Hazrat Khwaja Haaji Najm-ud-deem Sulaimāni Chishti rahmatullāhi alaihi

36284048_1308877502580104_9155491362936717312_o

Hazrat Khwaja Haaji Najm-ud-deem Sulaimāni Chishti rahmatullāhi alaihi :

Alqaab :
‾‾‾‾‾‾‾‾‾‾‾
Najam Sarkaar, Aaftaab-e-Shekhawati.

****************
Aap ki wilaadat 3 Ramazaan 1234 Hijri (June 1819 A.D.) ko Juma’a ke roz Subah saadiq ke waqt Jhunjhnu (Rajasthan) me hui.

Aap ke waalid ka naam Hazrat Ahmad Bakhsh Naqshbandi bin Faiz-ud-deen rahmatullāhi alaihi aur waalida ka naam Sardaar Bibi hai.

Aap Hazrat Umar Faarooq radiy-Allāhu ta’ala anhu ki nasl se hain.

Wilaadat se pehle Aap ke waalid ko Baargaahe Khudawandi se bashaarat hui ke ‘Tumhare ghar par jo bacha paida hoga wo apne waqt ka Ghauṡ wa Qutub hoga.’

****************
1242 Hijri (1827 A.D.) me 8 saal ki umr me Aap ke Biraadare akbar Hazrat Shaikh Shahaab-ud-deen Faarooqi ne Aap ki Bismillāh khwaani karaai.
Aap ne Hazrat Maulana Muhammad Ramazaan Shaheed Muhimi rahmatullāhi alaihi se Qur’an ki ta’aleem haasil karna shuru kiya.
Hazrat ne Aap ke bhai ko bashaarat di ke ‘Is bache ka mustaqbil jitna roshan dekhta hu is daur me kisi aur ka nahi hai.’

14 saal ki umr me Aap ne Ilm e Hadeeṡ wa Fiqh ki ta’aleem mukammal ki.
Aap Faarsi, Arabi, aur Urdu ke maahir the.

****************
14 saal ki umr me ek roz Aap Hazrat Khwaja Habeebullāh Qaadri rahmatullāhi alaihi ki Kitaab ‘Anees-ul-Aarifeen’ ka muta’ala farma rahe the. Jis me ye jumla Aap ki nigaah se guzra ‘Jis ka koi Peer nahi us ka peer Shaitaan hai.’
Ye padhlar Aap ka dil Peer e kaamil ki talaash ke liye betaab jo gaya. Aap ne apne waalidain se Dehli ki taraf safar karne ki ijaazat maangi. Lekin kam umri ki wajah se Aap ke waalidain ne Aap ko ijaazat na di.

1253 Hijri me Aap apne ghar par bataaye baghair Hazrat Qamar-ud-deen Naqshbandi rahmatullāhi alaihi ke saath Khwaja Ghareeb nawaaz rahmatullāhi alaihi ke urs mubarak ke liye Ajmer shareef rawaana hue.
1 Rajab 1253 Hijri (October 1837 A.D.) ko Aap Khwaja Ghareeb nawaaz ke mazaare aqdas par haazir hue aur arz kiya ‘Huzoor! Peer e kaamil ki talaash me meri rehnumaai farmaae.’
Usi roz Aalame Roo’aya me Sarkaar Ghareeb nawaaz ki ziyarat se musharraf hue aur Khwaja ne farmaaya ke ‘Najm-ud-deen! Tum Naagor jaakar Khwaja Soofi Hameed-ud-deen Nagori ki baargaah me jaao.’
Aap foran Nagor sharif ke liye rawaana hue aur Khwaja Soofi Hameed-ud-deen Nagori ki baargaah me ma’aruza pesh kiya.
Usi Raat Aalame Roo’aya me dekha ke Fuqara wa Aulia ki mehfil saji hai aur ek Buzurg badi shaan se masnad se jalwa afroz hain. Aap ne kisi se puchha ke ye Buzurg kaun hain? To jawaab mila ke ye Sultaan-ul-Taariqeen Hazrat Khwaja Soofi Hameed-ud-deen Nagori hain. Unho ne Aap par nazar ki aur Aap ko Apne qareeb bulaaya aur aane ka sabab puchha. Aap ne apna maqsad zaahir kiya. Jawaab mila ke ‘Bete! Tum jaisa Peer chaahte to is daur aisa ek Shaahbaaz e Tareeqat Sanghadh nadi ke kinaare Taunsa me jalwa afroz hai. Tum un ke paas chale jaao. Main un se tumhari sifaarish kar dunga.’ Ye bashaarat paate hi Aap foran Nagor se Taunsa shareef ke liye rawaana hue.
Aap Bikaner se Multan hote hue Taunsa 10 Sha’abaan 1253 Hijri (November 1837 A.D.) ko chasht ke waqt pahunche. Maulawi Ali Mohamamd waha Namaaze Chaasht ada kar rahe the. Faarig hone ke baad Aap ne un se Khwaja Shaah Sulaimān Taunswi ke muta’alliq puchha to unho ne bataaya ke Hazrat is waqt apne ghar par mashgoole Muraaqaba hain. Agar taalibe ziyarat ho to Zawaal ke waqt aam kachehri me haazir hona.’ Magar be-qaraari aur zauq ki wajah se Aap foran hi hazrat le ghar par pahunche aur Hazrat ke hujre ke baahar baith kar un ke baahar tashreef laane ka intazaar karne lage. Thodi der ke baad Hazrat ne apne khaadim ko Aap ko andar laane ka hukm diya.
Khaadim me baahar aakar Najm-ud-deen naam pukaara. Lekin waha kai Najm-ud-deen the jo pehle se taalibe didaar the. Wo sab khade ho gaye. Khaadim ne andar jaakar arz kiya ke ‘Baahar to kai Najm-ud-deen hain. Aap ne kaun se Najm-ud-deen ko talab farmaaya hai?’ To Hazrat ne farmaaya ke ‘Najm-ud-deen Nagori ko bulaao.’ Khaadim ne waapas aakar kaha to Aap Hazrat ki baargaah me haazir hue aur do zaanu adab se bith gaye.
Kaafi der ke baad Hazrat ne Muraaqabe se aankh khol kar Aap ki jaanib tawajjoh di aur farmaaya ke ‘Aye Marde Hindi! Tu wo hai jo kisi ka bheja hua hai.’ Aur aane ka maqsad puchha. Aap ne arz kiya ke :
‘Na talabe Dunya daaram, Na talabe Uqba daaram,
Taalibe Khuda hastam, Khuda mi khwaham.’
(Na Duniya ki talab hai, Na uqba ki talab hai,
Taalibe Khuda hu, Khuda hi ko chaahta hu)

