanib phenk diya.
Baad me pata chala ke ek Dutch jahaaz samundar me toofaan me phans gaya tha aur us ki teh me ek suraakh ho gaya tha jis se jahaaz me paani bharne laga tha. Ye andesha tha ke jahaaz doob jaayega. Sab ne ummeed chhod di thi. Itne me ek shakhs ne Hazrat ka naam bataaya aur Aap ko madad ke liye pukaara. Sab ne dekha ke aahista aahista jahaaz se paani kam hone laga aur jahaaza salaamat Nagapattinam ke kinaare par pahunch gaya. Hazrat ne Mohammad Yousuf aur dusre shaagirdo ko jahaaz par jaakar wo aa’ina waapas laane ke liye bheja. Phir sab ko pata chala ke Hazrat ne jo aa’ina samundar ki taraf phenka tha wo jahaaz ke suraakh par chipak gaya tha. Jis se jahaaz me paani aana band ho gaya tha.
Jahaaz ke Kaptaan ne aur dusre logo ne kuchh maal batore hadiya pesh kiya. Jo Hazrat Mohammad Yousuf Hazrat ke paas lekar aaye. Aap ne farmaaya ‘Aaj se jo kuchh hadiya milega us par Mohammad Yousuf ka haq hoga.’

Nagapattinam me Dutch afsaro ne Aap ko karaamat bataane ke liye kaha. Aur kaha ke ‘Aap East Indies ilaaqe se hari ilaaichi ka guchha laakar dikhaao.’ Kuchh hi lamho me hari ilaaichi ka guchha Aap ke haath me aa gaya. Jo Aap ne Dutch afsaro ko de diya.

Phir Aap ne Maahe Rajab me Nagore ke qareeb Vanjur tashreef le jaakar ek band khadde ke andar rehkar mujaahida karte hue 40 din tak roze rakhe. Isi tarah Silladi Pallivasal me bhi Aap ne 40 din tak roze rakhe.

****************
Ek din Aap ne Mohammad Yousuf se farmaaya ‘Mere wisaal ka waqt qareeb hai. Har insaan ko dunya se rukhsat hona padta hai. Kuchh aisi ne’amate hain jo Jannat me hi milti hai. Main tum se door nahi hounga magar tumhare bahot qareeb rahunga.’
Phir Aap ne farmaaya ‘Jab mera inteqaal hoga us ke baad baadal jama honge aur baarish hogi. Us ke paani se mujhe ghusl dena. Aur Muthbaq me ek maqaam par jaana. Waha tumhe kapda milega. Jise mere kafan ke liye istemaal karna.’
Phir Aap ne farmaaya ‘Mere inteqaal ke 3 din baad namaaze fajr ke baad meri qabr par aakar mujhe salaam karna. In shaa Allāh tumhe salaam ka jawaab milega. Phir tum apne pariwaar ke saath Nagore me hi sukoonat pazeer rehna. Aur agar jawaab na mile to Nagore chhodkar dusri jagah par sukoonat ikhtiyaar karna.’

********************
Aap Hazrat Sayyed Shaah Muhammad Ghauṡ Gwaliori Shattari rahmatullāhi alaihi ke mureed aur khalifa hain.

Aap ke khalifa Hazrat Sayyed Mohammad Yousuf rahmatullāhi alaihi hain.

****************
Aap ka wisaal 10 Jamaadi uṡ Ṡaani 978 Hijri (November 1570 A.D.) ko Jum’aa ke roz subah ko 68 baras ki umr me hua.

Aap ka mazaar Nagore (Tamil Nadu) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Abdul Qaadir Nagori urfe Qaadir Shaah Wali rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.