Hazrat Makhdoom Sharf-ud-deen Ahmad bin Yahyā Maneri rahmatullāhi alaihi

19883966_1080725712061952_5636044938184404574_n

Hazrat Makhdoom Sharf-ud-deen Ahmad bin Yahyā Maneri rahmatullāhi alaihi :

Alqaab :
‾‾‾‾‾‾‾‾‾‾
Makhdoom-ul-Mulk, Makhdoom-e-Jahaan, Sultan-ul-Muhaqqeen.

**************
Aap ki wilaadat 29 Sha’abaan 661 Hijri (July 1263 A.D.) ko Maner (Patna, Bihar) me hui.

Aap ke waalid ka naam Hazrat Makhdoom Kamaal-ud-deen Yahyā Maneri bin Makhdoom Israeel rahmatullāhi alaihi aur waalida ka naam Bubu Raziya binte Makhdoom Sayyed Shahaab-ud-deen Peer Jagjot Balkhi hai.

Aap ke pardaada Maulana Muhammad Taaj-ud-deen (Jerusalem ke qareeb) Quds al-Khalil se Hind me aaye the aur Maner me muqeem hue the.

********************
Shir-khwaari (doodh pine) ke zamaane me ek martaba Aap ki waalida aap ko ghar me chhod kar pados ke ek makaan me gai. Jab waapas aai to dekha ke ek Buzurg jhule ke paas baith kar jhule ko hilaa rahe hain. Jab un ki nazar aap ki waalida par padi to gaa’ib ho gaye.
Aap ki waalida ne tamaam haal apne shohar se kaha to unho ne farmaaya ke ‘Wo Buzurg Hazrat Khizr alaihis salaam the aur is bache ki hifaazat ke liye aaye the. Ye bacha apne zamaane ka wali e kaamil aur makhdoom hoga.’

*****************
Bachpan se hi Aap ko husool e ilm me dilchaspi thi.

12 saal me umr me Narayanganj ke qareeb Sonargaon jaakar Hazrat Ashraf-ud-deen Abu Towama Bukhari se Arabi, Faarsi, Falsafa, Ilme Istedalaal ki ta’aleem haasil ki. Aap 24 saal tak Hazrat ki khidmat me rahe.

Is ke baad Aap Delhi tashreef le gaye. Waha Aap ne Hazrat Khwaja Nizaam-ud-deen Auliya rahmatullāhi alaihi aur deegar asfiya se faiz haasil kiya.

Aakhirkaar Aap apne bade bhai Makhdoom Jaleel-ud-deen Maneri rahmatullāhi alaihi ke saath Mehrauli me Hazrat Shaikh Najeeb-ud-deen Firdausi rahmatullāhi alaihi ki baargaah me aaye aur Hazrat ke mureed hue.

*****************
Phir Aap Maner ke qareeb Bihiya ke jangal me aur phir Rajgir me mujaahida karte rahe.

30 saal tak mujaahida karne ke baad Aap Bihar Sharif me sukoonat pazeer hue.
Sultaan Muhammad bin Tughlaq ne Aap ki khaanqaah ki taameer ki. Aur Aap logo ko ta’aleem aur faiz ata karte rahe.

*****************
Karaamat :
‾‾‾‾‾‾‾‾‾‾‾‾
Raajgir me qayaam ke dauraan ek Jogi Aap ke paas aaya aur Aap se puchha ke ‘Islaam me Wali e Kaamil ki pehchaan kya hi?’ Aap ne us Jogi se farmaaya ke ‘Islaam me Wali e Kaamil ki pehchaan ye hai ke wo apni zabaan se jo keh de wo ho jaata hai. Maṡlan agar wo is pahaad se kahe ke : Aye pahaad, tu sona ban jaa to wo sona ho jaaye.’
Abhi Aap ki zabaane mubarak se ye baat nikli hi thi ke wo pahaad sone ka ho gaya. Aap ne pahaad se mukhaatib hokar farmaaya ke ‘Aye pahaad! Main to miṡaal de raha tha. Apni asli haalat par laut aa.’
Aap ki yeh Karaamat dekhkar us Jogi aur us ke kai saathi ne Mazhab e Islaam qubool kar liya aur Aap ke mureed ho gaye.

*****************
Tasannif :
‾‾‾‾‾‾‾‾‾‾‾‾
Aap ki likhi hui mash’hoor kitaaben :
(1) Fawaa’id-ul-Mureedeen
(2) Irshaadat-ul-Taalibeen
(3) Raahat-al-Quloob.

Aap ke Aqwaal aur ta’aleemaat ko 3 kitaabo me jama kiya gaya hai :
(1) Maktubat-e-Sadi (Qaazi Shams-ud-deen ko likhe hue 100 khutoot ka majmua, 747 Hijri)
(2) Maktubat-e-Bist-o-hasht (Maulana Muzaffar Shams Balkhi ko likhe hue 28 khutoot ka majmua)
(3) Fawaa’id-e-Rukni (Shaikh Rukn-ud-deen ko ta’aleem wa tadrees ka majmua).

*****************
Aap ka nikaah Bibi Badaam se hua.

Aap ke saahabzaade Zaki-ud-deen hain.

*****************
Aap Hazrat Shaikh Najeeb-ud-deen Firdausi rahmatullāhi alaihi ke mureed aur khalifa hain.
Aur ‘(Suharwardi Kubrawiya) Firdausi’ silsila ke Shaikh hain.

Aap ke khulfa :
(1) Qaazi Shams-ud-deen rahmatullāhi alaihi,
(2) Maulana Muzaffar Shams Balkhi rahmatullāhi alaihi,
(3) Shaikh Rukn-ud-deen rahmatullāhi alaihi,
(4) Shaikh Zain-ul-Badr Arabi rahmatullāhi alaihi.

*****************
Aap ka wisaal 6 Shawwaal 782 Hijri (January 1381 A.D.) ko Jumeraat ke roz hua.

Aap ka mazaar Badi Dargaah, Bihar Sharif (Bihar) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Makhdoom Sharf-ud-deen Ahmad bin Yahyā Maneri rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.