Ye sun kar Hazrat bahot khush hue aur Aap ki pusht par haath maara aur farmaaya ‘Aafrin sad aafrin, Tu waaqai Mard hai.’ Phir jab Aap ko Gash aaya to Hazrat ne farmaaya ‘Najm-ud-deen! Hosh me aao, Tumhari hasti se senkdo Wali banne hain.’

Usi raat baad Namaaze Ishaa Hazrat ne Aap ko mureed banaaya aur Wird o Wazaa’if ataa kiye.

Aap apne Peer o murshid se be-inteha mohabbat karte the. Isi wajah se Hazrat ne farmaaya ke ‘Najm-ud-deen mera Parvaana hai.’

6 mahine Taunsa shareef me musalsal qayaam farmaane ke baad 6 Moharram 1254 Hijri (April 1838 A.D.) ko Hazrat Baaba Freed-ud-deen ke Urs mubarak ke mauqe par Paak Pattan me Hazrat ke Mazaare aqdas par Hazrat Khwaja Shaah Sulaimān Taunswi ne Aap ko Khirqa e Khilaafat ataa farmaaya aur Silsila e Aaliya Chishtiya, Qaadriya, Naqshbandiya aur Suharwardiya ki Ijaazat ataa farmai.
Phir Hazrat ne Aapko Raajputana Marwad ki Qutubiyat ataa farma kar Fatehpur Shaekhawati me qayaam ka hukm diya.

****************
1254 Hijri me Aap Fatehpur Shekhawati tashreef laaye aur Masjid Qaum Me’maaran me qayaam kiya. Lekin kuchh arse baad hi Ibaadat o Riyaazat me khalel hone ki wajah se Fatehpur ke Junoob ki jaanib Bihad me sukoonat ikhtiyaar ki. Aur Khaanqaah qaayam karke ta’aleem wa faiz ata farmaate rahe.

1256 Hijri (1841 A.D.) me Aap ne apne murshid ki ijaazat se Hajj ada kiya.

Aap ka ye mamool tha ke Aap Saal me 6 Mahine Fatehpur Shekhawati me qayaam farmakar Isha’aat e deen me masroof rehte aur 6 mahine apne Peer o murshid Hazrat Khwaja Shaah Sulaimān Taunswi ki khidmat me Taunsa shareef rehte.

7 Safar 1267 Hijri (1850 A.D.) ko Hazrat ke wisaal ke waqt bhi Aap apne murshid ki baargaah me haazir the aur tamaam khaas Raaz o niyaaz se faizyaab hue.

***************
Pariwaar :
[1] Aap ka pehla nikaah Shaikh Lutfullāh Khan Chishti Nizami ki saahabzaadi se hua.
Jin se 3 saahabzaade aur 2 saahabzaadiya hain.

Saahabzaade :
(1) Khwaja Muhammad Naseer-ud-deen
(2) Khwaja Abdul Lateef
(3) Khwaja Shaah Noor Ahmad

Saahabzaadiya :
(1) Fazeelat-un-Nisaa
(2) Lateef-un-Nisaa.

[2] Un ke inteqaal ke baad Aap ne dusra nikaah Shaikh Abdul Kareem ki saahabzaadi se kiya.
Jin se 7 saahabzaade aur 4 saahabzaadiya hain.

Saahabzaade :
(1) Shams-ud-deen (Bachpan me inteqaal hua)
(2) Muhammad Bakhsh (Bachpan me inteqaal hua)
(3) Ameenuddeen Awwal (Bachpan me inteqaal hua)
(4) Ameenuddeen Doyam (Bachpan me inteqaal hua)
(5) Abdul Wasee (Bachpan me inteqaal hua)
(6) Shaikh Maulana Mohammad Ramazaan
(7) Shaikh Mohammad Sarfaraaz Ali .

Saahabzaadiya :
(1) Aleem-un-Nisaa
(2) Umme Kulṡum
(3) Faatima Kubra (Bachpan me inteqaal hua)
(4) Faatima Sughra (Bachpan me inteqaal hua).

****************
Aap Hazrat Khwaja Shaah Sulaimān Taunswi Chishti urfe Peer Pathaan rahmatullāhi alaihi ke mureed aur khalifa hain.
Aur ‘(Chishti Nizaami) Sulaimāni’ silsila ke shaikh hain.

Aap ke Khulfa :
(1) Hazrat Khwaja Muhammad Naseer-ud-deen Najmi rahmatullāhi alaihi
(2) Hazrat Qutub-e-Marwad Makhdoom Khwaja Abdul Lateef Najmi rahmatullāhi alaihi
(3) Hazrat Khwaja Shaah Noor Ahmad Najmi rahmatullāhi alaihi
(4) Hazrat Shaikh Mohammad Ramazaan rahmatullāhi alaihi
(5) Hazrat Maulana Qamar-uddeen Shaah rahmatullāhi alaihi
(6) Hazrat Maulana Saif-ud-den Shaheed rahmatullāhi alaihi
(7) Hazrat Hakeem Sayyed Muhammad Hasan Amrohi rahmatullāhi alaihi
(8) Hazrat Maulana Sadr-ud-deen Shaah rahmatullāhi alaihi
(9) Hazrat Maulana Yaar Muhammad Peshawari rahmatullāhi alaihi
(10) Hazrat Maulana Imaam-ud-deen rahmatullāhi alaihi
(11) Hazrat Shaikh Qaazi Imaam-ud-deen rahmatullāhi alaihi
(12) Hazrat Hakeem Sayyed Ashraf Ali Jilani rahmatullāhi alaihi
(13) Hazrat Shaikh Sayyed Riyaaz-ud-deen rahmatullāhi alaihi
(14) Hazrat Nawwaab Haaji Khan Muhammad rahmatullāhi alaihi
(15) Hazrat Saahibzaada Muneer Khan rahmatullāhi alaihi
(16) Hazrat Mehju Khan Bikaneri rahmatullāhi alaihi
(17) Hazrat Khaanji Ilāhi Bakhsh Sikri rahmatullāhi alaihi
(18) Hazrat Shaikh Mahmood rahmatullāhi alaihi
(19) Hazrat Shaikh Mian Laal Shaah Durwesh rahmatullāhi alaihi
(20) Hazrat Shaikh Khuda Bakhsh rahmatullāhi alaihi
(21) Hazrat Shaikh La’al Muhammad rahmatullāhi alaihi
(22) Hazrat Shaikh Sultaan Mewari rahmatullāhi alaihi
(23) Hazrat Shaikh Khuda Bakhsh Shahpura rahmatullāhi alaihi
(24) Hazrat Shaikh Imaam-ud-deen Deedwanavi rahmatullāhi alaihi
(25) Hazrat Shaikh Muhammad Shaah Durwesh rahmatullāhi alaihi
(26) Hazrat Shaikh Peer Bakhsh rahmatullāhi alaihi
(27) Hazrat Shaikh Maula Bakhsh rahmatullāhi alaihi
(28) Hazrat Shaikh Meeran Bakhsh rahmatullāhi alaihi
(29) Hazrat Shaikh Maulana Noor Muhammad Panipati rahmatullāhi alaihi.

****************
Aap ka wisaal 13 Shawwaal 1287 Hijri (6 January 1871 A.D.) ko hua.

Aap ka mazaar Fatehpur Shekhawati, Sikar (Rajasthan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Haaji Najm-ud-deem Sulaimāni Chishti rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.